1 Tesalunika 2 - Fanawbuid tagsibaliwas Fakayabian

¹ Em ngay faduksay, nasaful yangay am te, em nasiboan ayu di nfangulan.

² Nasaful wam te, naidapan ami ay nafalingunan sis furuan Filipus. Dewa katanya, tam Dius nafabitsug tua em amatanganan laman gfoyung ami sa ayu at Masine fag Barita dewa ngayu tagsalag emi.

³ Em foyungan wa gsalan, ay bunwa siginan at mauri fag algan ay wami kaylat gfandaya.

⁴ Dius nafatigwanan sa emi laman gfoyung at Masine fag Barita. Ay em algan bundi sas taw em fagfausegananun, nu bunway sa tua tam Dius tagsaful tam amatanganan.

⁵ Saful wam te, em fakamoyungun bundi siginans famaylatan fag longan ay bundi siginans famuagan fag foyungan laman kae ramraman ami. Dius wan tagfatuyan takatanya.

⁶ Ay wami narvbvy famaylatan siginan ayu ay dewa ndaginan fag ngay taw.

⁷ Aroro tam Fun Isus ami at ngay nasugu, e fagmakatuun ami get ay fanggubukun. Ay wami nafakamulun takatanya. Abat ngate, malukme tuami fia sa ayu kata sik mina nu galaga at ngay sisian.

⁸ Guseganan ami gfoyung Dius at Masine fag Barita sa ayu, aroro maksvn nu kesug ami ayu. Bundi lang kanya, nafon wami sa ayu anggan em leleg.

⁹ Em ngay faduksay, gamatang yay ro am em nainlufuyan ay em nainkidapanan. Nafakamulun ami fagngabak menit ay yabi laman dimi nafaidapan sas nusnga sinu si ayu kaduge ami gfoyung Dius at Masine fag Barita sa ayu.

¹⁰ Am wan tagfatuyan te, masine ay matuyan ay di e malong em ugali kaduge ami gfaudgufudan ayu. Ay anggan Dius gfatuyan yangay.

¹¹ Saful am te, kata ami sik mama sa ayu fagayu. Nafabitsug ami ay ngay amatanganan, ay nafasun ay naet ami sa ayu te,

¹² ugalii at matuyan sis Dius at daga salubangan. Kanya nauro ayu laman gfagtainan ayu ay laman mafabul am at fagmasineun.

¹³ Guseganan ami sas Dius aroro naylat tuam em foyungan. Ay nafaning bunwa taw at longan, nu bunway Dius tua at longan. Ay kanya fag longan gfataglayun gfasine ay leleganan, am fag ngay tagafanud.

¹⁴ Em ngay faduksay, at kinfasludan sa ayu kata yangay at kinfasludan sas Dius at ngay taw sis talun Udea at kinsadi sa tam Fun Isus. Ay kaiban nafauri ayu kata ngay taw Udyu nu gfauri ngay tagafanud sis talun Udea.

¹⁵ Kafag ngay taw yangay at nafabul tam Fun Isus ay Dius at ngay taglong ebi, ay kanya yangay fagayu at naiyan emi. Dius wa guseganan kafag ngay taw, ay kanya fagayu gfawayan fagayu taw.

¹⁶ Kafag ngay taw gsalag nu gfoyung ami at Masine fag Barita sas yud Udyu fag ngay taw laman gsalag kanya fag ngay taw nu kalangfe. Nu katanya, Dius gfaurianan ban anya fagayu aroro fagayu at asalanan maksvn wan nu mauri.

Pablu at Amatanganan nu Gdog Nansibo

¹⁷ Em ngay faduksay, ya bangan glugo nu gsaruayan tam, ay kaylat wami gyalagun ayu, dewa katanya, sa em amatanganan wami kalyam ayu.

¹⁸ Maksvn nu gasanyaun ami, kaugat wan au Pablu, dewa katanya, Satanas gsalag way gugat emi.

¹⁹ Aroro am wan em fagsegun, ay em fagusegananun ay em fakamatungudunun em foyungan ban sa tam Fun Isus at daga salubangan gina ban anfoli.

²⁰ Matuyan, am wan em fagmasineun ay em fagusegananun.