1 Krunika 16 - Fanawbuid tagsibaliwas Fakayabian

¹ Ay kanya fagayu nafasakbo Fagsuadan Dius at Nasadian sas Dabid at nafawat fag bale ramit, ay nafon sas Dius at fagirugun fag ngay fanggalangun ay anggan ngay fanggalangun laman sas fagmanabayanun.

² Ay Dabid nu ntabu gfon at ngay fanggalangun, kanya nafadante ngay taw sas Yawi at ngayan.

³ Ay kanya nafon tinapay, yamas, ay pasas sa sangay taw Israel, mangama man ay mangena.

⁴ Ay Dabid nafili ngay taw Lebi laman tagfakamulun sas Fagsuadan Yawi at Nasadian laman gdarangin, gseg ay gfauseganan Yawi, Israel at Dius.

⁵ Ay Asaf tagfangguna anya fagayu ay kanya yangay tagfawang ngay fagfadkalinganun. Ay at fadogan Sakaryas, Eyel, Semiramut, Eiyel, Matitya, Elyab, Benaya, Ubed-Edum ay Eyel. Kanya fagayu tagfawang fagfawangun ke ngay bakyang.

⁶ Ay Benaya ay Akasyel fag tagfon fanggalangun at namawang gugat ngay budyung sis salubangan Fagsuadan Dius at Nasadian.

Dabid at Famauseganan fag Alubad

⁷ Ginanya fag menit, Dabid nafon sas Asaf ay sat ngay ibama fag ngay taw Lebi tuy fag alubad laman famauseganan Yawi:

⁸ Fagayu am, fauseganani Yawi, ay darangini sa anya. Ay foyungi yangay sa tibak talun at ngay taw at ngay nafakamulun.

⁹ Alubadi fauseganani anya, ay longi at ngay nafakamulun at madulo

¹⁰ Segi anya, tam Dius at yud e malong. Fagayu am at kinkakbang sas Yawi, useganani tua.

¹¹ Akbangi sas Yawi, ay afanudi te, siginan tua anya fagmabitsugun, ay masadii tua gugat sa anya.

^12-13 Am, Dius at ngay nafili, ay Akub, Dius at fagsuguan at ngay kasugfunanan, amatangi tua gugat Dius at ngay nafakamulun at madulo, ay at ngay balyawvtan.

¹⁴ Sia wan Yawi tam Dius. Ay kanya wan fagdaul daga at fun.

¹⁵ Kanya di kalyam at nasadian, at nafatuyanan laman sas fagayu kasugfunanan,

¹⁶ at nasadian sas Abrayam, ay sas Isak.

¹⁷ Ay nafatuyan yangay sas Akub, ay anggan sat ngay kasugfunanan te, at nasadian ban gfataglayun tua kabavn.

¹⁸ Kanya nalong sas galay at sadi te, “Gfon kban sa ayu ay sa ay ngay kasugfunanan talun Kanaan. Kanya ban fag talun ku fagnamagbilugun sa ayu.”

¹⁹ Dius nalong takatanya sa anya fagayu, gina kanya fagayu yay yud ngayu, ay sik ngay betaw sis talun Kanaan.

²⁰ Kanya fagayu gadgalinan sa tiba tibak talun.

²¹ Dewa katanya, Dius di naylat kanya fagayu nu gafagsuguanan. Nu katanya, kanya nafaurianan ngay fun, laman ngay taw Israel manabayan.

²² Kanya nalong sa kafag ngay fun te, “Lag am gfaurianan ku nafili fag ngay taw ay ku ngay taglong.”

²³ Ngay taw sas fagdaul daga, alubadi laman sas Yawi. Ay galay menit, foyungi sabaliwa nu gfalangfe antam.

²⁴ Foyungi sas fagayu talun at taw te, Yawi mabalyanan ay at ngay nafakamulun madulo.

²⁵ Yawi mabalyanan, nu katanya, fauseganani anya, ay suyui gtungud yap tua sa tibak fagsegan.

²⁶ Ay tibak talun at fagsegan bunwa at matuyan fag dius. Yawi tua at nawat banwa.

²⁷ Siwa anya fagmasuyuun ay fagmatuyanun, ay kalag sit bale at fagusegananun ay at fagmasineun.

²⁸ Fagayu gaban taw sas fagdaul daga, toglagi Yawi. Toglagi anya aroro sat fagmasineun ay sat fagmabalyananun.

²⁹ Fauseganani Yawi, at mauseganan ay at matuyan fag famauseganan, ay bubai ngay famonun sat daga salubangan. Segi Yawi, aroro di e malong.

³⁰ Fagdaul daga, suyui tua anya! Kanya tua at nawat fagdaul daga ay at nafaogat, nu katanya di guigan.

³¹ Banwa ay fagdaul daga, useganani! Fagayu talun at ngay taw foyungi te, “Yawi tam Fun!”

³² Fagdaul dagat ay fagayu tagsanya, fauseganani yangay Yawi! Ngay gamasun ay anggan ngay tanum, uroi useganani!

³³ Fagayu fun kayu, fauseganani yangay alubadi sis Yawi at daga salubangan, aroro kanya kadasug wan, laman nanginsaful ngay taw sas fagdaul daga.

³⁴ Fauseganani Yawi, aroro kanya matuyan tua, ay nu mafangesug di e fakatabuan.

³⁵ Ay darangini te, “Em Dius, falangfei emi! Ay fafuli emi sa em talun, siginan em fagafagsuguanan fag ngay talun, laman manamauseganan ami emu, aroro matuyan tuo.”

³⁶ Kabavn segi Yawi, ngay taw Israel at Dius. Ay fagayu taw nalong te, “Anud! Segi Yawi!”

³⁷ Ay sanya ginan, Dabid nafatigwanan sas Asaf ay sat ngay kalongan fag ngay taw Lebi tagfakamulun sis salubangan Fagsuadan Yawi at Nasadian, laman gfakamulun kayu menit nusnge wain at fagnamakamulunun ginanya.

³⁸ Ay at nafili fag ngay taw: Ubed-Edum, Edutun at baguama, ay Kusa ay unum yak safulu e waluk taw Lebi, kanya wan tagulit sakbawan bale ramit.

³⁹ Ay Dabid nafili Saduk fag tagfon fanggalangun ay at ngay ibama fag ngay tagfon fanggalangun, laman gulit Yawi at bale Fagnangablanganan si tangabat fag afud furuan Gibyun.

⁴⁰ Kabavn ban kanya fagayu at nangirug ngay fagirugun fag ngay fanggalangun, kayu menit ay yabi, kata at marirukan sis Yawi at faugali at nafon sa sangay taw Israel.

⁴¹ Ay galo yangay sanya: Eman, Edutun ay tiba ya at nafili fag ngay tagalubad gina gfauseganan Yawi, aroro sat fakesugun at yud e fakatabuan.

⁴² Eman ay Edutun tagfawang ngay budyung, fagfadkalinganun fag fagfawangun, ay tiba yak fagfawangun at fagagbilugun gina galubad sas Yawi. Ay nafili Edutun at ngay baguama laman tagulit sakbawan.

⁴³ Sanya ginan, kanya fagayu noli wan sat mesa bale, ay Dabid noli yangay laman namadante at talanan.