1 Uan 3 - Fanawbuid tagsibaliwas Fakayabian

Dius at ngay Sisian

¹ Amatangani te, maksvn tua tam Mama nu kesug antam; katanya at fagnafangayanun antam te, at ngay sisian, ay katsi at sisian tua tam. Ay fagdaul daga at ngay taw wa toglag antam, aroro kanya fagayu wa natoglag Dius.

² Ku ngay fakesugun, katsi Dius tua tam at ngay sisian, ay ya tam fia saful nu setain ban tam. Ay saful tua tam te, gina ban tam Fun Isus andasug, fagayu ban tam kata tua tam anya, aroro lumag ban tam fia anya.

³ Ay fagayu taw at ke fagsegun takatanya, matuyani fia at ugali kata tam Fun Isus nu matuyan.

⁴ Nusnga sinu tagasalanan kamabo Muisis at Faugali, aroro asalanan ay fakamaboun Muisis at Faugali, katanya yay.

⁵ Nasaful am te, Isus at fagindasugun, laman namalyam tam asalanan. Ay kanya di e asalanan.

⁶ Nusnga sinu tagbanwan sis Isus di gfataglayun nu gasalanan. Ay nusnga sinu tagfataglayun sas asalanan, kanya wa nalag ay wa natoglag Isus.

⁷ Ku ngay sisian, lag am gadayan nusnga sinu. Fagayu tagfaning at matuyan, kanya matuyan wan, kata tam Isus nu matuyan.

⁸ Ay fagayu tagfataglayun gasalanan, kanya Satanas way at taw. Aroro siginans fakasigadan Satanas gfakamulun gugat asalanan. Ay Dius at Baguama at fagindasugun, laman namamin Satanas at fakamulun.

⁹ Nusnga sinu Dius at sisian di gfataglayun gfakamulun at mauri, aroro si tua anya Dius at ugali. Sarokta kanya wa makatu gfakamulun at mauri, aroro Dius wan at sisian.

¹⁰ Kata tuy tam fagsafulan te, sinu Dius at ngay sisian ay sinu Satanas at ngay sisian: nusnga sinu at yud gfakamulun at masine, ay at yud kesug at faduksay, kanya bunwa Dius at sisian.

Edkesugani

¹¹ Ay ebi taguna nadungug wam te, masine nu kedkesugan tua tam.

¹² Lag tam gfaning Kain, aroro Kain Satanas way at taw ay kanya nafabul at arian. Ay wain at fagnafabulun? Aroro Kain at fakamulun mauri way ay at arian at fakamulun masine tua.

¹³ Ku ngay faduksay, lag kadulo tagste swa daga fag ngay taw nu kauri ayu.

¹⁴ Nasaful watam te, nlangfe watam siginans fakabulun ay andasug tua tam sas fagelelegun, aroro kedkesugan tua tam. Ay nusnga sinu nu dway kesug at faduksay, kanya si yays fakabulun at daga fagmabalyananun.

¹⁵ Nusnga sinu takauri at faduksay, kanya sik takamabul way, ay nasaful wam te, sik takamabul wa ban e leleg at yud e fakatabuan.

¹⁶ Katatuy tam fagsafulan fakesugun at masuad: Isus nafon at leleg sa antam. Ay at masine nu gfon yangay tam tam leleg sa tam ngay faduksay.

¹⁷ Sik taw nu e kwa ay kanya nu nalag at faduksay nu gayudan, ay nu dway nagubuk, o Dius at fakesugun si anya?

¹⁸ Ku ngay sisian, nu kesug tam tam ngay iba, dangay lang si tam longan, falagi tua siginan tam fakamulun at matuyan.

¹⁹ Nu katanya tua, mafatuyan tam te, siwa tam sad matuyan ay e fagmanabayanun tam sas Dius at daga salubangan,

²⁰ dewa tam amatanganan gfoyung antam te, e fagmauriun tam. Tam Dius gtungud tua tam amatanganan ay kanya tua tagsaful nusnge wain.

²¹ Ku fakesugun ku ngay faduksay, tam amatanganan nu ddi gfoyung antam te, e fagmauriun tam, di ban tam kapla sis Dius at daga salubangan.

²² Ay mabul tua tam tam fagetun sas Dius, aroro gfaning tua tam at ngay suguan ay gfakamulun tua tam nusnga setaw tagfauseganan anya.

²³ Katatuy Dius at suguan: afanudi sat Baguama, Isus tam Fun, ay edkesugani kata at suguan antam.

²⁴ Nusnga sinu tagfaning Dius at longan, kanya gbanwan sas Dius, ay Dius gbanwan si anya. Ay saful tam te, Dius gbanwan si antam siginan at nafon sa antam fag Falad.