1 Kurintu 8 - Fanawbuid tagsibaliwas Fakayabian

Sik Fakonun at Nafon sat Yud Matuyan fag ngay Fagsegan

¹ Katatuy ku famayamag nu saman baliwas fakonun at nafon sat yud matuyan fag ngay fagsegan. Nasaful watam te, fagayu tam e fagsafulun watam. Ay kafag fagsafulun gbuba antam sas fakamatungudunun, ay dewa katanya, fakesugun gfaksvn tam fagafanudun.

² Sik taw nu gamatangan te, e fagsafulun, at matuyan, wa ngayu at fagsafulun.

³ Ay dewa katanya, Dius gtoglag fagayu takesug anya.

⁴ Nu katanya, sabaliwas fakonun at nafon sat yud matuyan fag ngay fagsegan, saful watam te, ngay fagsegan bunwa kanya at matuyan fag Dius, ay tam Dius sadi way.

⁵ Dewa e glong te, e ngay dius tagsis banwa ay ste swa daga, ay ngayuk dius ay ngayuk fun,

⁶ nu sa antam sadi way tam Dius tam Mama at nawat fagayu nusnge wain, ay gleleg tam laman gfaning tam anya. Ay sadi way tam Fun, Isus, ay siginan anya ankawat fagayu nusnge wain, ay siginan yangay anya tam fagelelegun.

⁷ Ay tibak tagafanud ya nasaful sabaliwa takatanya. Ay tiba ebi gseg at yud matuyan fag ngay fagsegan, ay gina kon, gamatangan yay te, kafag fakonun at fon sa sangay fagsegan. Ay aroro ya bangan e fagsafulun, kanya fagayu gamatangan te, e asalanan.

⁸ Bunwa fakonun at mafakbang antam sas Dius. Nu katanya, dewa tam naon, kanya wa gfauri antam, ay dewa tam yud naon, kanya wa gfafasine antam.

⁹ Ay baliwan dirii tua nu kon am nusnge wain fag fakonun, laman diam gfataid at momuy yay at fagafanudun.

¹⁰ Aroro o at ke fagsafulun, nu kon way o sis bale fagnansegan sat yud matuyan fag fagsegan, ay sik taw at momuy at fagafanudun nu nalag emu, kanya ro nangon yangay kata emu, kanya dewa gamatangan te, takatanya asalanan way.

¹¹ Takatanya am fakamulun, am fagsafulun gfauri am faduksay at mamomuy at fagafanudun, ay tam Fun Isus anbul yangay laman sa anya.

¹² Nu nafauri o am faduksay at mamomuy at fagafanudun, anke asalanan o sa tam Fun Isus.

¹³ Nu katanya, nu siginan way ku naon tagfae asalanan ku faduksay, kwa ban kon ya yamas laman kdi gfae asalanan anya.