1 Tesalunika 4 - Fanawbuid tagsibaliwas Fakayabian

At Mafauseganan Dius

¹ Em ngay faduksay, ebi nafoyung ami sa ayu te, fakamuluni at mauseganan sas Dius, ay nafakamulun tuam takatanya. Katsi, gurungan ami glong ayu te, sa tam Fun Isus at ngayan, faugati yap takatanya ay fakamulun.

² Aroro nasaful wam em suguan ayu siginan tam Fun Isus.

³ Dius at fakaylatun diam e malong. Nu katanya, ayayui siginans fagfanugtugun;

⁴ ay masine nu sumaful am gugali at yud e malong ay at mauseganan sabaliwa sik dadwa.

⁵ Lag gfaning ay bilug at fakaylatun, kata sik taw at yud natoglag Dius.

⁶ Lag am gfakamulun takatanya sa ay faduksay, aroro tam Fun gfaurianan nusnga sinu tagfakamulun at mauri, kata em nalong ay em nafararang wan sa ayu ebi.

⁷ Dius at fagnauroun antam laman wa tam namaning ya fagmauriun nu bunway laman di tam e malong.

⁸ Ay nusnga sinu at yud gfaning takatanya fag ngay suguan bunwa sas taw nu kamabo, nu bunway sa tuas Dius, at nafon antam at Masine fag Falad.

⁹ Ay nu sabaliwa nu kedkesugan am, wam fagfoyungun ya, aroro Dius nafoyung wan ayu te, edkesugani.

¹⁰ Matuyan, katsi kesug tuam ngay tagafanud sis talun Masidunya. Dewa katanya, gurungan yaymi glong sa ayu te, faksvni yap nu mafangesug am.

¹¹ Ugatani banwani manabayan. Lag am kasalag ay iba nu mabanwan, nu bunway ugatani tua sa ay sadili fakamulun kata em longan ayu,

¹² laman at yud gafanud sas Dius lumag te, manabayan tua nu mabanwan am, ay diam gsefu ay iba.

Sabaliwa at Kinbul fag ngay Tagafanud

¹³ Em ngay faduksay, kaylat ami nu nasaful am at matuyan sabaliwa at ngay kinbul wan, laman diam kabalu kata tibak taw at yud e fagsegun fakalangfean.

¹⁴ Gafanud tam te, Isus anbul ay nadog yay naleleg, nu katanya, gafanud yangay tam te, Dius ban nantaban fagayu at kinbul tagafanud sas Isus.

¹⁵ Glong ami sa ayu tam Fun at foyungan te, tam Fun ban nu ndasug, itam tagleleg, wa tam gguna at ngay kinbul.

¹⁶ Ay ginanya ban fag menit, tam Fun kadasug gasfuan sik maksvn fag suguan. Ay umdungug yangay tagbarita at longan ay anggan at budyung. Ay taguna ban gleleg, ngay taw at kinbul tagafanud sa tam Fun Isus.

¹⁷ Ay Isus gfaful ban antam sasad linyabu, itam tagleleg, at naguyanan yay, gasfuan at ngay nafaleleg laman namablang tam tam Fun sas kiwang ay magamut ban tam si anya kabavn.

¹⁸ Nu katanya, fadfamatangani tua takatanya fag ngay longan laman gfabitsug ay ngay amatanganan.