1 Samwel 7 - Fanawbuid tagsibaliwas Fakayabian

¹ Nu katanya, ngay taw Kiryat-Earim nanamul Fagsuadan Nasadian siginans Bet-Semes ay nabuba sas Abinadab at bale sis tungud buksul. Ay nafili Elyasar, Abinadab at baguama laman tagulit.

Samwel nu Gfunan sis Israel

² Fagsuadan Nasadian nu sis Kiryat-Earim, duak safuluk banwa. Ginanya ngay taw Israel maksvn nu kabalu ay naet gubuk sas Yawi.

³ Nu katanya, Samwel nalong sa sangay taw Israel te, “Nu kafoli tuam sas Yawi sas fagdaul ay amatanganan, ubuni wan ay ngay fagsegan anggan Asturet at aninu ay falganani ay sadili sas Yawi. Kanyai tua ay fagfaningun. Nu katanya tua ay fakamulun, gfalangfe tua ban ayu siginan sangay taw Filistia.”

⁴ Ay kanya fagayu naubun Baal ay Asturet at ngay aninu, ay nafaning Yawi.

⁵ Sanya ginan, Samwel nalong sa sangay taw Israel te, “Afuli ban sas Mispa ay nandarangin kban ayu sas Yawi.”

⁶ Ay kanya fagayu nu nful wan, nabul mamam ay naugwag sis Yawi at daga salubangan. Ginanya fag menit kanya fag ngay taw wa gfangon laman gdarangin laman gfoyung ay gubun at ngay asalanan sas Yawi. Ay ginanya Samwel nu gfasigad gfangguna ngay taw Israel.

⁷ Ngay taw Filistia nu nadungug te, ngay taw Israel maful sis Mispa, at ngay tagfangguna gfalganan laman namawayan ngay taw Israel. Ay ngay taw Israel nu nasaful at algan, anlimu.

⁸ Ngay taw Israel nalong sas Samwel te, “Lag gfaragang nu gdarangin o sas Yawi, laman gfalangfe antam sa sangay taw Filistia.”

⁹ Nu katanya, Samwel nanamul sik riangan tupa ay nairug laman at fanggalangun sas Dius. Kanya naet gubuk sas Yawi laman sa sangay taw Israel, ay Yawi nabalus tua at darangin.

¹⁰ Kaduge Samwel gfon at fanggalangun, ngay taw Filistia andasug laman namawayan ngay taw Israel. Dewa katanya, ginanya fag menit, Yawi nafadasug sik maksvn fag ngay lingsi, ay ngay taw Filistia anlimu ay wa saful ya at fakamulun, ay nalagyu siginan sa ngay taw Israel.

¹¹ Ay ngay taw Israel nanamafalo ngay taw Filistia ay nafabul kayu at nasud si sangaba dalan sis Mispa yakmay andasug sas Bet-Kar.

¹² Sanya ginan, Samwel nabul sik gang ay nafasis wabilug Mispa ay Sen. Ay kanya nafangayan kafag gang te, Ebeneser, aroro kanya nalong te, “Dasug katsi, Yawi ggubuk tua emi.”

¹³ Nu katanya, ngay taw Israel nababo tua ngay taw Filistia, ay siginan ginanya wa batang namawayan ya ngay taw Israel kaduge Samwel gleleg aroro Yawi tua tagfawayan.

¹⁴ Ngay taw Filistia nafafoli wan sa sangay taw Israel at nagbilug fag ngay furuan at munakbang sis Ekrun ay sis Gat. Ay ngay taw Israel ay ngay taw Amur wa gawayan ya.

¹⁵ Samwel gfataglayun gfangguna fagdaul talun Israel.

¹⁶ Galay banwa, kanya gdalanan sas Betel, sas Gilgal ay sas Mispa laman gfangguna ngay taw Israel sanya.

¹⁷ Ay kanya kafoli sas Rama sat fagbanwanan ay gfangguna yangay tagsanya fag ngay taw Israel. Ay kanya nawat sanya sik fagirugan laman sas Yawi.