1 Tesalunika 3 - Fanawbuid tagsibaliwas Fakayabian

¹ Nu katanya, aroro wami kagwanta ya, namatangan ami te, at masine, ami Silas kafamato yaymi sis Atenas.

² Ay nasugu ami sa ayu tam faduksay Timuteu, Dius at fagsuguan tagfoyung yangay at Masine fag Barita sabaliwa tam Fun Isus. Kanya wan em nasugu laman gfaksvn ay fagafanudun ay gfabitsug ay amatanganan,

³ laman nusnga sinu si ayu di kamomuy aroro siginan ay ngay nadalan fag faurianan. Nasaful wam te, Dius nafalganan sa antam takatanya.

⁴ Gina ami sanya nafararang ami sa ayu te, e gfauri ban antam, ay saful am te, katanya wa fia at kinfasludan.

⁵ Ay aroro kwa magwanta ya, nasugu au sa ayu Timuteu laman gfadungug emi sabaliwa nu gafanud am. Ay namatangan au te, manafaylatan am Satanas, nu katanya, umfangulan ban em nainlufuyanan.

⁶ Ay katsi Timuteu anfoli wan stie. Ay masine mandi at fadungugan sa emi sabaliwa nu gafanud am ay nu mafangesug am. Ay nafadungug yangay emi te, kabavn gamatang tuam emi ay maksvn nu gyalagun am emi kata nu gyalagun ami ayu.

⁷ Nu katanya, em ngay faduksay, dewa ami gafaurianan ay gafanawa, ansun tuami aroro gfataglayun tua nu gafanud am sa tam Fun Isus.

⁸ Nu katanya, em amatanganan anbitsug tua aroro maksvn tua ay fagafanudun sa tam Fun.

⁹ Tain ro nu mafauseganan ami at kasakan sa tam Dius, siginan at kaksvnan nu guseganan ami sabaliwa ayu?

¹⁰ Maksvn nu gdarangin ami kayu menit ay yabi laman gdog ami nansibo ayu, laman namakasakan ami ay fagafanudun at kurang.

¹¹ Tam Dius tam Mama ay tam Fun Isus nu kaylat, umdasug tuami vtv sa ayu.

¹² Em darangin te, tam Fun tagfabitsug ay tagfaksvn nu kedkesugan am ay nu kesug am fagayu taw, kata nu kesug ami ayu.

¹³ Kanya nangus gfabitsug ay amatanganan laman diam e malong, ay diam e mauri sa tam Dius tam Mama at daga salubangan, gina ban tam Fun Isus gdog andasug, gasfuan at ngay nafili.