1 Kurintu 6 - Fanawbuid tagsibaliwas Fakayabian

Nu Gfasine ngay Tagafanud at ngay Mamalong

¹ Am at sadi nu nke fakauriun way sat faduksay, wain kanya nu namauri fagsaun way at yud gafanud fag tagwabilug, abat ngate, sas Dius at ngay nafili.

² O nunda yam nasaful te, Dius wan at ngay nafili taginsaful fagayu taw ste swa daga te, o e asalanan? Ay nu katanya tua, wain ay fagyudun makatu gfasine at yud maksvn fag mamalong?

³ O nunda yam nasaful te, itam ban at nanginsaful ngay tagbarita te, o e asalanan? Nu katanya, kaugat waro nu mafasine tam katsi tam ngay mamalong.

⁴ Nu nke fagbadbaboanun am, wain nu namasine am fagsaun way ay fagyudun toglag fag tagwabilug?

⁵ Ida, aplai tua. O we taw ya si ayu at mamatanganan tagsaful gfasine ayu fag ngay tagafanud nu nke fagidapun am?

⁶ Ay am fag ngay tagafanud nu namasine am ay ngay fagidapun, sa way at yud gafanud.

⁷ Nu namasine am ay fagidapun nu sa way at yud gafanud fag tagwabilug, fagayu am nababawan wam. At masine nu gagwanta tuam dewa e gfauri ay e gdaya ayu.

⁸ Ay at maidap am yay tagfauri ay tagdaya ay faduksay.

⁹ O nunda yam nasaful te, ngay taw tagfakamulun at mauri wa ban umful sas Dius at fagfagtainanan? Lag am gdaya ay sadili. Aroro, ngay taw tagfanugtug tibama at mangena ay sat yud e mangama, ay tagseg at yud matuyan fag ngay fagsegan, ay tagfanugtug sat usama,

¹⁰ ay tagfangkamul, ay tagfanganuran, ay tagalangu gugat, ay tagfauri tibama, ay takamasing, fagayu tagfakamulun takatanya wa ban umful sas Dius at fagfagtainanan.

¹¹ Ay ebi si ayu e gfakamulun takatanya. Dewa katanya, Dius nafegus tua ayu, ay nafayud e malong, ay natap ayu kata nu yud am e asalanan, siginan tam Fun Isus at fagmabalyananun, ay siginans Dius at Masine fag Falad.

Ay Bilug wan Dius at Bale

¹² E glong te, “Masine kway gfakamulun nusnge wain.” Dewa katanya, bunwa fagayu at masine sa ayu. Ay kin, masine kway gfakamulun nusnge wain, dewa katanya, kwa gfabayan nu nangafagsuguan au anya fagayu.

¹³ Tibak taw glong te, “Tam fage ungdanun, kanya fagsuadan fakonun, ay fakonun, tam ungdan at bilug.” Matuyan kanya, ay dewa katanya, Dius ban gsud nangiklas kanya fag dua. Tam fage bilugun bundi sas fagfanugtugun, nu bunway laman namaning tua tam tam Fun, ay tam Fun taggubuk tam bilug.

¹⁴ Ay siginan at fagmabalyananun, kanya nafadog nafaleleg tam Fun, ay gfadog yangay ban gfaleleg anggan antam.

¹⁵ O nunda yam nasaful te, tam bilug sik afud yangay tam Fun Isus at bilug? O namul au tam Fun Isus at bilug sik afud laman namataladan au sa sik mangena takamatugtug? Ida, deyud.

¹⁶ O nunda yam nasaful te, at kinsadi sa sik mangena takamatugtug ansadi yangay anggan sat bilug? Aroro Dius at Rirukan nafoyung te, “Kafag dua ansadi wan.”

¹⁷ Ay nusnga sinu at kinsadi sa tam Fun, kanya masadi wan sas falad.

¹⁸ Lag am gfanugtug. Tibak asalanan, ngay taw at nafakamulun wa gtaip sat bilug, dewa katanya, nusnga sinu at nafanugtug, at sadili wa bilug at fagfauriun.

¹⁹ O nunda yam nasaful te, ay bilug wan at Masine fag Falad at bale? At Masine fag Falad tagbanwan si ayu, kanya siginans Dius. Ay bunwa am tagagbilug ay bilug,

²⁰ aroro kanya nabayad wan ayu yud e gtungud fag famayad. Nu katanya, fakamuluni at masine tagfauseganan Dius.