1 Fun 6 - Fanawbuid tagsibaliwas Fakayabian

Sulumun nu Gfawat Yawi at Bale

¹ Fun Sulumun nafasigad nu gfawat Yawi at bale gina sis faufatk sandan waluk safuluk banwa siginan ngay taw Israel nu glao siginans talun Igiptu, ay gina sis faduak magdanun, Sib fag magdanun, sis faufatk banwa Sulumun nu gfunan Israel.

² Yawi at bale at kabaan unumk safuluk siu, ay at kadaulan duak safuluk siu, ay at kabatan tuluk safuluk siu.

³ At tangbi sis sakbawan sis salubangan falangganan, duak safuluk siu at kabaan, ay at kadaulan gsud yay Yawi at bale, ay safuluk siu at kadaulan siginans dingding sitsigons fasfasan.

⁴ Fun Sulumun nafawat yangay ngay fagbanawanan, ay at kadaulan si sad bale labi yap tua tagsibaliwas lod bale.

⁵ Ay kanya nafawat yangay sik ngay suluk sis tigyangan bale, ay kafag ngay suluk gtudtungudan tuluk salug, ay mataba sas alad.

⁶ Taguna fag salug at kadaulan limak siu, ay at faduak salug unumk siu, ay at fatuluk salug, fituk siu. Ay at dingding kayangfis sat tungud baliwa, aroro nafae ngay tana fagfatungkudan ngay salug, laman wa gfae bakban ya.

⁷ Ay gina namawat Yawi at bale, nafadasdas wan ngay gang siginan at fagnamulan, nu katanya, we kadungug ya atuk siginan nu gagbilug ngay fagagbilugun sa nu gbale, kata sanbung fag famulpug, ay famadalusan kayu ay tiba yak fagagbilugun.

⁸ Dalan tagsa taguna fag salug si baliwas fasiunan fag alvngvdan bale. Ay e ngay talangtang tagsat fadua ay sat fatuluk salug.

⁹ Ay nu nafae dingding wan Yawi at bale, Sulumun nafae famalanib sis daga ugun, sik ngay balse sidru.

¹⁰ Ay tagsi sangaba day bale fag ngay suluk, at kabatan limak siu gsugfunan, masugfun sis Yawi at bale siginan sik ngay bakban sidru.

¹¹ Yawi nalong sas fun Sulumun te,

¹² “Nu gfaning tuo ku ngay suguan ay ku ngay faugali sabaliwa tuy fag bale am fagnamawatun, namafasludan kban sa emu ku fatuyanan sam mama Dabid.

¹³ Ay namanwan kban sam fagnamawatun fag bale magamut ku ngay taw, ay kwa ban gaiyan anya fagayu.”

¹⁴ Ay fun Sulumun nafatabu nu kawat Yawi at bale.

Yawi at Basad Bale

¹⁵ Tagsisad basad bale fag ngay dingding mafalaniban balse sidru siginans salug sitsigons famalanib ugun. Ay at salug balse sipres.

¹⁶ Ay kanya nafae suluk sis basad bale siginan nu gfae dingding fanwabilug, laman kawat at Mafasamanan Fia fag Suluk. Kafag dingding mawatan balse sidru.

¹⁷ Ay at falangganan ufatk safuluk siu at kabaan.

¹⁸ Ay sisad bale fag ngay dingding fagdaul mafalaniban balse sidru, nu katanya, ngay gang sis dingding wa kalag. Ay sanya fag famalanib marirukan ngay barugwak ay tagwatan fag ngay tanum.

¹⁹ Fun Sulumun nafalganan at Mafasamanan Fia fag Suluk tagsis Yawi at bale laman fagfasakboan Fagsuadan Nasadian.

²⁰ Ay kafag suluk at kadaulan, ay at kabatan ay at kabaan gsudan way duak safuluk siu. Ay fun Sulumun nafadafut gintu sat ngay dingding ay sat famalanib ugun, ay anggan sat fagirugan fanggalangun at mawatan kayu sidru.

²¹ Ay anggan tibak afud bale nadafut yangay gintu. Kanya nafawat sik salambitan at mawatan siginans gintu, ay nafarabing sis dalan tagsat Mafasamanan Fia fag Suluk.

²² Ay fagdaul basad bale madafutan gintu, anggan fagirugan fanggalangun tagsit Mafasamanan Fia fag Suluk.

²³ Sit Mafasamanan Fia fag Suluk nafawat siginans kayu ulibu duak awatan at ke fakfak. Kanya fag duak awatan at kabatan safuluk siu.

^24-25 Kafag duak awatan at ke fakfak gsud yay ay katanya yay at kawalungan. Fagdua e mesa fakfak at kabaan limak siu gsugfunanan.

²⁶ Ay at kabaan siginan sik langbud fakfak ay sa sik langbud fakfak safuluk siu gsugfunanan.

²⁷ Fun Sulumun nafasalubangan tuy fagdua ay nafasakbo sat Mafasamanan Fia fag Suluk, ay at ngay fakfak marafadan. At sadi at fakfak mesa gtayuk sas dingding, ay at sadi gdaddasugan ay gtiu sas suluk.

²⁸ Ay kanya fag duak awatan ke fakfak nadafutan yangay gintu.

²⁹ Ay sis fagduak suluk at ngay dingding fun Sulumun nafariruk sik ngay takata awatan at ke fakfak, layag, ay ngay barugwak at marafadan.

³⁰ Fagduak suluk at salug madafutan yangay gintu.

³¹ Ay sakbawan tagsat Mafasamanan Fia fag Suluk e duak faningding mawatan siginans kayu ulibu. Ay tagsis sakbawan at ligung fag ngay balse e limak balagyangan.

³² Sanya fag ngay faningding sakbawan nafariruk yangay ngay awatan ke fakfak, layag, ay at marafadan fag ngay barugwak, ay nadafut gintu.

³³ Sulumun nafawat sik sakbawan at mawatan kayu ulibu, fagsakboan sas falangganan. Kafag sakbawan kadaul faufatk afud bale.

³⁴ Ay nafawat yangay duak faningding sakbawan at mawatan siginans kayu sipres. Galay sik faningding e duak afud takafalut.

³⁵ Ay sanya fag faningding sakbawan nariruk yangay ngay awatan ke fakfak, layag, ay at marafadan fag ngay barugwak, ay nadafut gintu sa sangay rirukan.

³⁶ Ay nafawat yangay bale at day dingding at mafaligungan alad at mawatan siginans gintu. Ay galay nafatudtungudan tuluk gang mafadalusan, nafatungkud sit tungud sik kayu sidru.

³⁷ Gina sis faduak magdanun, Sib fag magdanun, ay sis faufatk banwa fun Sulumun nu gfunan, nawat wan fagfatungkudan Yawi at bale.

³⁸ Ay gina sis fawaluk magdanun, Bul fag magdanun, sis falabi sadik banwa fun Sulumun nu gfunan, antabu wan nu kawat Yawi at bale kata at marirukan fag ngay algan. Ay at kadugean nu kawat fituk banwa.