1 Pedru 4 - Fanawbuid tagsibaliwas Fakayabian

At Bagu fag Ugali

¹ Dakngani tam Fun Isus at bilug nainkidapan wan, anggan am masine nu mafalganan am sas fagagwantanun. Aroro nusnga sinu at nagwantan sas fagidapun, kanya wa gugali ya sas asalanan.

² Ay kaduge gleleg wa gfaning ya at bilug at fakaylatun, nu bunway at fagfaningun Dius tua at fakaylatun.

³ Faragangi wan nu gfakamulun kata ebi ay fakamulun, kata ngay taw at yud natoglag Dius at fakaylatun gfakamulun: nu gfaning am ay bilug at fakaylatun, ay nu kamasaweun am nu guseganan am, ay nu glanguan am, ay nu gseg am at yud matuyan fag ngay fagsegan.

⁴ Ay at yud gafanud kadulo ayu te, wain ay fagyudun ya gfaning at yud masine fag ugali ay kanya fagayu gfalingun ayu.

⁵ Dewa katanya kanya ban fagayu nansalubang sas Dius, at nanginsaful ngay tagleleg ay ngay kinbul at asalanan.

⁶ Kanya wan at fagnafoyungun yay at Masine fag Barita dewa sat kinbul wan, laman kafag ngay taw dewa anbul wan kata tibak taw ste swa daga, at ngay falad gleleg tua ban kata Dius.

At Masine nu Galaga Dius at ngay Nafon

⁷ Fagayu nusnga setaw gakatabuun wan. Nu katanya, malukmei tua, ay kabavn famasinei ay amatanganan laman mafalganan tuam gdarangin.

⁸ Tagtungud sas fagayu, fagayu am matuyani tua nu kedkesugan am, aroro fagkedkesuganun kanya wan tagfalyam ngayuk asalanan.

⁹ Dangay fabulunan nu gfasakbo am ay ngay faduksay sa ay ngay bale.

¹⁰ Dakngani Dius nafatigwanan wan sas galay sadi antam at famonun, fakamuluni fia at nafon sa antam fag ngay fanambagun laman e tungkul tua sas fagayu taw.

¹¹ Nu sik tagfoyung o, famoyungi Dius at longan. Ay nu sik taggubuk o, agbilugi nu ggubuk o Dius at nafon emu fag fagmabitsugun, laman gfauseganan o anya sas fagayu am fakamulun siginans Isus tam Fun. Siwa anya fagmasineun ay fagmabalyananun kabavn ban. Anud.

Sik Tagafanud nu Gagwantan

¹² Ku ngay fakesugun ku ngay faduksay, lag am kadulo dewa am gdalan at maksvn fag famaskud, ay lag am gamatangan te, wa nangus katatuy at kindasug sa antam.

¹³ Nu bunway useganani yakman aroro kataip am sa tam Fun Isus at ngay naidapanan, ay gina ban at fagmasineun ansure, maksvn yangay ban nu guseganan am.

¹⁴ Ay nu e gfalingun ayu aroro sa tam Fun Isus, mauseganan am, aroro si tua ayu at Masine fag Falad tagsiginans Dius.

¹⁵ Ay nu e gfauri ayu, bunwa nangus te, aroro nafamabul am, ay nafangkamul am, ay nafakamulun am at mauri, ay nafasalag am ay iba at fakamulun.

¹⁶ Ay at fagfauriun ayu nu siginan tua ay fagafanudun sa tam Fun Isus, lag am kapla, nu bunway segi way tam Dius aroro nafangayan ayu te, Isus at taw.

¹⁷ Aroro munakbang wan Dius nu ginsaful taw at asalanan, ay gfasigad sat ngay taw. Ay nu gfasigad ban nu si way antam, tain ban at kumfasludan sat yud gfaning Dius at Masine fag Barita?

¹⁸ Kata sit Rirukan at foyungan te, “Sik matuyan fag taw nu maidap way nangalangfe, tain ya ro manga sik tagasalanan at yud natoglag Dius.”

¹⁹ Nu katanya, anggan am at ngay tagagwantan at maidap kata Dius at fakaylatun, fatigwanani ay sadili sas Dius, at Nawat ayu. Ay fataglayuni nu gfakamulun am at masine.