1 Krunika 26 - Fanawbuid tagsibaliwas Fakayabian

Tagulit Yawi at Sakbawan Bale

¹ Tuy fag gaban tagulit Yawi at sakbawan bale: siginans Kura at talanan, Meselemya, Kuri at baguama ay siginans Asaf fag talanan,

² ay at baguama fag fitu: at kaka Sakaryas, ay at fadogan Edyael, Sebadya, Atniel,

³ Elam, Eukanan, ay Elyeuenay.

⁴ Ay at fadogan Ubed-Edum ay at baguama fag walu: at kaka Semaya, ay at fadogan Eusabad, Ua, Sakar, Netanel,

⁵ Amyel, Isakar, ay Peuletay. Ay Dius nafon nusnge wain sas Ubed-Edum.

^6-7 Ay Semaya, Ubed-Edum at baguama, e ngay baguama yangay tagsaful gfangguna at talanan, ay sik fagsuyuun. At ngay baguama: Utni, Refael, Ubed, ay Elsabad. Ay at kalongan Elyu ay Semakya ay kanya fag dua e fagmakatuun yangay.

⁸ Kanya fagayu siginans Ubed-Edum at gaban. Kanya fagayu ay at ngay baguama ay anggan at ngay kalongan fag unumk safulu e dua, e fagsafulun ay e fagmakatuun gfakamulun.

⁹ Ay anggan Meselemya at ngay baguama fag labi walu ay at ngay kalongan e fagmakatuun yangay.

¹⁰ Kusa tagsiginans Merari at gaban e ngay baguama yangay. Ay nafili Simri laman tagfangguna at talanan dewa yud sia at kaka.

¹¹ Ay at natubus Simri: Kilkya, Tebalya ay Sakaryas. Ay Kusa at baguama ay at ngay kalongan labi tulu ay kanya fagayu tagulit Yawi at sakbawan bale.

¹² Ay nafud ngay tagulit Yawi at sakbawan bale siginan sangay tagfangguna at ngay talanan. Ay kanya fagayu e ngay fanambagun gfakamulun sas Yawi at bale kata at fadgaloan fag ngay taw Lebi.

¹³ Ay kanya fagayu nainsaful te, inda fag sakbawan at mesa talanan nu gulit dewa at masisian ay at mafagtainan.

¹⁴ Ay nafili Selemya tagulit tagsis fakamenitan fag sakbawan, ay at baguama Sakaryas tagsaful gfangatulun tagulit sakbawan tagsis fawalan fag alvngvdan.

¹⁵ Ay nafili Ubed-Edum laman tagulit sakbawan tagsis fasiunan fag alvngvdan, ay nafatigwanan sat ngay baguama ngay fagfungsuan nusnge wain.

¹⁶ Ay nafili Supim ay Kusa laman tagulit sakbawan tagsis fakayabian, ay anggan sakbawan tagundaud sas Yawi at bale, galay at sadi e buknga nangulit.

¹⁷ Ay kayu menit, unum tagulit sis fakamenitan fag sakbawan, ay tagsis fawalan fag alvngvdan sakbawan ufat, ay ufat yangay tagsis fasiunan fag alvngvdan sakbawan. Ay dua tagalaga galay sik fagfungsuan.

¹⁸ Ay tagsis fawalan fag alvngvdan sakbawan ufat tagulit, ay ufat yangay tagulit sis dalan tagundaud sas Yawi at bale, ay dua yangay tagulit sis Yawi at bale at ubung alad.

¹⁹ Kanya Kura ay Merari at ngay gaban tagulit Yawi at sakbawan bale.

Ngay Tagalaga Ramraman ay Tiba Yak Tagfangguna

²⁰ Ay Akya at fagfanggunaun fag ngay taw Lebi, at fagfatigwanan laman galaga ngay fagfungsuan ramraman sis Dius at bale, ay kanya yangay fagayu tagulit fagfungsuan ngay fanggalangun sas Dius.

²¹ Ladan siginan Gersun at gaban, ay Eyeli at mama. Tiba sit talanan gfangguna yangay at ngay gaban.

²² Eyeli at ngay baguama: Setam ay Uel, at fagfatigwanan laman tagalaga ngay fagfungsuan ramraman sis Yawi at bale.

²³ Kayu tuy ngay tagfangguna tagsiginans Amram, Isar, Kebrun ay Usyel at ngay gaban. Tagsiginans Amram at gaban:

²⁴ Sebwel, tagsiginans Gersum at gaban ay Muisis at baguama, ngay fun tagfangguna si sangay fagfungsuan ramraman sis Yawi at bale.

²⁵ Ay at ngay kalongan sis Elyeser at gaban: Rekabya, Esaya, Uram, Sikri ay Selumit.

²⁶ Selumit ay at ngay kalongan at fagfatigwanan fagfungsuan ngay famonun siginans fun Dabid gasfuan ngay tagfangguna ngay talanan, ngay tagfangguna ngay tagfawayan, ay tiba yak tagfangguna.

²⁷ Ay kanya fagayu nafon laman at fanggalangun at nabul siginans awayan, laman gagbilug sas Yawi at bale.

²⁸ Selumit yangay ay at ngay kalongan tagalaga Samwel fag taglong, Saul, Kis at baguama, Abner, Ner at baguama, ay Uab, Seruya at baguama at ngay fanggalangun. Ay kanya yangay fagayu tagalaga tibak fanggalangun.

²⁹ Ay siginan Isar at ngay gaban: Kenanya ay at ngay baguama, kanya fagayu tagfakamulun ay ngay tagwabilug sas fagdaul talun Israel. Kanya fagayu nu gfakamulun wa gfakamulun sis Yawi at bale.

³⁰ Ay siginans Kebrun at gaban, Kasabya ay at ngay kalongan fag sik libu fituk sandan, at ke ngay fagmakatuun, nafatigwanan sa anya fagayu tagfangguna ngay talun sis Liskung Urdan sfakayabian baliwa. Ay kanya fagayu tagfakamulun laman sas Yawi, ay sanya fag talun at fun.

³¹ Ay Erya tagfangguna Kebrun at gaban kata at marirukan sit ngay talananan. Ay gina sis faufatk safuluk banwa Dabid nu gfunan, nainsaful ngay fagrirukan ay nasaful te, Kebrun e gaban sis Aser, sis talun Gilyad ay kanya fagayu e fagmakatuun.

³² Ay Erya at kalongan at ke ngay fagmakatuun ay tagfangguna at ngay talanan, duak libu fituk sandan. Ay sawa anya fun Dabid at fagfatigwanan laman gfangguna Rubin, Gad ay Manase fag wabilug kasugfunanan. Kanya fagayu tagfangguna sa sangay fakamulun laman sas Dius ay sas fun sanya fag talun.