1 Krunika 15 - Fanawbuid tagsibaliwas Fakayabian

Nu Gfalganan Namul Fagsuadan Nasadian

¹ Dabid nafawat tagbia fag ngay bale sit furuan laman at bale. Ay nafawat yangay sik bale ramit laman fagfasakboan Fagsuadan Dius at Nasadian, ay nafasakbo sanya.

² Ay sanya ginan, Dabid nalong te, “Ngay taw Lebi yakman lang tagbuba Fagsuadan Nasadian, aroro Yawi nafili anya fagayu laman tagbuba, ay tagfakamulun sa anya kabavn.”

³ Ay Dabid nafaful fagayu taw Israel sas Erusalem at namuba Yawi at Fagsuadan Nasadian sat nafalganan fag bale.

⁴ Kayu tuy at nafauro ngay tagfon fanggalangun ay ngay taw Lebi:

⁵ Siginans Kuat at kasugfunanan sadik sandan duak safulu, ay Uryel tagfangguna.

⁶ Ay siginan Merari at kasugfunanan duak sandan duak safulu, ay Asaya tagfangguna.

⁷ Ay siginan Gersun at kasugfunanan sadik sandan tuluk safulu, ay Uel tagfangguna.

⁸ Ay siginan Elisafan at kasugfunanan duak sandan, ay Semaya tagfangguna.

⁹ Ay siginan Kebrun at kasugfunanan waluk safulu, ay Elyel tagfangguna.

¹⁰ Ay siginan Usyel at kasugfunanan sadik sandan labi dua, ay Aminadab tagfangguna.

¹¹ Sanya ginan, Dabid nafauro Saduk ay Abyatar fag duak tagfon fanggalangun, gasfuan Uryel, Asaya, Uel, Semaya, Elyel ay Aminadab fag ngay taw Lebi.

¹² Ay kanya nalong sa anya fagayu te, “Am fag ngay tagfangguna ngay talanan tagsiginans Lebi at kasugfunanan, fasinei ay ngay sadili, gasfuan ay ngay kaiban fag ngay taw Lebi, laman manamuba am Israel at Dius Yawi at Fagsuadan Nasadian sa ku nafalganan fag bale.

¹³ Aroro ebi taguna bunwa am at nanamuba Fagsuadan Nasadian. Nu katanya, Yawi nafaurianan antam aroro wa tam nainto sa anya te, setain at masine nu namuba Fagsuadan Nasadian.”

¹⁴ Nu katanya, ngay tagfon fanggalangun ay ngay taw Lebi nafasine at ngay sadili laman mabuba Yawi, Israel at Dius at Fagsuadan Nasadian.

¹⁵ Ay ngay taw Lebi gsaknayan kata Yawi at suguan sas Muisis.

¹⁶ Ay Dabid nasugu sa sangay taw Lebi at ngay tagfangguna te, “Filii siginan ay gaban tagsaful galubad, laman kanya fagayu galubad at mauseganan gina gfawang ngay fagfawangun ke ngay bakyang, ay fagfadkalinganun.”

¹⁷ Nu katanya, ngay taw Lebi nafili Eman, Uel at baguama ay Asaf, Berekya at baguama ay Etan, Kusaya at baguama tagsiginans Merari at gaban.

¹⁸ Ay Sakaryas, Akasyel, Semiramut, Eiyel, Uni, Elyab, Benaya, Maaseya, Matitya, Elifeleu ay Mikneya, laman taggubuk. Ay nafili yangay Ubed-Edum ay Eyel laman tagulit bale ramit at sakbawan.

¹⁹ Ay nafili Eman, Asaf, ay Etan laman tagfawang fagfadkalinganun at mawatan siginan tansu.

²⁰ Ay Sakaryas, Asyel, Semiramut, Eyel, Uni, Elyab, Maaseya ay Benaya tagfawang fagfawangun ke ngay bakyang si tangabat fag ruri.

²¹ Ay Matitya, Elifeleu, Mikneya, Ubed-Edum, Eyel, ay Asasya tagfawang tibak fagfawangun si tangababa fag ruri.

²² Ay at nafili tagfangguna nu galubad, Kenanya sik tagfangguna ngay taw Lebi, aroro kanya saful galubad.

²³ Ay Berekya ay Elkana tagulit Fagsuadan Nasadian.

²⁴ Ay Sebanya, Usafat, Netanel, Amasay, Sakaryas, Benaya ay Elyeser sik ngay tagfon fanggalangun tagfawang budyung sis salubangan Fagsuadan Dius at Nasadian. Ay Ubed-Edum ay Eya tagulit yangay Fagsuadan Nasadian.

Nu Gbuba Fagsuadan Nasadian sas Erusalem

²⁵ Nu katanya, Dabid ay taw Israel at ngay fagtainan ay at ngay tagfangguna ngayuk libuk tagfawayan guseganan glao sas Ubed-Edum at bale laman namul Fagsuadan Yawi at Nasadian.

²⁶ Ay aroro Dius nagubuk tua ngay taw Lebi gina gbuba Fagsuadan Yawi at Nasadian, kanya fagayu nafon at ngay fanggalangun, fituk tumad baka ay fituk tupa.

²⁷ Nu katanya, Dabid ay tagbuba Fagsuadan Yawi at Nasadian fag ngay taw Lebi, ay ngay tagsaful galubad, ay anggan Kenanya fag tagfangguna alubad nasulun sik ngay lanbung at fangawat at masine fag ramit. Ay Dabid nasulun yangay at mafilian fag lanbung at fangawat at masine fag ramit, kata tagfon fanggalangun at lanbung.

²⁸ Ay ngay taw Israel guro guseganan gbuba Fagsuadan Yawi at Nasadian ay gfawang ngay budyung, fagfadkalinganun, ay gfawang yangay ngay fagfawangun ke ngay bakyang.

²⁹ Ay tagbuba Fagsuadan Yawi at Nasadian gina gsakbo sas Dabid at furuan, Mikal, Saul at baguina, gbanawan sis fagbanawanan. Ay nu nalag fun Dabid nu gfalelegan at ngay afud bilug aroro guseganan, kanya ankuri.