1 Samwel 4 - Fanawbuid tagsibaliwas Fakayabian

¹ Samwel at foyungan andungug sas fagdaul talun Israel. Ginanya fag buknga, ngay taw Israel nanamawayan ngay taw Filistia. Ay ngay taw Israel anful sis Ebeneser, ay ngay taw Filistia anful sis Afek.

Ngay Taw Filistia Nabul Fagsuadan Nasadian

² Ngay taw Filistia nafawayan ngay taw Israel ay nababo; ay ginanya ufatk libuk taw Israel at kinbul.

³ Nu ntabu wan nu gawayan, at sawad fag ngay taw Israel anfoli wan sat fagmafulan. Ay at ngay fagtainan nainto sa anya fagayu te, “Wain Yawi at fagnafababawanun antam sa tam ngay fawayan fag ngay taw Filistia? At masine namul yap tam sas furuan Silu Fagsuadan Nasadian, laman Yawi gufud tua ay gfalangfe antam sa tam ngay fawayan.”

⁴ Nu katanya, ngay tagfangguna nasugu sik ngay mangama laman namul Yawi at Mabalyanan at Fagsuadan Nasadian. Ay sis Fagsuadan Nasadian at suklub e duak awatan tagleleg ke fakfak, ay Yawi at Mabalyanan gbanwan sis wabilug kafag duak awatan. Ay Eli at baguama fagdua nanangalo yangay namul.

⁵ Kanya fagayu nauro guseganan gina nafadasug Fagsuadan Nasadian sat fagmafulan ay daga nauigan.

⁶ Ay ngay taw Filistia nu nadungug ngay taw Israel nu guro, kanya fagayu gidgintoan te, “Wain ngay taw Ebreu at fagudguroanun?” Ay kafag ngay taw nu nasaful te, Fagsuadan Nasadian andasug sa sangay taw Israel at fagmafulan,

⁷ kanya fagayu anlimu ay nalong te, “E ndasug sik fagsegan sa sangay taw Israel at fagmafulan! Ay kanya fagayu glong te, gababawan way ban tam siring! Ebi ginan, ya batang e ndasug sa antam takatatuy.

⁸ Afanyuan tam! Sinu ban at mafalangfe antam siginan kanya fag ngay fagsegan at mabalyanan? Aroro kanya yangay fag ngay fagsegan at nafabul ngay taw Igiptu siginan sa ngay faurianan sis talun at yud e taw.

⁹ Dewa katanya, faksvni tam ngay amatanganan, aroro nu nmomuy way tam, ngay taw Ebreu namagsuguan antam kata ebi nu gfagsuguan tam anya fagayu. Nu katanya, namawayan watam!”

¹⁰ Nu katanya, ngay taw Filistia nanamawayan ngay taw Israel ay kanya fagayu nababo. Ay ngayuk taw Israel at kinbul, at kayuan tuluk safuluk libu. Ay at sawad fag ngay taw Israel nalagyu ay anfoli sat fagmafulan.

¹¹ Ay ngay taw Filistia naago wan Fagsuadan Nasadian ay nafabul yangay Ufni ay Finekas, Eli at baguama fagdua.

Eli nu Kabul

¹² Ginanya yangay fag menit, sik taw gtarung siginans fagawayanan ay ndasug sas Silu; kanya siginans Benamin at kasugfunanan. Ay nagirat at lanbung ay nafasat alfuyu dafug, fagtoglagan te, maksvn nu kabalu.

^13-15 Kanya gina kadasug sas Silu, Eli malunggung si sik faglunggungan sis tigyangan dalan ay gfandungugan ngay barita, ay gafanawa sabaliwas Fagsuadan Nasadian. Ginanya Eli at banwa siamk safulu e walu, ay wa bangan glag ya. Ay tagsiginans awayan fag taw nafadungug sas fagdaul furuan at kinfasludan. Ay ngay taw nu nadungug, gwayway. Ay Eli nu nadungug kanya fagayu nu gwayway, nainto te, “Wain ngay taw at fagwaywayun?” Ay kafag taw masakit nangakbang sa anya,

¹⁶ ay glong te, “Bagu kyay kadasug siginans awayan. Nalagyu au.” Ay Eli ginto te, “Nataw at kindasug?”

¹⁷ Kafag taw gbalus te, “Ngay taw Filistia nababo wan, ay ngay taw Israel nalagyu. Tam ngay tagfawayan ngayu at kinbul gasfuan am baguama fagdua, Ufni ay Finekas. Ay tam ngay fawayan nabul wan Fagsuadan Nasadian.”

¹⁸ Ay kafag taw nu nalong sabaliwas Fagsuadan Nasadian, Eli anfuan way lang siginan at faglunggungan sis tigyangan furuan at sakbawan. Ay at liug an-gatvng ay kanya anbul wan, aroro Eli mataglu ay mafufuama wan. Kanya nu gfangguna ngay taw Israel ufatk safuluk banwa.

¹⁹ Ginanya yangay fag buknga, Eli at nugang gafasalugun wan, kanya Finekas at mangena. Ay kanya nu nadungug te, Fagsuadan Nasadian nagoan ay at mangama anbul wan ay anggan at nugangama, kanya ansait at ungdan ay nafasalug.

²⁰ Ay kanya nu gakabulun wan, at ngay tagtustus nalong te, “Faksvni am amatanganan. Am ngenge sik munama.” Dewa katanya, kanya wa gbalus ya.

^21-22 Kanya nu gakabulun wan, nafangayan at sisian te, Ikabud, aroro kanya nalong te, “Dius at fagmasineun wa gufud ya ngay taw Israel.” Kanya nalong takatanya aroro Fagsuadan Nasadian nagoan wan, ay at mangama ay at nugangama anbul wan.