1 Pedru 2 - Fanawbuid tagsibaliwas Fakayabian

¹ Nu katanya, ubuni wan ay fagmauriun ay fagfandayaun, ay fakamaninganun, ay fagfangalabianun, ay nu glong am at yud matuyan sabaliwa ay iba.

² Kata sik ngenge takaylat susu bilug at yud e suglat, am, aylati yangay fanfalad fag susu bilug, laman kagurang am sa ay fakalangfean.

³ Kata at foyungan sit Rirukan te, nafaskud wam tam Fun at fagmasineun.

⁴ Sia wan ngay taw at naukas fag Gang tagleleg, dewa katanya Dius nafili anya ay kanya mafanud sa anya. Gina am kakbang sa anya,

⁵ am takata yangay sik tagleleg fag ngay gang, Dius at fangawat laman umkawat sik fanfalad fag bale. Dius nafili ayu laman at ngay tagfon fanggalangun, ay gfon am sa anya fanfalad fag ngay fanggalangun, at maksvn nu maylat sa anya siginans Isus, Dius at nafili fag Fun.

⁶ Aroro kata Dius at Longan te, “Nafoli au sis Erusalem sik gang fagfatungkudan turuk, at mafilian ay at mafanud. Ay nusnga sinu tagafanud sa anya di ban umfangulan.”

⁷ Nu katanya, kafag gang mafanud tua sa ayu fag ngay tagafanud. Dewa katanya, umfasludan sa sangay yud gafanud, kata sis Rirukan te, “Ngay takawat bale at naukas fag gang, ansik fagfatungkudan turuk.”

⁸ Ay “Kanya sik fakataidan fag gang, tagfalub ban ngay taw.” Kanya fag ngay taw antaid aroro kamabo Dius at Longan. Katanya Dius at nafalganan sa anya fagayu.

⁹ Dewa katanya, am sik nafili tuam fag ngay taw, ay tam Fun tuam at ngay tagfon fanggalangun, ay sik furuan at mafasamanan laman sas Dius. Dius nafili ayu laman gfoyung am at nafakamulun fag ngay madulo. Ay nauro yangay ayu siginan sad fagmadulumun laman glo am sat fagmayamagun at maksvn nu madulo.

¹⁰ Ebi, bunwam Dius at ngay taw, dewa katanya, katsi am wan Dius at nafili. Ebi Dius wa kafanyu ayu, ay katsi kafanyu tua ayu.

¹¹ Ku fakesugun ku ngay faduksay, maksvn nu glong au sa ayu te, am takata sik ngay betaw tagbanwan ste swa daga, ubuni wan ay mauri fag fakaylatun tagfawayan ayu.

¹² Ugalii at matuyan si sangay taw at yud e fagafanudun, dewa kafag ngay taw gfantabugan te, mauri am. Ay kanya ban fagayu nu nalag ay fakamulun at masine, sumeg tam Dius gina ban kanya kadasug.

¹³ Aroro sa tam Fun, faningi tua fagayu taw at ke fagmabalyananun ste swa daga, takata tam funan daul,

¹⁴ ay anggan tam ngay funan ayu sirut. Dius nasugu kanya fagayu laman gfaurianan nusnga sinu tagfakamulun at mauri, ay gfauseganan nusnga sinu tagfakamulun at matuyan.

¹⁵ Aroro Dius kaylat at yud mamatanganan fag ngay taw nu ddi e fakamayudun sabaliwa ayu, siginan nu gfakamulun am at matuyan.

¹⁶ Am, nalfas tuam. Dewa katanya, ay nalfasan bunwa ay fanlonganan laman gfakamulun am at mauri. Nu bunway ugalii tua at masine aroro Dius am at ngay fagsuguan.

¹⁷ Masuyui tua sas fagayu taw ay esugi tua ay ngay faduksay sa tam Fun Isus. Aloi fia ay alimui tam Dius, ay suyui tam funan ste swa daga.

Faningi tam Fun Isus nu Gidapan

¹⁸ Am fag ngay fagsuguan, suyui tua ay faningi ay tagfayafun. Ay fagsuyuun, dangay lang at masine ay at malukme, nu bunway anggan tua tagfangadotama fag tagfayafun.

¹⁹ Masine nu gagwantan tuam ngay fagidapun dewa am yud e nafakamulun at mauri, aroro gfaning am Dius.

²⁰ Nu e asalanan way am, wa ban am kafoyung te, masine, dewa am nagwantan faurianan. Dewa katanya, dewa am e fagagwantanun faurianan, nu masine tua ay fakamulun, Dius gfauseganan ban ayu.

²¹ Matuyan, Dius nafili ayu laman gagwantan am, aroro tam Fun Isus naidapan laman sa ayu. At nafakamulun sik fagulitan, laman gfaning tuam anya.

²² Kanya wa batang e asalanan, ay di batang kamuag.

²³ Dewa e nafalingun anya, kanya wa nafasud. Ay dewa e nafaidapan anya, wa nafamalimu, nu bunway nafatigwanan tua at sadili sas Dius, at matuyan fag tagwabilug.

²⁴ Siginan at nabulanan sas fasulungan kayu, kanya nabuba wan tam ngay asalanan laman gubun watam ay gugali tua tam at matuyan. Anfia wam siginan at ngay fakarukan.

²⁵ Ebi kata am sik ngay tupa at malyaman, dewa katanya, kanya nafafoli yay ayu sa tam Fun Tagalaga ayu.