1 Kurintu 12 - Fanawbuid tagsibaliwas Fakayabian

At Masine fag Falad at ngay Nafon

¹ Ku ngay faduksay, katsi kaylat au nu nyamag am fia sabaliwa at Masine fag Falad at ngay nafon.

² Saful wam te, ebi gina am yud gafanud, gafaylatan am laman nanseg am sat yud maringang fag ngay fagsegan.

³ Nu katanya, gfasaful au sa ayu te, Dius at Masine fag Falad nu gbanwan tua sas nusnga sinu fag taw, kanya fag taw di glong te, “Fagumfaurianan Isus.” Ay at Masine fag Falad nu dway nafamatanganan sik taw, kanya wa malong te, “Isus tam Fun.”

⁴ At ngay famonun saman wa saman, ay dewa katanya, sadi wayk Falad at nafon kanya fagayu.

⁵ Saman wa samank balyawvtan galay sik taw nu gfaning Dius, dewa katanya sadi way tam fagfaningan fag Fun.

⁶ Dius at fon sa antam fag ngay fakamulun saman wa saman, ay dewa katanya sadi way tam Dius tagfafakamulun antam.

⁷ Dius gfasure at Masine fag Falad sas galay antam at sadi, laman fagayu tagafanud e fagmakatuun tua ggudgubukan.

⁸ At Masine fag Falad at nafon sa sik taw fagmakatuun gfoyung sabaliwas fagsafulun, ay at Masine fag Falad nafon sa sik taw fagmakatuun laman saful kayamag sa baliwa kafag fagsafulun.

⁹ Ay at Masine fag Falad nafon sa sik taw at maksvn fag fagafanudun, ay nafon sa tibak taw fagmabalyananun gfafia at ke ngay fakasaitun.

¹⁰ Ay nafon sa tibak taw fagmakatuun gfakamulun at madulo, ay sa tibak taw fagmakatuun gfayamag Dius at longan. Ay nafon yangay sa tibak taw fagmakatuun laman gtoglag te, o tagsi anya fag falad siginan at Masine fag Falad ay o mannga siginan way at mauri fag falad. Ay nafon sa tibak taw fagmakatuun garingang sat fagyudun togdungug fag fangaringang, ay nafon sa tibak taw at fagmakatuun gfayamag kafag ngay fangaringang at masuad.

¹¹ Ay dewa katanya sadi wayk Falad tagfafakamulun anya fagayu, ay kanya nafon sas galay at sadi gfaning at fakaylatun.

Sik Bilug Ngayu at Afud

¹² Tam bilug sadi way, ay ngayu at afud. Ay fagayu at afud, ansadi sa sik bilug. Ay katanya yangay tam Fun Isus at bilug.

¹³ Aroro fagayu tam dewa taw Udyu ay taw Gresya, ay sik fagsuguan ay yud fagsuguan, ansurung tam laman masadi tam sa sik bilug. Ay sadi wayk Falad Dius at nafasakbo sa antam fagayu.

¹⁴ Aroro sik bilug dewa sadi, ngayu tua at afud.

¹⁵ Ay darafa nu nalong te, “Bunwa au daluap, nu katanya, bunwa au sik afud bilug,” bunwa at masuad te, kanya bunwa ya sik afud bilug.

¹⁶ Ay talinga nu nalong te, “Bunwa au mata, nu katanya, bunwa au sik afud bilug,” bunwa at masuad te, kanya bunwa ya sik afud bilug.

¹⁷ Ay fagayu ro at afud bilug nu mata way lang, tain ro kanya nu gdungug? Ay fagayu ro at afud bilug nu talinga way lang, tain ro kanya nu mayuk?

¹⁸ Dius nawat tam ngay afud bilug kata at fakaylatun.

¹⁹ Ay sik taw at bilug nu sadi way at afud, setain ro kanya nu kangayan te, sik bilug?

²⁰ Ay at matuyan, sik bilug ngayu at afud.

²¹ Nu katanya, mata wa malong sas daluap te, “Wo e tungkul sa angku.” Ay alfuyu wa yangay malong sas darafa te, “Wo e tungkul sa angku.”

²² At matuyan, tam ngay afud bilug at mamomuy, kanya tua ngap karo fia tam fakaylatun.

²³ Ay tam bilug at afud yud bangan mafanud kanya tua ngap karo fia tam fagdiriun. Ay at mapla fag ngay afud kanya tua fia tam fagfasuksukun.

²⁴ Ay tam afud bilug at masine wan wa fagfasineun ya. Ay Dius gfasine tam ngay afud bilug at yud bangan masine laman kaugat yay nu masine,

²⁵ laman fagayu afud bilug wa gawayan, nu bunway kedkesugan tua.

²⁶ Aroro sik afud bilug nu e fakasaitun way, fagayu e fakasaitun yangay, ay sik afud bilug nu guseganan tua, fagayu afud guseganan yangay.

²⁷ Ay am wan tam Fun Isus at bilug. Ay galay am at sadi tam Fun Isus am at afud.

²⁸ Tam Dius nafili tibak taw sit furuan, taguna at ngay nasugu, fadua tagfasaful Dius at ngay longan, ay at fatulu, takamoyung. Ay nafili yangay ngay tagfakamulun at ngay madulo, ay tiba at ke fagmabalyananun gfafia at ke ngay fakasaitun, ay tiba taggubuk, ay tiba tagfangguna, ay tiba tagsaful garingang at fagyudun togdungug fag ngay fangaringang.

²⁹ Bunwa fagayu taw sik nasugu, ay sik tagfasaful Dius at ngay longan, ay sik takamoyung, ay bunwa sas fagayu taw nu gfon fagmakatuun gfakamulun at ngay madulo.

³⁰ Bunwa fagayu taw tagfafia at ke ngay fakasaitun, ay bunwa fagayu tagsaful garingang at fagyudun togdungug fag ngay fangaringang, ay bunwa fagayu taw at mafayamag kafag ngay fangaringang.

³¹ Dewa katanya, ugatani laman mabul tuam tiba tungud fag ngay famonun. Ay katsi namoyung au sa ayu tagtungud sas fagayu nu masine.