1 Krunika 14 - Fanawbuid tagsibaliwas Fakayabian

Dabid at Talanan

¹ Kiram, talun Tiru at fun, nasugu ngay tagfosuk longan sas Dabid gadgaloan ngay tagsaful kawat bale, ay tagfadalusan ngay gang laman at famale. Ay kanya nafabuba yangay ngay kayu sidru laman fangawat Dabid at bale.

² Sanya ginan, Dabid nasaful te, Yawi nafili anya laman sik fun sis talun Israel, ay nafaksvn at fagfagtainanan laman sa sangay taw Israel.

³ Ay sis Erusalem, Dabid anke ngay bubay yay fia ay anfamut yangay at ngay sisian.

⁴ Kayu tuy at ngay baguama at kinsalug sanya: Samwa, Subab, Natan, Sulumun,

⁵ Ibkar, Eliswa, Elpelet,

⁶ Nuga, Nefeg, Afya,

⁷ Elisama, Beelyada ay Elifelet.

Dabid Nababo ngay Taw Filistia

⁸ Ay ngay taw Filistia nu nadungug te, Dabid wan at fun sis fagdaul talun Israel, kanya fagayu nafaful at ngay tagfawayan laman nanggamat anya. Dewa katanya, Dabid nasaful kafag ngay taw at algan ay nanamablang anya fagayu.

⁹ Gina ngay taw Filistia namawayan ngay taw sis datag Refaim,

¹⁰ Dabid nainto sas Dius te, “O namawayan ami ngay taw Filistia? Ay o gbabo tua ro mi?” Ay Yawi nabalus te, “Kin, loi wan aroro gfababo kro ayu.”

¹¹ Nu katanya, Dabid ay at ngay tagfawayan nalao sas Baal-Perasim, ay nababo ngay taw Filistia. Ay Dabid nalong te, “Dius nagbilug angku laman namamin ku ngay fawayan kata at maksvn fag lugwak nu nadalan.” Nu katanya, nafangayan kanya fag talun te, Baal-Perasim.

¹² Ngay taw Filistia nafamato at ngay fagsegan, ay Dabid nasugu te, “Irugi wan.”

¹³ Ay ngay taw Filistia nadog yay nanamawayan sas datag Refaim.

¹⁴ Ay Dabid nadog yay nainto sas Dius, ay Dius nabalus anya te, “Lag yap vtv namawayan. Ligungi yap, ay nu munakbang wam si sangay fun kayu balsamu, ginanya ya ro nu gfawayan am.

¹⁵ Ay nu nadungug ro am sik awang sis tungud kayu balsamu kata sik ngay tagfawayan nu gtadtalasan, loi wa ro vtv laman namawayan, aroro kanya wan fagsafulan te, gfangguna au ayu namawayan ngay taw Filistia”

¹⁶ Ay Dabid nafaning Dius at suguan. Ay kanya fagayu nafabul ngay taw Filistia siginans Gibyun sitsigons Geser.

¹⁷ Nu katanya, Dabid ansik takadungug dewa nday, ay Yawi nafili anya laman fagayu talun at taw kalimu anya.