1 Krunika 29 - Fanawbuid tagsibaliwas Fakayabian

Ngay Famonun laman Famawat Yawi at Bale

¹ Ay sanya ginan, fun Dabid nalong sas fagayu taw Israel te, “Dius nafili ku baguama Sulumun, ay kanya mabaguama yay ay ye nagdalanan. Maksvn tuy fag fakamulun aroro at fagnamawatun fag bale bundi sas taw, sa tua tam Dius Yawi.

² Nafakamulun au fagayu laman gfalganan at ngay fangawat sa ku Dius at bale kata gintu, salapi, tansu, sanbung, kayu, gang at mafanud nu kabayad ay tiba yak mafanud fag ngay gang ay ngay gang tagridrirukun, ay ngayuk gang malaksi.

³ Ay aroro kaylat au namawat ku Dius at bale, gfon kwan ku ngay fagagbilugun at mawatan siginans gintu ay salapi, saman ya ku nafaful fag ngay fangawat laman sas Dius at bale.

⁴ Ay ku fagnamonun sandank libuk fabudbungguan gintu tagsiginans Ufir, ay duak sandan limak safuluk libuk fabudbungguan sanbung salapi. Kanya ban fagayu famadalusan sa sangay dingding,

⁵ ay tiba yak fagagbilugun ngay takawat at fagnangawatun yay. Katsi sinu takaylat yangay gfon takatanya fagayu sas Yawi?”

⁶ Sanya ginan, ngay tagfangguna talanan, ay ngay tagfangguna ngay taw Israel at kasugfunanan, ay ngay tagfangguna tagfawayan, ay at fagfatigwanan fag ngay tagfangguna fun at ngay fakamulun, nafon yud fabulunan.

⁷ Kanya fagayu nafon sadik sandan fituk safulu e limak libuk fabudbungguan gintu, safuluk libuk famayad at mawatan siginans gintu, tuluk sandan limak safuluk libuk fabudbungguan salapi, unumk sandan tuluk safuluk libuk fabudbungguan tansu, ay tuluk libu limak sandank libuk fabudbungguan sanbung.

⁸ Ay e nafon yangay at mabyat nu kabayad fag ngay gang, ay kanya nafasakbo sas fagfungsuan sis Yawi at bale. Ay tagulit kanya fagayu, Eyel tagsiginans Gersun at gaban.

⁹ Ngay taw nauseganan at ngay tagfangguna aroro nu gfon sas Yawi di gafabulunan. Ay fun Dabid maksvn yangay nu guseganan.

Dabid at Darangin

¹⁰ Dabid nafauseganan Yawi sis salubangan ngay taw. Glong te, “Yawi, em mangaguyang Akub at Dius, o way lang em fagfausegananun kabavn!

¹¹ “Yawi, o wan at fun sas fagayu nusnge wain, ay at mabalyanan, ay sik fagsuyuun tagtungud sas fagayu, ay at mauseganan! Aroro o way tagagbilug fagayu tagsis banwa ay tagsis daga.

¹² Siginan emu fagmaramramanun ay famauseganan ay gfunan o fagayu nusnge wain. Mabalyanan o ay o wan tagfabitsug ay tagfon fagmabalyananun sas nusnga sinu.

¹³ “Em Dius, katsi gfauseganan ami ay gfabat am ngayan at mauseganan fag fagsuyuun.

¹⁴ Dewa katanya, sinu au ay ku ngay taw laman namon ami sa emu takayu tuy fag fanggalangun? Fagayu nusnge wain siginan emu, ay gfafoli ami sa emu am nafon sa emi.

¹⁵ Yawi, nasaful wo te, betaw way mi ste swa daga, kata em ngay mangaguyang. Nu katanya, em leleg kalyam way kata sik aninu.

¹⁶ “Yawi, em Dius, siginan way emu fagayu em fon laman famawat am bale, laman famauseganan am ngayan at yud e malong. O way tagagbilug kanya fagayu!

¹⁷ Ku Dius, nasaful au te, nainsaful o em ngay amatanganan ay guseganan o nu nalag o te, matuyan tuami. Nu katanya, matuyan ay bundi fabulunan nu gfon au sa emu tuy fagayu. Ay guseganan au aroro nalag au te, anggan am ngay taw tagste di gafabulunan nu gfon.

¹⁸ “Yawi, em mangaguyang Abrayam, Isak ay Akub at Dius, fasii ban nangus gugat am ngay taw at amatanganan at mafamaning, ay gubuki anya fagayu laman matuyan tua ban gugat sa emu.

¹⁹ Ay gubuki yangay ku baguama Sulumun laman kaugat yay nu matuyan ay nu gfaning am ngay suguan, ay am ngay foyungan, ay am ngay faugali ay nu gfakamulun fagayu laman gfawat am Bale ku nafalganan.”

²⁰ Sanya ginan, Dabid nalong sas fagayu taw te, “Fauseganani ay Dius Yawi.” Nu katanya, ngay taw nafauseganan Yawi at ngay mangaguyang at Dius. Kanya fagayu natudan ay namalub laman gfauseganan Yawi, ay at fun.

Nu Gtoglag Sulumun laman sik Fun

²¹ Ay balabag di, kanya fagayu nafon at ngay fagirugun fag fanggalangun sas Yawi: sadik libuk tumad baka tama, sadik libuk tama tupa, ay sadik libuk riangan tupa. Ay nafon yangay ngay fanginum fag fanggalangun, ay tiba yak fanggalangun laman sa sangay taw Israel.

²² Ay ginanya fag menit kanya fagayu maful guseganan gfangon ay gmamaman sis Yawi at daga salubangan. Ay sanya ginan, kanya fagayu gdog yay gfoyung te, Sulumun, Dabid at baguama, sik fun ay naugwag sas Sulumun langis sis Yawi at daga salubangan laman sik fun, katanya yangay at nafakamulun sas Saduk laman sik tagfon fanggalangun.

²³ Nu katanya, Sulumun namalunggung sis Yawi at faglunggungan laman sik fun, fantubus at mama Dabid. Ay Sulumun anke ramraman, ay fagayu taw Israel nafaning Sulumun.

²⁴ Ay fagayu tagfangguna ay ngay taw ke fagmabalyananun ay anggan fun Dabid at ngay baguama nafatuyanan te, namaning ban fun Sulumun.

²⁵ Yawi nafasik takadungug Sulumun sas fagdaul talun Israel ay nafon famauseganan, tibak fun sis Israel at yud nadalan.

Dabid nu Kabul

^26-27 Dabid, Ese at baguama, nafunan Israel at kadugean ufatk safuluk banwa; fituk banwa sis Kebrun ay tuluk safulu e tuluk banwa sis Erusalem.

²⁸ Kanya ngaduge tua nu gleleg, ay maramraman ay sik fagsuyuun, ay nu kabul mafufuama wan. Ay at baguama Sulumun at natubus anya laman sik fun.

²⁹ Ay fansulitan sabaliwa fun Dabid nu gfunan, siginan nu gfasigad sitsigons fakatabuan, marirukan sis ngay taglong Samwel, Natan, ay Gad at fagrirukan.

³⁰ Ay anriruk sa kafag ngay taglong at fagrirukan nu setain nu gfunan ay nu se aksvn nu mabalyanan, nu setain fagayu at kinfasludan sa anya ay sas Israel, ay sat ngay tagligung si anya fag ngay fagfagtainanan.