1 Samwel 9 - Fanawbuid tagsibaliwas Fakayabian

Samwel Nafili Saul laman sik Fun

¹ E sik taw maramraman ay sik takadungug siginans Benamin at kasugfunanan, at ngayan Kis, Abyel at baguama. Ay Abyel, Serur at baguama, ay Serur, Bekurat at baguama. Ay Bekurat, Afya at baguama siginan yangay Benamin at kasugfunanan.

² Kis e baguama at ngayan Saul. Saul mabaguama yay ay sas fagayu mangama sis talun Israel sia wan at maseganama ay tangabat.

³ Sik menit, Kis at ngay asnu nalyam, ay kanya nalong sat baguama Saul te, “Nantaban o sik fagsuguan ay nanrvbvy am tam ngay asnu.”

⁴ Nu katanya, Saul ay at fagsuguan nalao wan. Ay andasug sas Efraim at fagagbilugun fag ngay buksul ay nataglayun sas furuan Salisa, ay we lagan sanya. Ay kafag dua nafataglayun nu glao ay andasug sas furuan Saalim, ay nataglayun sas Benamin at kasugfunanan at ngay furuan, ay wa yangay e lagan sanya.

⁵ Ay duama nu ndasug sas talun Suf, Saul nalong sat fagsuguan te, “Guli wata. Ku mama ro manga nu gafanawa anta gtungud wan nu gafanawa ngay asnu.”

⁶ Dewa katanya, at fagsuguan gbalus te, “To yap! Dius e fagsuguan ste fag furuan. Ngay taw gsuyu tua anya, ay fagayu at longan matuyan tua. Sanya yap ta, bangaran ro kanya mafoyung anta ta fagrvbvyun.”

⁷ Ay Saul nalong sat fagsuguan te, “Ay nataw ro ta fon sa anya? Ta fetus namin wan. Wa ro ta e famonun ya.”

⁸ At fagsuguan nabalus te, “E salapi kyay sirut. Tuy ro gfon kwan sas Dius at fagsuguan laman ro kanya gfoyung anta tam ngay asnu.”

^9-10 Saul glong te, “Agvd, basta, glao wata sa kafag taginsaful.” Ay duama nalao sas furuan, Dius at fagsuguan at fagbanwanan. (Ebi, sas Israel, sik taw nu kaylat gbul ngay foyungan siginans Dius glong te, “Bastam, glao watam sa taginsaful.” Aroro ebi nu gfangayan katsi fag ngay taglong sik ngay taginsaful.)

¹¹ Gina duama gundaud sanya fag furuan nu inda Dius at taglong nu gbanwan, kanya fag dua nafablang sik ngay baguina laman nanagub. Ay duama nainto sa kafag ngay baguina te, “O taginsaful manga ste yay?”

¹² Kafag ngay baguina gbalus te, “Sabv! Bagu yay kadasug sa em furuan laman nanfangguna ngay taw laman namon ngay fanggalangun sas Dius at bale sa tangabat fag buknga. Sakiti tua!

¹³ Nasud yay ro am anya gina yud nasakbo sas Dius at bale sa tangabat fag buknga laman nanfangon. At maful sanya fag ngay taw ya mafangon yakmay kanya andasug, aroro kanya yay ro tagfadante kafag ngay taw at fanggalangun. Nu katanya, undaudi wan, gina yay mayamag.”

¹⁴ Nu katanya, duama nasakbo sas furuan, ay gina gsakbo, nafablang Samwel gina gundaud sa tangabat fag buknga.

¹⁵ Egmenit ataw gina Saul gakadasugun sanya fag furuan, Yawi nalong sas Samwel te,

¹⁶ “Balabag ban kata katsi, gsugu kban sa emu sik taw tagsiginans Benamin. Rarusi ban sat alfuyu langis fakatoglagan te, kanya wan ku nafili at namunan ban ku ngay taw Israel. Kanya ban at namalangfe ku ngay taw siginan ngay taw Filistia, aroro nalag au ku ngay taw nu gidapan ay nadungug au nu get gubuk.”

¹⁷ Samwel nu nalag Saul, Yawi nalong anya te, “Kanya wan ku nalong emu fag taw at nanfunan ban ku ngay taw.”

¹⁸ Saul ankakbang sas Samwel sis dalan tagsakbo sas furuan ay nainto te, “Dada manga ste fag taginsaful at bale?”

¹⁹ Samwel gbalus te, “Au wan kafag taginsaful. Gunai wa angku sas Dius at bale sa tangabat fag buknga, ay gasfuan ro tam gfangon. Ay balabag ban, namoyung au emu am fagyasafulun ay sanya ginan ban ulii wan.

²⁰ Lag o gafanawa ay ngay asnu at malyaman tuluk menit, aroro nalag wan. Ay katsi, glong au sa emu te, o wan ay am mama at kaiban ngay taw Israel at fagsegun.”

²¹ Ay Saul gbalus te, “Au siginan kway Benamin at gaban, Israel at kasugfunanan at yud ngayu fag gaban, ay si em gaban ami wan tiba daga fag talanan. Nu katanya, wain am fagnalongun sa angku takatanya?”

²² Saul ay at fagsuguan nu ndasug sas bale fagnansegan sa tangabat fag buknga, Samwel nataban duama sa tagbia fag suluk sit ngay betaw fag tuluk safulu at fagmafulan ay nafalunggung yangay sanya.

²³ Samwel nalong sa takamatama te, “Bubai stae ku nalong emu fag yamas.”

²⁴ Ay takamatama nabuba sas Saul at daga salubangan sik balangbang yamas. Ay Samwel nalong sas Saul te, “Oni wan kanya fag yamas ku nafalganan sa emu. Tuy ku nafalganan siginan yay nu yud au ggewan tagste fag ngay taw.” Nu katanya, ginanya fag menit Saul ay Samwel gasfuan gfangon.

²⁵ Kanya fagayu nu kafoli wan sas furuan siginans bale fagnansegan si tangabat fag buknga, Samwel nataban Saul sat bale ay nafalganan sanya stungud bale Samwel at fagtiugan, ay nafakamatoan sanya.

²⁶ Ay ginanya fag yabi sanya wan Saul nu gtiug. Ay balabag di, Samwel guro Saul te, “Afuloi wan, ay loi wa ro.” Saul nu mafalganan wan, naduksun siginan at fagtiugan fag bale gadgaloan at fagsuguan.

²⁷ Ay duama nu gakaduksunun wan siginans furuan Suf, Samwel nalong sas Saul te, “Fagunai wan am fagsuguan,” ay at fagsuguan naguna wan. Ay Samwel nalong sas Saul te, “E fagyalongun kyay sa emu siginans Dius.”