1 Krunika 5 - Fanawbuid tagsibaliwas Fakayabian

Rubin at Kasugfunanan

¹ Rubin, Israel at ngay baguama at kaka, kanya nafataladan at sadi at mama at mangena. Nu katanya, at fagmakakaun anfon sat faduksay Use at ngay baguama. Ay aroro katanya, bunwa Rubin at kinriruk laman kafag kasugfunanan at kaka.

² Uda dewa amabalyanan yap tua at ngay faduksay ay dewa siginan at kasugfunanan tagfangguna at ngay gaban, at fagmakakaun nafon way sas Use.

³ Kayu tuy Rubin, Israel at baguama at ngay baguama: Anuk, Palu, Kesrun ay Karmi.

⁴ Uel at ngay gaban: Semaya, Gug, Simei,

⁵ Mikas, Reaya, Baal,

⁶ ay Beera. Beera tagfangguna Rubin at kasugfunanan gina Tiglat-Pileser, Asirya at fun nataban anya fagayu.

⁷ Kayu tuy Bera at ngay kalongan kinriruk sat ngay kasugfunanan at fagrirukan kata at gaban, Eyel fag tagfangguna ay Sakaryas,

⁸ Bela, Asas at baguama, ay Asas, Sema at baguama ay Uel at fufu. Kayu tuy Rubin at kasugfunanan tagbanwan siginans Aruer sitsigons Nebu ay Baal-Meun.

⁹ Ay aroro ankayu at ngay fagbaugun gina sis Gilyad, kanya fagayu nu gbanwan andugdug sas fakamenitan baliwa munakbang sis talun at yud e taw sabaliwas Liskung Eufrates.

¹⁰ Ay gina yay Saul at fun, kanya fagayu nanamawayan ngay taw Agri ay nababo. Ay kanya fagayu nagbilug ngay taw Agri at fagbanwanan fagdaul sis fakamenitan baliwa talun Gilyad.

Gad at Kasugfunanan

¹¹ Gad at kasugfunanan nabanwan sis Basan, munakbang sis Rubin at gaban at fagbanwanan ay sitsigons Saleka.

¹² Gad at kasugfunanan: Uel, kanya tagfangguna sis Basan, at fadogan Safam, Anay ay Safat.

¹³ At ngay tagfangguna galay at gaban: Mikael, Mesulam, Syeba, Uray, Akan, Sia ay Eber.

¹⁴ Kanya fagayu Abyail, Kuri at baguama at ngay gaban. Kuri, Arwa at baguama, Gilyad at fufu ay Mikael at fufu tud. Mikael, Esisay at baguama ay Adu at fufu ay Bus at fufu tud.

¹⁵ Aki, Abdyel at baguama ay Guni at fufu, tagfangguna at talanan.

¹⁶ Ay kanya fagayu nabanwan sis Gilyad sis Basan ay sa sangay furuan sit ligung ay sas fagdaul datag Sarun.

¹⁷ Ay at gaban anriruk sit fagrirukan ngay gaban, gina Utam gfunan sis Uda ay gina Erubuam gfunan sis Israel.

¹⁸ Ufatk safulu e ufatk libu, fituk sandan unumk safuluk tagfawayan siginans Rubin ay Gad ay Manase fag wabilug kasugfunanan. Kanya fagayu mafananadan laman sas awayan ay saful gagbilug ngay famalabag, ngay fiso ay ngay godun.

¹⁹ Ay kanya fagayu nanamawayan ngay taw Agri, taw Etur, taw Nafis, ay taw Nudab.

²⁰ Ay gina gfawayan, kanya fagayu naet gubuk sas Dius, ay Dius nabalus tua at darangin aroro kanya fagayu e fagafanudun tua. Nu katanya, Dius nafababo anya fagayu sa sangay taw Agri ay sa tiba ya at ngay fawayan.

²¹ Ay kanya fagayu nabul ngay taw Agar at ngay fagbaugun, limak safuluk libuk kamelyu, duak sandan limak safuluk libuk tupa ay duak libuk asnu. Ay kanya fagayu nataban yangay sadik sandank libuk taw,

²² ay ngayu at nafabul aroro Dius nagubuk anya fagayu gina gfawayan. Ay kanya fagayu nabanwan sanya fag ngay furuan yakmay tibak talun nababo ay nataban anya fagayu.

Manase fag Wabilug Kasugfunanan

²³ Manase fag wabilug kasugfunanan ngayu tua. Ay kanya fagayu nabanwan sis talun siginans Basan sitsigons Baal-Ermun, ay Senir (at ngayan yangay te, Buksul Ermun.)

²⁴ Ay tagfangguna at ngay talanan: Efer, Isi, Elyel, Asriel, Eremyas, Udabya ay Adyel. Kanya fagayu at maseganama fag ngay tagfawayan ay sik takadungug fag ngay tagfangguna at ngay talanan.

²⁵ Dewa katanya, kanya fagayu wa namatuyan sat ngay mangaguyang at Dius, abat ngate, naseg way at ngay nafabul fag ngay taw at ngay fagsegan.

²⁶ Nu katanya, Israel at Dius naylat Pul (at ngayan yangay te, Tiglat-Pileser), Asirya at fun, nu namawayan kanya fagayu. Ay fun Pul nataban Rubin ay Gad, ay Manase fag wabilug kasugfunanan, ay nataban sas Kalak, sas Kabur, sas Ara ay sas day Liskung Gusan, ay dasug katsi kanya fagayu gbanwan sanya.