1 Krunika 10 - Fanawbuid tagsibaliwas Fakayabian

Saul ay at ngay Baguama nu Kabul

¹ Ngay taw Filistia nanamawayan ngay taw Israel sis buksul Gilbua. Ay ngayuk taw Israel at kinbul ay tiba nalagyu wan.

² Ay ngay taw Filistia nafafalo Saul talamean, ay nafabul Saul at ngay baguama, Yunatan, Abinadab ay Malki-Sua.

³ Ay maksvn Saul ay ngay taw Filistia nu gawayan. E nagodun Saul ay gbia at fakarukan.

⁴ Ay Saul nalong sa tagbuba at ngay famawayan te, “Guladi am fiso ay fabuli angku, aroro nu dway ro wo nafabul angku, ngay taw way ro at yud natoglag Dius tagfabul angku, ay kanya ro fagayu gfalingun angku.” Ay tagbuba at ngay famawayan anlimu way gfabul anya, nu katanya, Saul nabul at fiso ay naurus at sadili.

⁵ Ay tagbuba at ngay famawayan nu nalag te, Saul anbul wan, naurus yangay at sadili ay anbul yangay.

⁶ Nu katanya, Saul talamean ay fagayu at ufud anbul wan.

⁷ Ay ginanya e ngay taw Israel tagbanwan sis datag Esreel. Ay kanya fagayu nu nalag Israel at ngay tagfawayan nu glagyu, ay Saul talamean nu mabulan, kanya fagayu naubun at ngay furuan ay nalagyu yangay. Nu katanya, ngay taw Filistia nasakbo sanya fag ngay furuan ay nabanwan sanya.

⁸ Ay balabag di, nu ntabu wan nu gawayan, ngay taw Filistia nasas buksul Gilbua laman namul at ngay kinbul at famawayan. Ay kanya fagayu nalag sanya Saul talamean nu mabulan.

⁹ Ay kanya fagayu nabul Saul at ngay famawayan ay nalifung at liug, ay nasugu sik ngay tagfosuk longan sas fagdaul talun Filistia laman namasaful sat ngay fagsegan ay sat ngay kaiban te, Saul anbul wan.

¹⁰ Ay kanya fagayu nafasakbo Saul at famawayan sat ngay fagsegan at bale, ay narabing Saul at alfuyu sat fagsegan Dagun at bale.

¹¹ Ay ngay taw Abes-Gilyad nasaful ngay taw Filistia at nafakamulun sas Saul.

¹² Nu katanya, at maseganama fag ngay mangama nalao ay nanamul Saul talamean at ngay bilug, ay nabuba sas furuan Abes. Sanya ginan, kanya fagayu nanamoli Saul talamean at ngay bilug sas daga fun kayu daul sis Abes, ay wa gfangon laman gdarangin kaduge fituk menit laman gfalag te, kabalu.

¹³ Saul anbul aroro wa matuyan sas Yawi. Ay kanya wa nafaning Dius at suguan, nanangakbang way sa sangay tagseg falad,

¹⁴ abat ngate, get gubuk sas Yawi. Nu katanya, Yawi nafabul ay nafon at fagmafunanun sas Dabid, Ese at baguama.