1 Fun 7 - Fanawbuid tagsibaliwas Fakayabian

Sulumun Nafawat at Bale Daul

¹ At kadugean nu kawat Sulumun at bale daul, labi tuluk banwa.

² At sadi at bale nafangayan te, Araw Lebanun. Kafag bale at kabaan sadik sandank siu, ay at kadaulan duak safulu e limak siu, ay at kabatan tuluk safulu e limak siu. Ay e ufatk talad turuk sidru.

³ Tagsit tungud bakban fag ugun mawatan yangay siginans kayu sidru. Ay e ufatk safulu e limak faglafe, labi lima galay sik talad.

⁴ Si tagsalubangan fag bale at tigyangan e tuluk talad fagbanawanan gtaladan.

⁵ Ay e tulu yangayk talad sakbawan gsalubangan.

⁶ Ay at sadi yak bale tangayu at turuk sanya at fagnangafulan. At kabaan duak safuluk sangbada, ay at kadaulan labi limak sangbada. Ay si baliwas fagunan e tangbi maugunan, ay ngayuk turuk.

⁷ Nawat yangay sik bale ay nafasakbo sanya at faglunggungan. Ay nafangayan kafag bale te, Fagnanginsafulan fag Bale. Sanya fun Sulumun nu ginsaful ngay taw at mamalong. At ngay dingding mafalaniban balse sidru, siginans salug sitsigons bakban.

⁸ Ay fun Sulumun at fagbanwanan fag bale si baliwa at bale daul at day guyuy, ay sanya wan nu nanginsaful. Ay katanya yay nu mawatan. Katanya yangay at nafawat fag bale laman sat bubay, Igiptu at fun at baguina.

⁹ Fagayu at nafawat fag ngay bale, siginans fagtungkudan anggan sa sangay ugun, mawatan siginan at masine fia fag ngay gang at mafadasdasan ay at mafasudsudan.

¹⁰ Ay at fagfatungkudan mawatan siginan tagbia ayu daul ay at masine fag ngay gang. Ay kanya fag ngay gang at kabaan safuluk siu, ay tiba waluk siu.

¹¹ Ay sis tungud fagfatungkudan e ngay kayu sidru ay at masine fia fag ngay gang madalusan kata at nafasud.

¹² Ay at fagawean maligung alad at mawatan siginan at madasdasan fag ngay gang gtudtungudan tulu ay e ngay bakban kayu sidru. Katanya yangay nu gfawat ngay alad sis Yawi at bale ay sis tangbi.

Ngay Fagagbilugun sis Yawi at Bale

¹³ Fun Sulumun nafauro Kiram siginans furuan Tiru,

¹⁴ aroro kanya sik takawat ngay tansu. Kiram at mina sik fagbubayun siginans Naftali at gaban, ay at mama sik takawat yangay ngay fagagbilugun at fangawat tansu. Kiram nalao sas fun Sulumun ay nafakamulun fagayu at nafafakamulun sa anya.

¹⁵ Kiram nawat duak turuk at mawatan siginans tansu. Galay at sadi labi waluk siu at kabatan, ay labi duak siu at kadaulan nu mabalulang.

¹⁶ Ay kanya nawat yangay kafag duak turuk at mesa alfuyu at fangawat tansu, galay at sadi limak siu at kabatan.

¹⁷ At famasine sanya fituk salambitan gtadtabingan,

¹⁸ ay e duak talad famasine takata sik ngay tangbul at rawvg.

¹⁹ Ay tagsis tangbi fag duak turuk at mesa alfuyu kata sik barugwak, at kabatan ufatk siu.

²⁰ Ay galay si sik alfuyu e duak turuk mafasafungan duak talad ke duak sandank famasine takata sik tangbul at rawvg.

²¹ Kiram nawat kafag duak turuk sis salubangan Yawi at bale. Tagsis fasiunan fag turuk nafangayan te, Yakin, ay tagsis fawalan nafangayan te, Buas.

²² Ay kafag duak turuk at mesa alfuyu kata barugwak at kawalungan. Nu katanya, antabu wan nu kawat kafag ngay turuk.

²³ Sanya ginan, Kiram nawat tagbia fag fagfegusan at nafangayan te, Dagat. At kabasadan limak siu, ay at kadaulan safuluk siu, ay at kadaulan sat ligung tuluk safuluk siu.

²⁴ Ay kafag fagfegusan masafungan duak talad famasine sit daga biul. Galay sik siu masafungan safuluk takatanya fag ngay famasine. Nu kawat kafag ngay famasine gasfuan wan nu kawat kafag fagfegusan.

²⁵ Kanya fag fagfegusan mafatungkudan sis labi duak baka tama, mawatan siginans tansu. At tuluk baka gsalubang sas fawalan fag alvngvdan, ay at tulu sas fakayabian, ay at tulu sas fasiunan fag alvngvdan, ay at tulu sas fakamenitan.

²⁶ Kanya fag fagfegusan at kadamvlan ufatk sumyu, ay at biul kata sik taya at matangwa takata sik barugwak. Ay nu gbilug labi sadik libuk baringan mamam.

²⁷ Ay Kiram nawat yangay safuluk fagfatungkudan at ke balingkitan mawatan siginans tansu laman fangaut mamam. Galay sik fagfatungkudan at kabaan ufatk siu, ay at kadaulan ufat yangayk siu, ay at kabatan tuluk siu.

²⁸ Katatuy ngay fagfatungkudan nu mawatan: e ngay dingding nafadafut sa sangay fanamang,

²⁹ ay e ngay famasine ngay liun at aninu, ay baka tama ay ngay awatan at ke fakfak. Dewa sit tungud ay sit daga dingding katanya yay at ngay famasine takata ngay barugwak.

³⁰ Galay sik fagfatungkudan e ufatk fabalingkitan at mawatan siginans tansu, ay e ngay batangan at mawatan yangay siginans tansu. Sas galay fagfatungkudan at fugungan e ngay turuk fantukud fagfegusan at mawatan siginans tansu. Kafag ngay turuk mafasinean takata sik ngay barugwak tagradrabingan.

³¹ E mabalulang tagsakfo sik siu sis tungud fagfatungkudan. Kafag mabalulang at kadaulan sik siu gwabilug. Sit daga tigyangan matagisan laman at famasine. Kafag ngay fagfatungkudan at ngay tigyangan at kabatan ay at kadaulan gsud yay, ay wa mabalulang.

³² Ay si sangay daga dingding e ufatk fabalingkitan masugfunan sa sangay batangan, ay nu kawat tuy fagayu, gasfuan nu kawat fagfatungkudan. Galay fabalingkitan at kabatan sik siu gwabilug,

³³ ay kata sik faguyudan at fabalingkitan. At ngay batangan, ay at fantukud, ay at fabalingkitan, at fangawat tansu.

³⁴ Galay sik fagfatungkudan e ufatk fagtedan, sadi galay tigyangan.

³⁵ Ay si sa ngay tungud fagfatungkudan e sik mabalulang at kabatan sik dango. Ay at ngay fantukud ay at dingding nawat gasfuan nu kawat fagfatungkudan.

³⁶ Ay nafae famasine sit ngay dingding ay sit ngay fantukud sik aninu ngay awatan at ke fakfak, ngay liun, ay layag nusnga nda kafag ngay famasine nu marirukan. Ay sit ligung e ngay famasine yangay takata sik ngay barugwak tagradrabingan.

³⁷ Katanya Kiram nu kawat kafag safuluk fagfatungkudan. Fagayu gsud yay at kadaulan ay at kawalungan, aroro sadi way at fagfasudan.

³⁸ Kiram nafawat yangay safuluk fagfegusan daul mawatan siginans tansu, sadi galay sik fagfatungkudan. Ay kafag ngay fagfegusan at kadaulan ufatk siu ay at fagsakun duak sandan duak safuluk baringan mamam.

³⁹ Ay Kiram nafoli at limak fagfatungkudan sas fasiunan fag alvngvdan ay at lima sas fawalan. Ay nafoli tagbia fag fagfegusan at nafangayan te, Dagat, sis wabilug fakamenitan ay fakayabian sis Yawi at bale.

⁴⁰ Ay Kiram nawat yangay sik ngay fagfegusan ayu daul, ay tagbia fag ngay saruk, ay ngay taya fagsuadan famaramsig fag taguk. Ay kanya nafatabu nu kawat fagayu fagagbilugun sis Yawi at bale kata fun Sulumun at suguan anya. Kanya nawat:

⁴¹ duak turuk; ay duak takata tagbia fag taya kafag duak turuk at alfuyu; ay duak salambitan gsugfunan at famasine ngay turuk at alfuyu;

⁴² ay ufatk sandank takata tangbul at rawvg, (kafag duak talad takata tangbul at rawvg masugfun sas galay sik famasine fag salambitan at mafasafungan si sangay turuk at mesa alfuyu);

⁴³ ay safuluk fagfatungkudan ay tagsanya fag safuluk fagfegusan;

⁴⁴ ay fagfegusan at nafangayan te, Dagat, ay sit daga fag labi duak tama baka;

⁴⁵ ngay fantaga nagdafugan, ngay saruk tagbia, ay ngay taya fagsuadan famaramsig fag taguk. Fagayu fagagbilugun Sulumun at nafawat sas Kiram laman sas Yawi at bale mawatan siginans tansu at nafadalusan.

⁴⁶ Fun Sulumun nafawat kanya fag ngay fagagbilugun sis fakawatan tagsis datag Urdan sis wabilug Sukut ay Saretan.

⁴⁷ Sulumun wa nafabudbungguan ya kafag ngay fagagbilugun aroro ngayu mandi, ay wa kasaful ya te, seyuk fabudbungguan kafag ngay tansu.

⁴⁸ Fun Sulumun nafawat yangay ngay fagagbilugun laman sas Yawi at bale: sik fagirugan fanggalangun mawatan siginans gintu; ay fagfatungkudan at mawatan siginans gintu laman fagfatungkudan tinapay fanggalangun sas Dius;

⁴⁹ ay tagsis salubangan at Mafasamanan Fia fag Suluk fag ngay fagfatungkudan salung, at mawatan siginans gintu, mesa lima sit dua tigyangan; ay famasine fag ngay barugwak at mawatan siginan at yud e suglat fag gintu, ay ngay salung ay fanikfit;

⁵⁰ ay ngay fagfegusan at mawatan siginans gintu, ngay famagud fagigangan, ngay taya fagsuadan famaramsig fag taguk, ngay fantaga nagdafugan, ngay famanus famaebebanglu fag lune, ay fansayang at mawatan siginans gintu at yud e suglat laman sas faningding sakbawan tagsat Mafasamanan Fia fag Suluk, ay sas falangganan daul.

⁵¹ Fun Sulumun gina ntabu gfawat Yawi at bale, kanya nafasakbo sas fagfungsuan tagsis Yawi at bale ngay fagagbilugun kata sanbung salapi ay gintu ay tiba ya. Kanya at mama Dabid at nafasaman laman sas Yawi.