Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Samwel 31 - Fanawbuid tagsibaliwas Fakayabian


Saul nu Kabul
1Kr 10:1-12

1 Ngay taw Filistia nanamawayan ngay taw Israel sis buksul Gilbua. Ay ngayuk taw Israel at kinbul ay tiba nalagyu wan.

2 Ay ngay taw Filistia nafafalo Saul talamean, ay nafabul Saul at ngay baguama: Yunatan, Abinadab ay Malki-Sua.

3 Ay maksvn Saul ay ngay taw Filistia nu gawayan. E nagodun Saul ay gbia at fakarukan.

4 Ay Saul nalong sa tagbuba at ngay famawayan te, “Guladi am fiso ay fabuli angku, aroro nu dway ro wo nafabul angku, ngay taw way ro at yud natoglag Dius tagfabul angku, ay kanya ro fagayu gfalingun angku.” Ay tagbuba at ngay famawayan anlimu way gfabul anya, nu katanya, Saul nabul at fiso ay naurus at sadili.

5 Ay tagbuba at ngay famawayan nu nalag te, Saul anbul wan, naurus yangay at sadili ay anbul yangay.

6 Nu katanya, ginanya fag menit, Saul talamean ay tagbuba at famawayan ay fagayu at tagfawayan gasfuan anbul.

7 Ay ginanya, e ngay taw Israel tagbanwan sis datag Esreel ay anggan sis dife Liskung Urdan. Ay kanya fagayu nu nalag Israel at ngay tagfawayan nu glagyu, ay Saul talamean nu mabulan, kanya fagayu naubun at ngay furuan ay nalagyu yangay. Nu katanya, ngay taw Filistia nasakbo sanya fag ngay furuan ay nabanwan sanya.

8 Ay balabag di, nu ntabu wan nu gawayan, ngay taw Filistia nasas buksul Gilbua laman namul at ngay kinbul at famawayan. Ay kanya fagayu nalag sanya Saul talamean nu mabulan.

9 Ay kanya fagayu nalifung Saul at liug ay nabul at ngay famawayan ay nasugu sik ngay tagfosuk longan sas fagdaul talun Filistia laman namasaful sat ngay fagsegan at bale ay sat ngay kaiban te, Saul anbul wan.

10 Ay kanya fagayu nafasakbo Saul at famawayan sat fagsegan Asturet at bale, ay narabing Saul at bilug sis furuan Bet-San at alad.

11 Ay ngay taw Abes-Gilyad nasaful ngay taw Filistia at nafakamulun sas Saul.

12 Nu katanya, ginanya fagngabak yabi at maseganama fag ngay mangama nalao sas Bet-San laman namul Saul talamean at ngay bilug ay nabuba sas furuan Abes, ay nairug sanya.

13 Sanya ginan, kanya fagayu nabul talamean at ngay bini ay nanamoli sas daga fun kayu daul sis Abes, ay wa gfangon laman gdarangin kaduge fituk menit laman gfalag te, kabalu.

Copyright © 2021 by OMF International, Philippines 

OMF International
ကြှနျုပျတို့နောကျလိုကျပါ:



ကြော်ငြာတွေ