1 Kurintu 3 - Fanawbuid tagsibaliwas Fakayabian

Dius at ngay Fagsuguan

¹ Ku ngay faduksay, nu gfakamatoan au ayu, wa kata sas taw at ke Masine fag Falad, nu bunway kata way sas taw tagfaning at bilug at fakaylatun, ay kata sisian yay at fagafanudun sa tam Fun Isus.

² Ku fon ayu kata yay sik susu bilug, bunya at matugas fag fakonun, Aroro dasug katsi yam makatu kayamag at maidap katogdungug fag foyungan.

³ Aroro gfaning yayam ay bilug at fakaylatun. Gfangalabian yayam ay gawayan, takatanya ay fakamulun gfatuyan te, gfaning yayam ay bilug at fakaylatun ay fagdaul daga at ugali.

⁴ Tiba si ayu glong te, “Au gfaning au Pablu” ay tiba glong te, “Au gfaning au Apulus,” takatanya ay fakamulun gfatoglag te, gfaning yayam ste swa daga at taw at ugali.

⁵ Sinu nunda Apulus? Ay sinu au, Pablu? Ami, Dius waymi at fagsuguan, ay siginan emi nafanud am sa tam Fun Isus. Ay mesa ami gfakamulun tam Fun at nafatigwanan sa emi fag fakamulun.

⁶ Au at natanum, ay Apulus tagfarugme, ay Dius tagfatugbung ay tagfarabung.

⁷ At mafanud bundi tagtanum ay tagfarugme nu bunway Dius tua, aroro kanya tua tagfatugbung ay tagfarabung.

⁸ Tagtanum ay tagfarugme gsud tagfakamulun, ay Dius gfon ban sa anya fagdua at bulan kata at mesa nafakamulun.

⁹ Ami fagdua ggudgubukan ami gfakamulun, Dius at fakamulun. Ay am, Dius am at gamasun. Ay am yangay Dius at nafalindug fag bale.

¹⁰ Kata Dius at nafon sa angku fag fakamulun, au at naturuk kata sik tagsaful fia kawat bale. Ay tibak taw at nafataglayun kawat kafag bale. Ay dewa katanya, nusnga sinu takawat kafag bale, dangay glamlamangan.

¹¹ Aroro we masine ya nanturuk tibak turuk sas day at kinturuk wan, at masuad te, Isus, Dius at nafili fag Fun.

¹² Tibak taw nu kawat kanya fag fagfatungkudan turuk, at fangawat saman wa saman, kata gintu, sanbung salapi ay at mafanud ayu daul fag ngay gang. Ay tibak taw at fangawat, kayu way ay makmak kinyango ay nagutan.

¹³ Ay galay sik takawat at nafakamulun kasure ban gina fanginsafulan asalanan fag menit. Ay ginanya ban, afuy gfasure ay gfaskud galay at sadi at nafakamulun.

¹⁴ Ay nusnga sinu fag taw at nawat nu ddi nirug, kanya ban fag takawat mul tua Dius at fon laman sa anya.

¹⁵ Ay kanya fag taw at awatan nu nirug way ban, kanya ban we bulan. Dewa katanya, kanya ban umlangfe yay, ay kata way ban nu nlangfe siginan sad afuy.

¹⁶ O yam nasaful te, am wan Dius at bale, ay at Masine fag Falad gbanwan si ayu?

¹⁷ Dius gfaurianan ban tagfauri at bale, aroro at bale di e malong, ay am wan kafag bale.

¹⁸ Nusnga sinu lag gdaya at sadili. Sik taw nu gamatangan te, e fagmamatanganun au kata tagste swa daga at fagmamatanganun, tapi at sadili te, yud e fagsafulun, laman ban at fagmamatanganun sik matuyan tua fia.

¹⁹ Aroro nu sas Dius at daga salubangan, we tungkul tagste swa daga fag fagmamatanganun, kata at Rirukan te, “Dius ban gyukfu at mamatanganan fag ngay taw gina gfandaya.”

²⁰ Katanya yangay, “Tam Fun saful te, we tungkul at mamatanganan fag ngay taw at amatanganan.”

²¹ Nu katanya, lag am kamatungudun sas nusnga sinu fag taw at nafakamulun, aroro Dius nafon wan sa ayu nusnga setaw.

²² Dewa au, ay Apulus ay Pedru ay fagayu tagste swa daga, anggan leleg ay fakabulun ay dewa katsi fia ay takadasug ban. Am wan tagagbilug kanya fagayu.

²³ Tam Fun Isus tagagbilug ayu, ay Dius tagagbilug tam Fun Isus.