1 Samwel 3 - Fanawbuid tagsibaliwas Fakayabian

Dius nu Guro Samwel

¹ Gina Samwel sis Eli at bale laman gfakamulun sas Yawi, Yawi wa malayun ya nu namakamatoan ngay taw, ay wa yangay malayun ya nu e gtaginfan.

² Eli wa bangan glag ya. Sik yabi, kanya gtiug sit bale.

³ Ay ginanya, Samwel gtiug yangay sis Yawi at bale munakbang sis Fagsuadan Nasadian. Ay kaduge at salung gigang,

⁴ Yawi nauro Samwel. Ay Samwel nabalus te, “Nataw?”

⁵ Kanya masakit nu sas Eli ay nalong te, “Nataw? Wain am faguroun angku?” Eli gbalus te, “Duan, kwa guro emu. Afolii wan nantiug way o.” Nu katanya, Samwel anfoli ay gdog yay gtiug.

⁶ Yawi gdog yay nauro te, “Samwel!” Ay Samwel anfulo, ay glao sas Eli ay glong te, “Nataw? Wain am faguroun angku?” Eli gbalus te, “Munama, kwa guro emu, afolii wan nantiug way o.”

⁷ Ginanya Samwel ya toglag Yawi, aroro Yawi ya batang gfakamatoan anya.

⁸ Yawi nauro Samwel at fatulu ginan. Kanya anfulo ay nalao sas Eli ay glong te, “Nataw? Wain am faguroun angku?” Ay Eli nasaful te, Yawi guro Samwel.

⁹ Ay kanya nalong sas Samwel te, “Dogi yap afolii ay nantiug yap o. Ay nu nadog ro nauro emu longi te, ‘Yawi, aringangi wan, aroro au, am fagsuguan, gdungugan au.’ ” Ay Samwel anfoli sat fagtiugan ay gdog yay gtiug.

¹⁰ Yawi ankakbang sas Samwel kata aro taw ay guro te, “Samwel! Samwel!” Ay Samwel nabalus te, “Aringangi wan, aroro au, am fagsuguan, gdungugan kwan.”

¹¹ Ay Yawi nalong te, “Amatangani, wa ban glugo ya ay e fagnamakamulunun kban sas talun Israel. Fagayu ban at nadungug tuy maksvn nu kalimu.

¹² Nu ndasug ban ku nafalganan fag buknga, namafasludan au ku ngay nalong fag faurianan sas Eli ay sat ngay talananan.

¹³ Nalong kyangay sa anya te, gfaurianan kban at kalongan, aroro kanya nafabayan at ngay baguama nu gfakamulun at mauri.

¹⁴ Ay nafatuyan au te, kabavn ban we fanggalangun ya laman famalyam Eli ay at ngay kasugfunanan at ngay asalanan.”

¹⁵ Samwel ya nfulo yakmay anmenit, ay nu nfulo wan kanya naluang Yawi at bale sakbawan. Ay kanya kalimu nanlong sas Eli sabaliwa at taginfan.

¹⁶ Ay Eli guro anya te, “Munama.” Samwel gbalus te, “Nataw?”

¹⁷ Eli ginto te, “Nataw Yawi at nalong sa emu? Lag o gsuksuk angku. Maksvn ban Dius nu gfaurianan emu way o nafoyung sa angku fagayu at nalong.”

¹⁸ Ay Samwel nafoyung sas Eli Yawi at ngay nalong, ay we nasuksuk. Ay Eli nalong te, “Kanya wan Yawi; at namakamulun ban fia nusnga setaw at masine sit amatanganan.”

¹⁹ Samwel kaduge kagurang, Yawi gufud tua anya ay nafafasludan Samwel at ngay longan fagayu.

²⁰ Nu katanya, siginans Dan sitsigons Beerseba natoglag te, Samwel wan Yawi at taglong.

²¹ Ay Yawi gfataglayun gugat kasure sas Samwel sis Silu, ay sanya nu gfakamatoan gugat.