1 Krunika 11 - Fanawbuid tagsibaliwas Fakayabian

Dabid Ansik Fun sis Talun Israel

¹ Ay fagayu taw Israel nasas Dabid sas furuan Kebrun ay nalong te, “Ami am ngay kalongan ami.

² Siginan ebi dewa Saul em fun, o wan tagfangguna ngay taw Israel laman namawayan at ngay fawayan. Ay Yawi am Dius nalong sa emu te, ‘Nangalaga o ku ngay taw Israel, kata sik tagalaga ngay tupa. Ay o wan tagfangguna anya fagayu.’ ”

³ Nu katanya, Dabid nawat sik nasadian sas Israel at ngay fagtainan, sis Yawi at daga salubangan, ay kanya fagayu naugwag langis sas Dabid at alfuyu laman sik famatoglag te, kanya wan talun Israel at fun, kata Yawi at nafatuyanan siginan at fagsuguan Samwel.

⁴ Sik menit, Dabid ay at ngay tagfawayan nalao sas Erusalem (at ngayan yangay te, Ebus) laman namawayan. Ay ngay taw Ebus

⁵ nalong sas Dabid te, “Wam masakbo stae!” Dewa katanya, Dabid nagbilug Siun at mogat fag furuan, ay nafangayan te, Dabid at furuan.

⁶ Ay Dabid nalong te, “Nusnga sinu tua ro at nafangguna namawayan ngay taw Ebus, kanya waban ku ngay tagfawayan at fun.” Ay Uab, Seruya at baguama at nanamangguna. Nu katanya, kanya wan ngay tagfawayan at fun.

⁷ Ay Dabid nu nagbilug wan kafag furuan, sanya wan nu gbanwan, ay nafangayan te, Dabid at furuan.

⁸ Ay Dabid nafafasine ngay alad gfasigad siginans tagligung fag ngay alad. Ay Uab fag fun tagfawayan at nafasine tibak afud furuan.

⁹ Ay Dabid ankaksvn nu mabalyanan aroro Yawi at Mabalyanan ggubuk anya.

Dabid at ngay Tagfawayan at Maseganama

¹⁰ Kayu tuy Dabid at ngay tagfangguna at maseganama fag ngay tagfawayan. Kanya wan fag ngay tagfangguna ay ngay taw Israel at nagubuk Dabid laman sik fun, kata Yawi at nafatuyanan sas Israel.

¹¹ Kayu tuy Dabid at ngay tagfawayan at maseganama fia: Asubeam fag taw Kakmun. Kanya wan tagfangguna fag tuluk tagfawayan at maseganama fia Dabid at ngay tagfawayan fagayu. Kanya nafabul tuluk sandank taw sayginan namawayan siginan at bangko.

¹² At fadua, Elyasar, Duday at baguama tagsiginan Akua at gaban. Ay kanya wan at sadi Dabid at tagfawayan fag tulu at maseganama.

¹³ Kanya nanangalo Dabid gina nanamawayan ngay taw Filistia at maful sis Pas-Damim. Ay kanya fagayu at fagawayanan sis wa tanuman barli, ay ngay taw Israel nalagyu.

¹⁴ Ay Elyasar ay Dabid si way gugat stanuman ay nafabul ngay taw Filistia. Siginan Yawi at gubuk, ngay taw Israel nababo.

¹⁵ Sik menit, tulu Dabid at tagfangguna nanangalo anya sas Adulam fag luib. Kanya fag tulu katap yangay sis Dabid at ngay tagfawayan fag tuluk safulu at maseganama. Ay ginanya ngay taw Filistia maful sis datag Refaim,

¹⁶ ay nagbilug furuan Betleem. Kaduge Dabid sis luib,

¹⁷ andanum ay nalong te, “Ku fakaylatun nangus e namul mamam siginans bubun at munakbang sis furuan Betleem at sakbawan.”

¹⁸ Nu katanya, kafag tuluk tagfawayan at maseganama nasuksuan ay nasakbo sa sangay taw Filistia at fagmafulan munakbang sis sakbawan furuan Betleem. Kanya fag tulu nabul mamam sanya ginan fag bubun ay nafon sas Dabid. Dewa katanya, Dabid wa kaylat ginum. Abat ngate, nabusbus way kafag mamam laman sik fanggalangun sas Yawi.

¹⁹ Ay Dabid nalong te, “Ku Dius, kwa kaylat ginum tuy fag mamam, aroro at kamafanudan kata kafag ngay taw at taguk, aroro wa nesug at leleg laman namul.” Nu katanya, Dabid wa nainum kafag mamam. Katanya kafag tuluk maseganama at ngay nafakamulun.

²⁰ Ay Abisay, Uab at faduksay tagfangguna Dabid at tagfawayan fag tuluk safuluk maseganama. Kanya nafabul tuluk sandank taw Filistia siginan at bangko. Nu katanya, kanya at ngayan andungug yangay kata kafag tuluk tagfawayan at maseganama.

²¹ Dewa katanya, kanya wa katap si kafag tulu. Ay aroro kanya nu kadungug gtungud yay tibama fag tuluk safulu, kanya gfangguna anya fagayu.

²² Ay e sadi yak taw at maseganama at ngayan Benaya, Euyada at baguama. Kanya siginans furuan Kabseel. Kanya ngayu at nafakamulun at madulo siginan at fagmaseganamaun, kanya nafabul duak taw Muab tagsaful fia gfawayan. Ay kanya nafafalo sik liun sitsigon at fagsuksuanan ay nafabul dewa at arak marios mandi ay madangsal.

²³ Ay kanya nafabul yangay sik taw Igiptu, at kabatan limak siu, kafag taw Igiptu at famawayan sik bangko mabyat ay madamvl, dewa katanya, sas Benaya sik famalang way. Ay Benaya naago way lang kafag taw Igiptu at bangko ay kanya yay at famabul.

²⁴ Katanya Benaya, Euyada at baguama at ngay nafakamulun. Ay kanya ansik takadungug yangay kata kafag tuluk tagfawayan,

²⁵ dewa katanya, kanya wa katap si kafag tuluk maseganama. Ay aroro kanya wan takadungug si kafag tuluk safuluk tagfawayan, Dabid nafili anya laman tagfangguna sat ngay tagfawayan tagulit anya.

²⁶ Kayu tuy at maseganama fag ngay tagfawayan: Asael, Uab at faduksay, Elanan, Dudu fag taw Betleem at baguama,

²⁷ Samut fag taw Arur, Keles fag taw Pelun,

²⁸ Ira, Ikes fag taw Tekwa at baguama, Abyeser fag taw Anatut,

²⁹ Sibekay fag taw Kusa, Ilay fag taw Akua,

³⁰ Maaray fag taw Netufa, Keled, Baana fag taw Netufa at baguama,

³¹ Itay, Ribay at baguama tagsiginans Gibya sis talun Benamin, Benaya fag taw Piratun,

³² Kuray tagbanwan munakbang sis fagfamiluganan mamam tagsas Gaas, Abyel fag taw Arbat,

³³ Asmabet fag taw Bakarum, Elyakba fag taw Saalbun,

³⁴ Asem fag taw Gisun at ngay baguama, Yunatan, Sage fag taw Arar at baguama,

³⁵ Akyam, Sakar fag taw Arar at baguama, Elifal, Ur at baguama,

³⁶ Kefer fag taw Mekerat, Akya fag taw Pelun,

³⁷ Kesru fag taw Karmel, Naaray, Esbay at baguama,

³⁸ Uel, Natan at faduksay Mibkar, Agri at baguama,

³⁹ Selek fag taw Amun, Nakaray fag taw Beerut tagbuba famawayan laman sas Uab, Seruya at baguama,

⁴⁰ Ira ay Gareb fag taw Itir,

⁴¹ Uryas fag taw Ket, Sabad, Aklay at baguama,

⁴² Adina, Sisa at baguama tagfangguna Rubin at kasugfunanan gadgaloan at fagsuguan fag tuluk safulu,

⁴³ Kanan, Maaka at baguama Usafat fag taw Mitna,

⁴⁴ Usya fag taw Asterat, Sama ay Eyel, Kutam fag taw Aruer at ngay baguama,

⁴⁵ Edyael, Simri at baguama ay at faduksay Ua fag taw Tis,

⁴⁶ Elyel fag taw Makab, Eribay ay Usabya, Elnaam at ngay baguama, ay Itma fag taw Muab,

⁴⁷ ay Elyel, Ubed ay Akasyel fag ngay taw Mesuba.