1 Krunika 17 - Fanawbuid tagsibaliwas Fakayabian

Dius at Fatuyanan sas Dabid

¹ Ay Dabid nu noli wan sat bale, nalong sas Natan fag taglong te, “Nu gbanwan au si tua at masine fag bale at fangawat kayu sidru, dewa katanya, Fagsuadan Yawi at Nasadian siway sik bale ramit.”

² Ay Natan nabalus Dabid te, “Fakamuluni am fakaylatun gfakamulun aroro Dius gufud tua emu.”

³ Ay ginanya fag yabi Dius nalong sas Natan te,

⁴ “Loi wan ay nanlong o sa ku fagsuguan Dabid te, ‘Katatuy Yawi at longan: Bunwa ban o at namawat sik bale laman ku fagnamanwanan,

⁵ aroro siginan ebi nu gfaduksun au ngay taw Israel siginans talun Igiptu kya batang gbanwan si sik bale at mogat. Ay dasug katsi gadgalinan kway gugat sa sangay bale ramit.

⁶ Ay kaduge au gadgalinan gasfuan ku ngay taw kya batang glong sa ku nafili fag ngay tagfangguna taw Israel te, “Wain ay fagyudun nawat ku bale at fangawat kayu sidru?” ’

⁷ “Ay longi yangay sas Dabid te, ‘Au, Yawi at Mabalyanan, glong au te, ebi sik tagulit way o ngay tupa, dewa katanya, nafili au emu laman at namangguna ku ngay taw Israel.

⁸ Naufud au emu dewa nday nu glao o ay nafababo au emu sas fagayu am ngay fawayan. Ay katsi namasik takadungug au emu kata tibak taw takadungug sas fagdaul daga.

⁹ Nafon au sa ku ngay taw Israel sik talun, laman at sadili fagbanwanan. Ay at mauri fag ngay taw di ban gfasalag ya anya fagayu kata ebi ginan,

¹⁰ siginan nu gfili au ngay tagfangguna ku ngay taw Israel. Ay namabo kban fagayu am fawayan. Ay au Yawi, gfatuyanan au te, siginan tua ban gugat am kasugfunanan at nanfunan ku ngay taw Israel.

¹¹ Ay nu nbul ban o namoli emu sa am ngay mangaguyang at fagfolian, ku fantubus ban emu am baguama tua at sadi, ay gfaksvn kban at fagfagtainanan.

¹² Ay kanya ban at namawat ku bale, ay gtuyan au te, at ngay kasugfunanan tua ban gugat tagfunan kabavn.

¹³ Ay kanya ban gtuyan angku te, at mama, ay gtuyan kyangay ban anya te, ku baguama. Ay kesug ktua ban gugat anya, ay kdi ban gfakamulun kata ku nafakamulun sas Saul am natubus fag fun.

¹⁴ Ay namasik fun kban anya sa ku ngay taw, ay siginan tua ban gugat at kasugfunanan tagfunan kabavn.’ ”

¹⁵ Nu katanya, Natan nalong sas Dabid Yawi at foyungan fagayu sa anya.

Dabid at Darangin

¹⁶ Sanya ginan, fun Dabid nasakbo sas bale ramit sat fagfasakboan Fagsuadan Nasadian ay namalunggung sanya sis Yawi at daga salubangan ay gdarangin te, “Yawi, ku Dius, sinu au nunda, ay sinu ku ngay kasugfunanan laman sik mauseganan ami sa emu?

¹⁷ Ay katsi nafatuyanan yay o sa ku kasugfunanan ban. Natuyan o angku kata sik mabalyanan fag taw.

¹⁸ Nataw ya ku fagmalongun sabaliwa nu gfasik mauseganan o angku? Aroro natoglag wo angku am fagsuguan.

¹⁹ Yawi, nafakamulun tuo takatanya fag ngay fakamulun at mabalyanan, ay nafasure tuo sa angku, laman sa angku am fagsuguan, kata am fakaylatun.

²⁰ Yawi, we gfasud emu, ay we tibak dius sas day emu ay wa yangay mi e fagsafulun tibak dius takata emu.

²¹ Ay wa yangay e gfasud am ngay taw Israel. Sas fagdaul daga kanya way lang fag ngay taw am nafalfas siginan nu gafagsuguanan, laman am ngay taw. Ay am ngayan andungug aroro siginan am nafakamulun at mabalyanan ay at maksvn nu madulo, ay siginan nu ggubuk o am ngay taw laman gaiyan tibak gaban taw, gina o gfalangfe anya fagayu siginans Igiptu.

²² “Yawi, nafili o ngay taw Israel laman am ngay taw kabavn ban, ay o wan at Dius.

^23-24 “Yawi, fafasludani am fatuyanan sa angku am fagsuguan ay sa ku kasugfunanan laman ban o tua takadungug kabavn. Ngay taw ban lumong te, ‘Yawi at Mabalyanan, ngay taw Israel at Dius!’ Ay kabavn ban ami fag kasugfunanan gfataglayun ami gfakamulun sa emu.

²⁵ Ku Dius, ku amatanganan mabitsug nu gdarangin au sa emu, aroro nafatuyanan tuo sa angku am fagsuguan te, gfataglayun ban nu gfunan au anggan ku ngay kasugfunanan.

²⁶ “Yawi, o wan at matuyan fag Dius! Nafatuyanan o sa angku am fagsuguan nusnge wain at masine.

²⁷ Ay katsi nafae fagmasineun o ku ngay kasugfunanan laman ban si tuami gugat am daga salubangan kabavn. Yawi, nu nafon o fagmasineun, di e fakatabuan.”