1 Uan 1 - Fanawbuid tagsibaliwas Fakayabian

At Longan Tagfon Leleg

¹ Griruk ami sa ayu em nadungug sabaliwa Tagfon leleg fag Longan. Ay siginans fakasigadan kafag Longan sanya wan, ay nadungug ami fia, ay nalag ay nated anya.

² Tagfon leleg ansure, ay gfatuyan ami te, nalag ami fia anya. Gfoyung ami te, kanya gfon leleg at yud e fakatabuan, ay siginans fakasigadan gfaudgufudan gugat at Mama ay abandi ansure sa emi.

³ Gfoyung ami ayu em nadungug ay em nalag, laman e fagmasadiun am sa emi. Ay e fagmasadiun tua tam sa tam Mama ay sat Baguama, Isus tam Fun.

⁴ Ay griruk ami tuy fag rirukan laman ban maksvn tua tam fagusegananun.

Dius Sik Fagmayamagun

⁵ Katatuy em nadungug siginan tam Isus, ay gfoyung ami ayu te, Dius wan fagmayamagun, ay si anya we madulum nusdi alay.

⁶ Nu glong tam te, ansadi tam sas Dius, ay nu glao yay tam sis fagmadulumun, kamuag way tam ay wa tam gfaning at matuyan.

⁷ Nu glao tua tam sasad mayamag, kata Dius nu sisad mayamag, e fagmasadiun tua tam sas galay at sadi, ay at Baguama Isus at taguk gfasine tam ngay asalanan.

⁸ Nu glong tam te, wa tam e asalanan, gdaya way tam antam, ay we si antam fagmatuyanun.

⁹ Nu gfoyung tua tam tam ngay asalanan sas Dius, kanya gfalyam tam ngay asalanan ay gfasine tam basad taw sas fagayu mauri, aroro Dius kabavn matuyan ay gfafasludan at longan.

¹⁰ Nu glong tam te, wa tam e asalanan, gfangayan tam Dius te, takamuag, ay wa si antam at longan.