1 Samwel 5 - Fanawbuid tagsibaliwas Fakayabian

Fagsuadan Nasadian sis Furuan Asdud ay sis Furuan Ekrun

¹ Ngay taw Filistia nu naago wan Fagsuadan Nasadian, nabuba siginans furuan Ebeneser ay nafadasug sas furuan Asdud.

² Sanya ginan, nabuba sat fagsegan Dagun at bale, ay nafatungkud sis day Dagun fag fagsegan.

³ Balabag di, taw Asdud nu glag at fagsegan Dagun malub sis Fagsuadan Nasadian at daga salubangan. Kanya fagayu nafalindug ay nafafoli sat faglindugan aro taw.

⁴ Dewa katanya, balabag di, kafag ngay taw nu glag, at fagsegan gdog malub sis Fagsuadan Nasadian at daga salubangan. Ay at alfuyu ay at take fagdua anrabas wan, ay grapyagan sis sakbawan baliwa ay at sawad at bilug way lang.

⁵ Ay dasug katsi, Dagun at ngay tagfon fanggalangun ay anggan at ngay tagsakbo sas Dagun at bale, wa nansiad ya sik afud tagsis sakbawan baliwa.

⁶ Yawi nafaurianan maksvn tagsis Asdud fag ngay taw ay anggan at fakbangan fag ngay furuan. Ay at faurianan sanya fag ngay taw sik ngay famaga.

⁷ Ngay taw Asdud nu nalag at kindasug nalong te, “Wa masine nu si gugat antam taw Israel at Dius at Fagsuadan Nasadian, aroro kanya gfaurianan antam gasfuan tam fagsegan Dagun.”

⁸ Nu katanya, kafag taw nafauro taw Filistia at ngay tagfangguna ay nainto te, “Tain ro tam fakamulun sas Israel at Dius at Fagsuadan Nasadian?” Ay at ngay tagfangguna gbalus te, “Bubai sas furuan Gat.” Nu katanya, kanya fag ngay taw nabuba Fagsuadan Nasadian sas Gat.

⁹ Ay nu ndasug sanya, Yawi nafaurianan yangay tagsis Gat fag ngay taw. Ay fagdaul furuan gafanawa aroro Yawi nafadasug yangay sik ngay famaga ayu daul sa sangay sisian ay sa sangay fagtainan.

¹⁰ Nu katanya, ngay taw Gat nabuba sas Ekrun Fagsuadan Nasadian. Gina kanya fagayu gakadasugun sanya, ngay taw Ekrun wa kaylat ay glong te, “Kanya fagayu nabuba stae Fagsuadan Nasadian laman namabul yangay antam.”

¹¹ Nu katanya, kanya fagayu nafauro ngay taw Filistia at ngay tagfangguna ay nalong te, “Fayayui wan ste ginan Fagsuadan Nasadian ay fafolii wan sat talun aroro nu dway ro nafafoli, kabul romi.” Kafag ngay taw nalong takatanya aroro Dius gfasigad wan nu gfaurianan kafag ngay taw at furuan. Ay kafag ngay talun at taw kalimu aroro ngayu wan at kinbul.

¹² Ngay taw at yud anbul, natayukan yangay kafag famaga. Aroro sat kindasug, kanya fagayu maksvn nu gwayway ay at kaksvnan andasug sas banwa.