1 Samwel 11 - Fanawbuid tagsibaliwas Fakayabian

Saul Nagubuk Furuan Abes-Gilyad

¹ Ginanya, Nakas, talun Amun at fun, nalao sas furuan Abes-Gilyad gadgaloan at ngay tagfawayan laman namawayan. Ay furuan Abes-Gilyad at ngay taw nalong sas Nakas te, “Kawat watam sik nasadian ay namaning ban mi emu.”

² Ay Nakas gbalus te, “Kin, kaylat kwan, dewa katanya, e fagetun au sa ayu. Nanggulad kban at sadi ay mesa mata tagsi ay siun baliwa, laman ban fagdaul talun Israel umke fakaplaun.”

³ Ay furuan Abes-Gilyad at ngay fagtainan nalong te, “Fanyai yap fituk menit laman namasaful ami sas fagdaul talun Israel, kata am fagetun. Ay kanya ban fagayu nu dway kadasug laman nanggubuk emi, gfaning waban mi ayu.”

⁴ Ay sik ngay tagfosuk longan andasug sas furuan Gibya, Saul at fagbanwanan. Ay kafag ngay tagfosuk longan nafadungug sas fagayu taw Gibya Nakas at fagetun, ay fagayu taw gwayway.

⁵ Ginanya, Saul guli siginan at gamasun gtabanan at ngay baka. Ay kanya nu nadungug ngay taw nu gwayway, ginto te, “Nataw manga at kindasug? Wain ngay taw at fagwaywayun?” Ay kafag ngay tagfosuk longan nafoyung sas Saul Nakas at fagetun.

⁶ Ay Saul nu nadungug takatanya, Dius at Falad antayuk sa anya ay maksvn nu kadotama.

⁷ Ay kanya nanamul duak baka ay nafilas. Ay nasugu kafag ngay tagfosuk longan laman namuba ngay yamas ay nanlong sa sangay taw Israel te, “Nusnga sinu ban at yud nanangalo Saul ay Samwel sas fagawayanan, umkata yangay ban tuy fag ngay yamas.” Nu katanya, Yawi nafamatangan ngay taw Israel laman nangalo Saul.

⁸ Ay Saul nafaful ngay taw sis Besek: tagsiginans Israel tuluk sandank libuk taw ay tagsiginans Uda tuluk safuluk libuk taw.

⁹ Ay kanya fagayu nalong sa kafag ngay tagfosuk longan te, “Foyungi sa ay ngay kaiban te, ‘Balabag ban swabilug menit, kadasug ami laman nanggubuk ayu.’ ” Ay ngay taw Abes-Gilyad nu nadungug takatanya fag longan maksvn nu guseganan.

¹⁰ Ngay taw Abes-Gilyad nafasaful sa sangay taw Amun te, “Balabag ban gfababaun wami sa ayu ay fakamuluni waban kata ay fakaylatun sa emi.”

¹¹ Ay balabag di sdaga kamenit, Saul nafatuluk afud at ngay tagfawayan ay nu nmenit wan, kanya fagayu nafawayan ngay taw Amun sitsigons wabilug menit, ay ngayu at nafabul. Ay ngay taw Amun at ngay tagfawayan at sawad nalagyu wan.

¹² Nu ntabu wan nu gawayan, ngay taw Israel nainto sas Samwel te, “Sinu ebi at nafalingun Saul te, ay setain ban kanya nu mafalangfe antam? Tabani anya fagayu stae ay gfabul ami.”

¹³ Dewa katanya, Saul nafatuyanan te, “Siginan ngay katsi, nusdi sadi we kabul, aroro Yawi nafalangfe antam.”

¹⁴ Ay Samwel nalong sa sangay taw te, “Glao watam sas Gilgal laman gdog namasaful te, Saul tam fun.”

¹⁵ Nu katanya, kanya fagayu nalo sas Gilgal ay namatigwanan Saul sis Yawi at daga salubangan ay nafon at ngay fanggalangun laman sas fagmanabayanun, ay kanya fagayu anke fagmafulun daul.