1 Samwel 12 - Fanawbuid tagsibaliwas Fakayabian

Samwel at ngay Longan Taguyan

¹ Samwel nalong sa sangay taw Israel te, “Nafafasludan kwan ay fagetun sa angku; nafili kwan Saul laman ban at nanfunan ayu.

² Katsi e fun wam laman at namangguna ayu. Katsi mafufuama kwan ay gubanun. Ay magamut tua ban am gugat ku ngay baguama. Ay siginan yay nu mabaguama au, nafangguna ktua ayu.

³ Katsi si au ay daga salubangan. Longi angku nu e nafakamulun kway sa ayu at mauri, ste sis Yawi ay at nafili fag fun at daga salubangan. O e nabul au ay ngay baka ay ay ngay asnu? O batang au kamuag ay gfabayan ayu? O ay batang au get sa ayu famayad laman gfae yud e masuad nusnga sinu si ayu at ke asalanan? Nu e nalag wayam ku nafakamulun takatanya fagayu, au waban tagfafasine.”

⁴ Ngay taw gbalus Samwel te, “Duan, di o batang kamuag ay gfabayan emi. Ay di o batang gbul em ngay fagagbilugun.”

⁵ Nu katanya, Samwel nalong sa sangay taw te, “Katsi fag menit, Yawi wan ay at nafili fag fun tagfatuyan te, kdi e nafakamulun sa ayu at mauri.” Ngay taw nabalus te, “Anud, Yawi wan tagfatuyan.”

⁶ Samwel nalong te, “Anud! Tagfatuyan Yawi wan at nafili Muisis ay Arun, ay sia yangay at nafaduksun ay ngay mangaguyang siginans talun Igiptu.

⁷ Katsi nanmalindug am sis Yawi at daga salubangan, ay namamatang au Yawi at nafakamulun sa ayu ay anggan sa ay ngay mangaguyang.

⁸ “Akub at kasugfunanan gina sis talun Igiptu kanya fagayu naet gubuk sas Yawi. Nu katanya, Yawi nasugu Muisis ay Arun, laman namaduksun ngay taw Israel siginans talun Igiptu, ay nataban anya fagayu stae fag talun.

⁹ Dewa katanya, kafag ngay taw nafamabo at Dius Yawi. Nu katanya, Yawi nafabayan kafag ngay taw nu gababawan sa sangay taw Filistia ay sas talun Muab at fun, ay sas Sisera, fun Kasur at fun tagfawayan.

¹⁰ Ay kafag ngay taw nadog yay naet gubuk sas Yawi ay glong te, ‘Yawi, anke asalanan ami. Nafamabo ami emu ay naseg ami Baal ay Asturet fag fagsegan. Katsi falangfei emi siginan em ngay fawayan, ay gseg ban mi emu.’

¹¹ Nu katanya, Yawi nasugu Gidyun, Barak, Efta ay anggan angku at namalangfe ayu siginan ay ngay fawayan tagsi ay ligung, laman gbanwan tuam manabayan.

¹² Dewa katanya, gina fun Nakas, talun Amun at fun namawayan ayu, naet am sa angku sik fun laman at nanfangguna ayu, dewa ay Dius Yawi tagfangguna ayu.

¹³ Ste wan katsi ay naet fag fun. Amatangani te, naet am anya sas Yawi, ay kanya nafon tua sa ayu.

¹⁴ Am ban ay anggan ay naet fag fun nu gsuyu tuam ay Dius Yawi, ay nu gfaning tua ban am anya ay nu ddi ban am nafamabo at suguan, ay nu gfakamulun tua ban am gugat kata at fakaylatun, di ban e kadasug sa ayu at mauri.

¹⁵ Dewa katanya, nu dway ban am gfaning Yawi at ngay suguan, kanya ban gfaurianan ayu, kata at nafakamulun sa ay ngay mangaguyang.

¹⁶ “Lag am glelegan siginan ay fagmalindugan, aroro Yawi namalag sa ayu at madulo fag ngay fakamulun.

¹⁷ Katsi fanggutluan trigu, ay nasaful wam te, katsi fag buknga di karak. Dewa katanya, gdarangin kro sas Yawi te, falingsii ay faraki laman lumag am te, se aksvn nu mauri ay nafakamulun sis Yawi at daga salubangan gina am get sik fun.”

¹⁸ Ay Samwel nadarangin ay ginanya yay fia fag menit nalingsi ay narak. Nu katanya, ngay taw anke fakalimuun maksvn sas Yawi ay sas Samwel.

¹⁹ Ay kanya fagayu nalong sas Samwel te, “Darangini sas Yawi am Dius, laman wa gfabul emi aroro anfamut em asalanan siginan nu get ami sik fun.”

²⁰ Samwel gbalus te, “Lag am kalimu, dewa am nafakamulun at mauri. Abat ngate am nantalyuyan Yawi, faningi tua ban gugat anya sas fagdaul ay amatanganan.

²¹ Lag am nanseg ngay fagsegan, kanya fagayu we tungkul. Ay we fanggubukun ay wa yangay mafalangfe ayu.

²² Yawi di gfabayan ayu, aroro kanya nafili tua ayu laman at ngay taw.

²³ “Ay gdarangin kban gugat ayu sas Yawi, aroro kway ban nafakamulun takatanya, umke asalanan kban sas Dius. Ay gfataglayun kban gfoyung sa ayu at matuyan fag ngay ugali.

²⁴ Nu katanya, suyui tua ban gugat Yawi, ay faningi anya sas fagdaul ay amatanganan. Amatangi tua ban gugat at ngay nafakamulun at maksvn nu madulo.

²⁵ Dewa katanya, nu gfataglayun way ban am gasalanan, umkamin ban am gasfuan ay naet fag fun.”