1 Fun 8 - Fanawbuid tagsibaliwas Fakayabian

Sulumun Nafasakbo sas Yawi at Bale Fagsuadan Nasadian

¹ Sulumun nafaful sas Erusalem taw Israel at ngay fagtainan, tagfangguna ngay kasugfunanan, laman namul Fagsuadan Yawi at Nasadian siginans Dabid at furuan, at masuad te, Siun.

² Kanya fagayu nalao sas fun Sulumun gina e fagmafulun sis fafituk magdanun.

^3-4 Gina ngay taw Israel at ngay fagtainan andasug, ngay tagfon fanggalangun ay ngay taw Lebi nanamul Fagsuadan Nasadian, ay anggan Fagnansegan fag Bale ramit ay fagayu tagsanya fag ngay fagagbilugun at yud e malong.

⁵ Ay fun Sulumun ay fagayu taw Israel nanamon at ngay fanggalangun sis salubangan Fagsuadan Nasadian, ngayuk tupa ay baka, at kayuan wa katap ya.

⁶ Sanya ginan, ngay tagfon fanggalangun nafasakbo Fagsuadan Nasadian sas Yawi at bale sat Mafasamanan Fia fag Suluk, si sangay tagleleg fag ngay awatan at ngay daga fakfak.

⁷ Kafag ngay awatan at ngay fakfak marafadan, ay gtabun Fagsuadan Nasadian ay anggan at ngay famuba.

⁸ Kanya fag ngay famuba ngaba, at fungfung sas day Fagsuadan Nasadian kalag siginan at Mafasamanan fag Suluk, dewa katanya, kanya wa kalag sis day bale. Ay dasug katsi, sanya yay gugat.

⁹ Fagsuadan Nasadian we bilug sangay kafag duak dalifi Muisis at nasuad gina sis Buksul Kureb. Sanya Yawi nu gfon at nasadian sa sangay taw Israel gina kanya fagayu nalao siginans talun Igiptu.

¹⁰ Ngay tagfon fanggalangun nu naduksun wan siginan at Mafasamanan fag Suluk, Yawi at bale ankapnu linyabu.

¹¹ Nu katanya, ngay tagfon fanggalangun wa mafataglayun ya at fakamulun aroro maksvn nu glinyabu, ay Yawi at kamasuloan ankapnu sat bale.

¹² Ay Sulumun nadarangin te, “Yawi, nalong o te, gbanwan ban o sat madamvl fag linyabu.

¹³ Anud, nafawat kwan at masine fag bale laman sa emu, am fagnamanwanan kabavn.”

Fun Sulumun at Longan sa sangay Taw Israel

¹⁴ Sanya ginan, fun Sulumun nasalubang sa sangay taw Israel tagmalindug sanya, ay nafadante anya fagayu,

¹⁵ ay nalong te, “Segi Yawi ngay taw Israel at Dius. Kanya nafafasludan at ngay fatuyanan sa ku mama Dabid. Aroro kanya nalong te,

¹⁶ ‘Siginan nu gfaduksun au ku ngay taw Israel siginans talun Igiptu, kye nafili sik kasugfunanan taw Israel at furuan laman ku fagnangawatan ku bale, laman fagnamauseganan angku. Ay dewa katanya, nafili au Dabid laman namagtainan ku ngay taw Israel.’

¹⁷ “Ku mama Dabid maksvn nu kaylat namawat sik bale laman gfauseganan Yawi, Israel at Dius.

¹⁸ Dewa katanya, Yawi nalong sa anya te, ‘Masine am algan nu namawat o ku bale laman fagnamauseganan ku ngayan.

¹⁹ Dewa katanya, bunwa ban o at namawat, am baguama way ban at namakamulun takatanya laman sa takafauseganan ku ngayan.’

²⁰ “Ay katsi, Yawi nafafasludan at fatuyanan. Natubus au ku mama Dabid, ay katsi gfunan au ngay taw Israel kata Yawi at nafatuyanan. Ay nafawat kwan tuy fag bale laman fagnamauseganan Yawi, Israel at Dius.

²¹ Ay nafawat au sanya sik suluk laman fagfasakboan Fagsuadan Yawi at Nasadian sa tam ngay mangaguyang, gina nafaduksun anya fagayu siginans talun Igiptu.”

Sulumun Gdarangin

²² Fun Sulumun nananmalindug sis salubangan fagirugan fanggalangun laman sas Yawi, sis fagunan ngay taw Israel at fagmafulun, ay nafabat at ngay take sabaliwas banwa,

²³ ay nadarangin te, “Yawi ngay taw Israel at Dius, we Dius sis banwa ay sas daga tagfasud emu. Gfafasludan o am nasadian, ay gfalag o am fakesugun sam ngay fagsuguan tagfaning emu sas fagdaul at amatanganan.

²⁴ Nafafasludan o am ngay fatuyanan sa ku mama Dabid am fagsuguan. Nafatuyanan o sa anya, ay nafafasludan yangay o katsi fag menit.

²⁵ Yawi, Israel at Dius, fafasludani yangay at sadi am fatuyanan sam fagsuguan Dabid ku mama. Nalong o anya te, ‘Siginan tua ban gugat am kasugfunanan at nanfunan sa sangay taw Israel nu gugali tua at masine sa ku daga salubangan, kata am nafakamulun.’

²⁶ Nu katanya, Israel at Dius, fafasludani am fatuyanan sa ku mama Dabid am fagsuguan.

²⁷ “Dius, o manamanwan o ste swa daga magamut ngay taw? Dewa si tiba tungud fag banwa ya kasakan sa emu, ay kaugat wan ste ku nafawat fag bale!

²⁸ Dewa katanya, Yawi, ku Dius, dungugani angku, am fagsuguan, nu get au gfainfanyuan sa emu katsi.

²⁹ Uliti tua ban nangus gugat am bale kayu menit ay yabi, am fatuyanan te, sanya nu gfauseganan emu. Balusi tua nangus am fagsuguan at darangin laman stie fag bale.

³⁰ Dungugani ku fagetun, ay am ngay taw at fagetun, gina ami gdarangin gsalubang stae. Ay dungugani emi sanya sis banwa am fagbanwanan, ay nu gdungug tuo emi falyami em ngay fagmauriun.

³¹ “Sik taw nu nke fagmauriun sat faduksay ay nu nanamatuyan sis salubangan fagirugan fanggalangun ste fag bale,

³² dungugani anya sanya sis banwa ay insafuli am ngay fagsuguan. Faurianani at ke ngay asalanan ay tuyani at yud e asalanan te, di e malong, laman fagayu taw sumaful te, di e asalanan.

³³ “Am ngay taw Israel nu nababawan way sat ngay fawayan aroro anke asalanan sa emu, ay kanya fagayu nu kafoli tua sa emu ay nu gseg tua am ngayan, ay nu gdarangin tua ay get am fanggubukun ste sim bale,

³⁴ dungugani tua ban anya fagayu sanya sis banwa ay falyami tua ban at ngay asalanan, ay fafolii anya fagayu sam nafon sat ngay mangaguyang fag talun.

³⁵ “Ay nu dway ban o gfadasug ya arak aroro am ngay taw anke asalanan sa emu, ay kanya ban fagayu nu gdarangin tua gsalubang sam bale, ay nu gfauseganan tua ban emu, ay gubun at ngay asalanan aroro nafaurianan o anya fagayu,

³⁶ dungugani tua ban anya fagayu sanya sis banwa. Ay falyami ban am ngay fagsuguan fag ngay taw Israel at ngay asalanan. Foyungi anya fagayu laman matuyan tua nu gbanwan, ay fadasugi arak sa am nafon sa anya fagayu fag talun laman at fagagbilugun.

³⁷ “Nu nke fanlunus ban ste fag daga, ay mannga at ngay tanum kalangke ay liung ay tengad gfamin, ay at ngay fawayan gligung at ngay furuan, ay nu ndasug nusnge wain fag fakasaitun,

³⁸ ay am ngay taw Israel nu gdarangin tua ay nu get tua gubuk aroro sat fagidapun ay nu gfalugde tua at daluap ste fag bale,

³⁹ dungugani anya fagayu sanya sim fagbanwanan sis banwa, ay falyami at ngay asalanan, ay fakamuluni sas galay sik taw kata at nafakamulun, aroro saful way o at mesa amatanganan. O way lang tagsaful fagayu taw at amatanganan.

⁴⁰ Fakamuluni sa anya fagayu takatanya laman kanya fagayu gsuyu tua emu kaduge gbanwan sim nafon sa em ngay mangaguyang fag talun.

^41-42 “Ay tibak talun ban at ngay taw nu nadungug te, mabalyanan o ay madulo, ay kanya ban fagayu nu nalao stae laman nanseg emu ay gdarangin gsalubang ste fag bale,

⁴³ dungugani tua ban anya fagayu sanya sis banwa am fagbanwanan. Ay foni at ngay fagetun, laman fagayu gaban taw sas fagdaul daga tumoglag ay gsuyu emu kata am ngay taw Israel ay sumaful te, gfauseganan ami emu ste ku nafawat fag bale.

⁴⁴ “Nu nasugu ban o am ngay taw laman namawayan at ngay fawayan, ay kanya ban fagayu nu gdarangin tua sa emu gsalubang ste fag furuan ay ste fag bale ku nafawat laman gfauseganan emu,

⁴⁵ dungugani tua ban at ngay darangin nu get sa emu sanya sis banwa, ay fababoi anya fagayu.

⁴⁶ “Am ngay taw nu nke asalanan sa emu (aroro we taw at yud e asalanan!) ay nu ndotama o ay namon anya fagayu sat ngay fawayan, at nantaban anya fagayu ay nangubung sit sadili talun, dewa ngayayu ay munakbang,

⁴⁷ ay kanya ban fagayu nu nafabali tua at amatanganan, ay nu naubun tua at asalanan ay nafainfanyuan glong sa emu te, ‘Anke asalanan ami ay nafakamulun ami at mauri,’

⁴⁸ ay kanya fagayu nu kafoli sa emu nu fagdaul tua at amatanganan, dewa yay sit fagatabananan fag talun, ay nu gdarangin tua sa emu gsalubang ste fag talun am nafon sat ngay mangaguyang, ay ste fag furuan ay ste fag bale ku nafawat laman gfauseganan emu,

⁴⁹ dungugani anya fagayu sis banwa am fagbanwanan, ay balusi at ngay fagetun ay fababoi,

⁵⁰ ay falyami am ngay taw at ngay fakamaboun, ay ngay taw nangus at nataban anya fagayu umfanyu.

⁵¹ Aroro tuy am nafili fag ngay taw laman am fagagbilugun, am nataban siginans Igiptu fag talun takata sik faygangan daul tagigang.

⁵² “Dungugani angku am fagsuguan ay am ngay taw Israel nu get ami gubuk, ay balusi at ngay darangin sa emu.

⁵³ Aroro nafili o anya fagayu siginans fagayu gaban taw sis fagdaul daga laman am fagagbilugun. Yawi em Fun, nafoyung wo takatanya siginan am fagsuguan Muisis gina o gtaban em ngay mangaguyang siginans talun Igiptu.”

⁵⁴ Sulumun kaduge gdarangin, gtudan sis salubangan fagirugan fanggalangun laman sas Yawi, ay gfabat at ngay take sas banwa. Ay nu ntabu gdarangin,

⁵⁵ kanya anlindug ay nafadante fagayu taw Israel at maful, ay maksvn nu glong te,

⁵⁶ “Segi Yawi, aroro nafae fagmanabayanun antam fag ngay taw Israel, kata at fatuyanan. Kanya nafafasludan fagayu at fatuyanan sat fagsuguan Muisis.

⁵⁷ Yawi tam Dius sumawa nangus fia antam, kata nu gufud tam ngay mangaguyang. Ay wa ban nangus gubun ay gfabayan antam.

⁵⁸ Kanya ban nangus ggubuk tua antam laman gbanwan tua tam kata at balyawvtan ay nu gfaning tua tam at ngay foyungan ay at ngay faugali at nafon sa tam ngay mangaguyang.

⁵⁹ Ku ngay fagetun nangus takatatuy si tua gugats Yawi tam Dius at daga salubangan laman gfababo angku at fagsuguan ay anggan at ngay taw Israel, galay tam e fagayudanun.

⁶⁰ Nu katanya, fagayu ban gaban taw sas fagdaul daga sumaful te, we tibak Dius sas day Yawi.

⁶¹ Matuyan tua ban am nangus gugat sas Yawi tam Dius. Ay faningi at ngay suguan ay at ngay faugali, kata ay fakamulun katsi.”

Nu Gfadante Yawi at Bale

⁶² Fun Sulumun ay fagayu taw Israel nafon at ngay fanggalangun sas Yawi.

⁶³ Ay Sulumun nafon sas Yawi duak safulu e duak libuk baka ay sadik sandan duak safuluk libuk tupa laman at fanggalangun sat nasadian. Katanya, fun Sulumun ay fagayu taw Israel nu gfadante Yawi at Bale.

⁶⁴ Ginanya fag menit fun Sulumun nafasaman laman sas Yawi tagsis salubangan bale fag fagawean, ay nafon fagirugun fag ngay fanggalangun, ay ngay famauseganan fag ngay fanggalangun, ay taba fag ngay fanggalangun laman sas fagmanabayanun. Kafag ngay fanggalangun wa sak ya sas fagirugan at mawatan siginans tansu aroro alay way.

⁶⁵ Kaduge labi ufatk menit Sulumun ay anggan fagayu taw Israel anful laman guseganan sas Yawi tam Dius. Fituk menit laman fagmafulun gina Kawat ngay Fayag, ay fituk menit laman gfadante Yawi at Bale. Ay ngayuk taw at kinful tagsiginans dua alvngvdan, siginans Lebu-Kamat sitsigons fagfamiluganan mamam sis talun Igiptu.

⁶⁶ Balabag di, Sulumun nafauli wan kafag ngay taw. Kafag ngay taw get sas Dius te, “Fadantei em fun.” Ay kanya fagayu guseganan guli ay masine at ngay amatanganan aroro sas Yawi at nafakamulun fagayu at masine sat fagsuguan Dabid ay sat ngay taw Israel.