1 Pedru 3 - Fanawbuid tagsibaliwas Fakayabian

Suguan sa sangay Dadwa

¹ Am fag ngay mangena, faningi tua ay mesa mangama. Ay nusnga sinu fag mangama at yud yay gfaning Dius at longan, kanya ban matabanan yangay sas fagafanudun, aroro siginan ay ugali at masine, deyud ro am nalong sa anya.

² Aroro ay mangama nalag te, gsuyu tuam Dius ay gugali tuam at masine.

³ Ay fagfasineun dangay lang takalag, kata nu gfasine am ay buk, ay nu gsulun am gintu fag ngay baklo, ay at masine fag ngay lanbung.

⁴ Nu bunway ay fagfasineun tagsi tua ay basad ay ugali at yud e fakatabuan fag fagmasineun. Malukmei tua ay masuyui. Katanya at matuyan sas Dius.

⁵ Ebi fag ngay mangena tagafanud sas Dius, kata kanya at fagfasineun. Kanya fagayu gfaning tua at mesa mangama.

⁶ Katanya yangay Sara at nafakamulun. Kanya gfaning tua Abrayam, ay nafangayan anya te, at fun. Anggan am katap yangay am te, Sara at ngay sisian, nu gfakamulun tuam at matuyan, ay nu ddi am e fakalimuun nusnga setaw.

⁷ Ay am fag ngay mangama, afanyui tua fia ay mesa mangena, aroro kanya wa kabitsug ayu, ay kata yangay ayu namul leleg at yud e fakatabuan, Dius at famonun. Nu katanya tua ay fakamulun, di e gsalag ay darangin.

Gagwantan Aroro Gfakamulun at Matuyan

⁸ Katatuy taguyan ku suguan ayu: masadii tua, ay gudgubukani. Ay aroro sik ngay tagfaduksayan am, edkesugani tua, ay adkafanyuani, ay famababauni.

⁹ Nu e nafakamulun sa ayu at mauri, lag am gfasud. Lag am gfalingun tagfalingun ayu, nu bunway darangini way te, Dius nangus gfon sa anya at masine, dakngani am wan at nafili laman namul at masine.

¹⁰ Kata at Rirukan te, “Nusnga sinu takaylat fagmanabayanun ay fagelelegun, at leplep faragangi wan nu glong at mauri. Ay at fagfandayaun fag kamatoanan, saruyi way ay lag gfanlongan.

¹¹ Kabavn saruyi ay lag gdalan at mauri fag fakamulun, nu bunway ugatani tua banwani manabayan sas galay am at sadi.

¹² Tam Fun at fagdamaun at matuyan tua fag ngay taw, ay kanya masakit nu gdungug at ngay darangin. Dewa katanya, fagayu tagfakamulun at mauri, at fawayan way.”

¹³ We mafauri ayu nu maseganama tuam gfakamulun at masine.

¹⁴ Ay dewa e nafauri ayu aroro gfakamulun am at masine, mauseganan am. Lag am kalimu kafag ngay taw at ngay famalimuanan ay lag am gafanawa.

¹⁵ Amatangi tua gugat tam Fun Isus ay fagfausegananun ay ay fagfaningun. Kabavn mafalganani nu gfayamag am sas nusnga sinu fag taw taginto sa ayu sabaliwa ay fagsegun.

¹⁶ Malukmei fia ay masinei tua nu gfayamag am. Tuyani tua gugat te, diam gfakamulun at mauri, laman umkapla nusnga sinu takauri ay tagfalingun ay ugali at masine aroro gfaning am tam Fun Isus.

¹⁷ Nu Dius tua at fakaylatun, amasine yap tua nu gagwantan am at maidap aroro gfakamulun tuam at masine, nu gamut nu gagwantan am aroro gfakamulun am at mauri.

¹⁸ Aroro tam Fun Isus sayginan way kabul, laman sas fagayu taw at asalanan. Kanya dewa yud e asalanan anbul laman sa sangay taw at ke asalanan, laman gtaban antam sas Dius. E nafabul at bilug taw ay nadog yay naleleg sit falad,

¹⁹ ay kanya nalao ay nafoyung sa sangay falad at maubungan.

²⁰ Kanya fag ngay falad at yud nafaning gina Dius gfanya anya fagayu kaduge Nui kawat sakayan lino. Ay walu way ktaw at nasakbo sanya fag sakayan lino ay at kinlangfe sis mamam.

²¹ Kafag mamam sik fafaskudanan way nu kasurung am, ay at nafon ayu fakalangfeun siginan tam Fun Isus at nadogan naleleg. Fakasurungun bunwa famegus tam bilug at layungun, nu bunway sik fatuyanan way sas Dius te, di tam namakamulun nusnge wain at mauri.

²² Tam Fun Isus siwas banwa ay malunggung sis Dius at siun, ay gfunan at ngay tagbarita ay at ke ngay fagmabalyananun sis banwa.