1 Krunika 18 - Fanawbuid tagsibaliwas Fakayabian

Dabid nu Gbabo

¹ Abandi, Dabid nababo ay nagbilug ngay taw Filistia ay naago siginan kafag ngay taw at furuan Gat ay anggan tagsit ligung fag ngay furuan.

² Ay Dabid nababo yangay ngay taw Muab, ay kanya fagayu nafon famayad sa anya.

³ Ay Dabid nafawayan yangay Adadeser, talun Suba at fun sitsigons furuan Kamat. Ginanya, fun Adadeser glao laman nangagbilug nusnge wain at munakbang sis Liskung Eufrates.

⁴ Dabid ay at ngay tagfawayan naago fun Adadeser at faguyudan sadik libu, ay fituk libuk tagsaful gsakay sis faguyudan, ay duak safuluk libuk tagfawayan. Dabid ay at ngay tagfawayan nafaalbi ngay kabayu tagguyudan ngay faguyudan, ay nafasawad yay sadik sandank kabayu laman at sakayan.

⁵ Ngay taw Aram nu ndasug siginans Damasku laman nanggubuk fun Adadeser, Dabid ay at ngay tagfawayan nafabul duak safulu e duak libuk tagfawayan.

⁶ Ay Dabid nafawat at fagmafulan sis Damasku, si sangay taw Aram at fagbanwanan. Ay Dabid nagbilug wan kafag furuan, ay sanya ginan ngay taw Amur nu gfon at famayad sawas Dabid. Yawi nafababo Dabid sas fagayu at nafawayan.

⁷ Dabid nabul siginans fun Adadeser at ngay fagsuguan at ngay famalabag at mawatan siginans gintu, ay nabuba sas Erusalem.

⁸ Ay kanya nabul yangay ngayuk tansu siginans furuan Tibka ay Kun, sis fun Adadeser at fagagbilugun fag ngay furuan. Ay abandi, Sulumun nafawat siginan kafag ngay tansu tagbia fag fagfegusan at nafangayan te, Dagat, anggan ngay turuk ay ngay fagagbilugun mawatan tansu laman at fagagbilugun sis Yawi at bale.

⁹ Ay Tou, talun Amat at fun nu nadungug te, Dabid nababo Adadeser, talun Suba at fun at ngay tagfawayan,

¹⁰ kanya nasugu at baguama Aduram sas fun Dabid laman namauseganan anya at nababoan Adadeser. (Siginan ebi, fun Tou ay Adadeser gawayan way.) Ay Aduram nabuba sik ngay famonun at mawatan siginans ngay sanbung salapi, ay gintu ay tansu.

¹¹ Ay fun Dabid nafon sas Yawi kanya fag ngay fagagbilugun laman at fanggalangun kata at nafakamulun sa sangay sanbung salapi ay gintu at naago siginan sangay talun Edum, Muab, Amun, Filistia ay Amalek.

¹² Ay Abisay, Seruya at baguama nafabul labi waluk libuk taw Edum sis datag Barara.

¹³ Ay Dabid nafawat sik ngay fagmafulan sis talun Edum laman sat ngay tagfawayan ay nafagsuguan fagayu taw Edum. Dewa nday Dabid nu gfawayan, Yawi gfababo tua anya.

Dabid at ngay Tagfangguna

¹⁴ Dabid nafunan fagdaul talun Israel, ay nafakamulun at matuyan ay at maylat sas fagayu taw.

¹⁵ Uab, Seruya at baguama, tagfangguna ngay tagfawayan. Ay Eusafat, Akilud at baguama tagalaga ngay rirukan sit fagfagtainanan.

¹⁶ Ay Saduk, Akitub at baguama ay Abimelek, Abyatar at baguama, at ngay tagfon fanggalangun, ay Sabsa at tagriruk.

¹⁷ Ay Benaya, Euyada at baguama, tagfangguna ngay taw Keret ay taw Pelet. Ay Dabid nafili at ngay baguama laman tagfangguna at ngay tagfakamulun.