1 Krunika 13 - Fanawbuid tagsibaliwas Fakayabian

Nu Namul Fagsuadan Nasadian

¹ Dabid nafakamatoan at ngay tagfangguna, ay at ngay fun tagfawayan, ay ngay tagfangguna ngay tagfawayan.

² Ay kanya nalong sas fagayu taw Israel tagsanya te, “Nu kaylat tuam, ay Yawi tam Dius nu kaylat, namasaful tam sa tam ngay kalongan sas fagdaul talun Israel, anggan sa sangay tagfon fanggalangun ay sa sangay taw Lebi tagbanwan sit ngay furuan ay anggan sat ngay tagalaga fagbaugun sit fagnamafangonan. Ay namauro tam anya fagayu laman ggubuk antam.

³ Katsi wan at buknga laman gfafoli tam sa antam Fagsuadan tam Dius at Nasadian, aroro ebi gina yay Saul tam fun wa tam batang ya ginto sabaliwas Dius at fakaylatun.”

⁴ Ay fagayu taw naylat aroro nasaful te, katanya tua at masine.

⁵ Nu katanya, Dabid nafaful fagayu taw Israel siginans Liskung Sikur sis Igiptu sitsigons Lebu-Kamat laman namul Fagsuadan Nasadian sas Kiryat-Earim.

⁶ Sanya ginan, Dabid ay ngay taw Israel nalao sas Baala (at ngayan yangay te, Kiryat-Earim) tagsis talun Uda laman namul Fagsuadan Dius at Nasadian; Yawi gbanwan sanya sis wabilug duak awatan ke fakfak.

⁷ Ay kanya fagayu nabul Fagsuadan Nasadian siginans Abinadab at bale ay nafabuba sa sik faguyudan bagu. Ay Usa ay Akyu tagulit kafag faguyudan kaduge glao.

⁸ Ay Dabid ay fagayu taw Israel maksvn nu guseganan sis Yawi at daga salubangan. Ay kanya fagayu galubad ay gfawang ngay fagfawangun ke ngay bakyang, fagfadkalinganun, fagfadkatukanun ay budyung.

⁹ Ay kanya fagayu gina andasug sas Kidun at fagruyusan, ngay baka antaid, ay Usa nabakvd Fagsuadan Nasadian.

¹⁰ Ay Yawi maksvn nu kadotama Usa aroro nated Fagsuadan Nasadian. Nu katanya, Usa anbul sis Dius at daga salubangan.

¹¹ Ay Dabid andotama aroro Yawi nafabul Usa, ay dasug katsi, nafangayan kafag talun te, Peres-Usa.

¹² Ay ginanya fag menit, Dabid anlimu Yawi, ay nalong te, “Tain ro nu mafadasug au Fagsuadan Dius at Nasadian sa ku furuan?”

¹³ Ay Dabid wa naylat gbuba Fagsuadan Nasadian sat furuan, abat ngate, nafamato way sis Ubed-Edum fag taw Gat at bale.

¹⁴ Ay kaduge tuluk magdanun, Fagsuadan Nasadian si yays Ubed-Edum at bale ay Yawi nafayu Ubed-Edum fag talanan at ramraman.