1 Fun 5 - Fanawbuid tagsibaliwas Fakayabian

Nu Gfalganan laman Kawat Yawi at Bale

¹ Kiram, Tiru at fun, fun Dabid at fagadgalangan. Ay fun Kiram nu nasaful te, Sulumun natubus at mama Dabid laman sik fun, kanya nasugu at ngay fagsuguan fag ngay tagfangguna sas fun Sulumun.

² Ay fun Sulumun nafabuba sa kafag ngay tagfangguna sik longan sas fun Kiram te,

³ “Saful wo te, ku mama Dabid wa nke buknga kawat Yawi at bale, aroro gfawayan way gugat sit ligung fag ngay talun. Ay aroro Yawi wa nafababo anya sat ngay fawayan.

⁴ Ay katsi, Yawi nafon angku fagmanabayanun nusnga nday, ay kdi e fawayan ay di e malimu ya.

⁵ Nu katanya katsi, namatangan au te, namawat kwan Yawi at bale, kata Yawi at suguan sa ku mama Dabid te, ‘Am baguama ban, ku famaungbus emu laman sik fun, kanya ban at namawat sik bale laman sa angku.’

⁶ Nu katanya, sugui am ngay fagsuguan laman namuan sik ngay kayu ayu daul tagsiginans Lebanun laman sa angku. Ay ku ngay fagsuguan nanggubuk ban am ngay fagsuguan, ay namayad kban sa emu nu seyu am fagetun. Aroro nasaful o te, ste si emi we kata am ngay taw Sidun tagsaful gfuan ngay kayu.”

⁷ Kiram maksvn nu guseganan nu nadungug Sulumun at longan. Nu katanya, kanya nalong te, “Segi Yawi, aroro katsi kanya nafon sas Dabid sik baguama at mamatanganan laman at nanfunan ste fag talun at mabalyanan.”

⁸ Ay Kiram nafadasug sik longan sas fun Sulumun ay glong te, “Nadungug au am longan am nafadasug sa angku. Nu katanya, namon au sa emu am fagetun fag ngay kayu sidru ay sipres.

⁹ Ku ngay fagsuguan namuba ban kafag ngay kayu siginans Lebanun sitsigons dagat. Ay kanya ban fagayu namalimusan sas dagat kafag ngay kayu ay namadasug ban sam nalong fag buknga. Ay nu ndasug ban sanya, ku ngay fagsuguan yay tagluas, ay at namuba ban sam fagbalean am ngay fagsuguan wan. Ay foni angku ngay fakonun laman e fakonun ktua sa ku bale.”

¹⁰ Nu katanya, Kiram nafon sas fun Sulumun at fakaylatun fag ngay kayu sidru ay sipres.

¹¹ Galay banwa, fun Sulumun gfon sas fun Kiram duak safuluk libuk saku fangawat tinapay, ay duak safuluk libuk baringan langis ulibu.

¹² Nu katanya, Yawi nafon fagmamatanganun sas fun Sulumun kata at fatuyanan. Nu katanya, fun Kiram ay fun Sulumun ggadgalangan tua, ay nawat sik nasadian te, di ban gawayan.

¹³ Nu katanya, fun Sulumun nafabulun nafafakamulun tuluk safuluk libuk taw siginans fagdaul talun Israel.

¹⁴ Ay nafud kanya fag ngay taw sas tuluk gaban, ay galay sik gaban safuluk libu. Ay kanya gfaungbusan kafag tuluk gaban, galay sik gaban nu sis Lebanun sadik magdanun ay nu sit talun duak magdanun. Ay Aduniram tagfangguna kafag ngay taw tagfakamulun.

¹⁵ Fun Sulumun e fituk safuluk libuk tagbuba ngay fagagbilugun, ay e waluk safuluk libuk tagdasdas gang tagsi sangay buksul.

¹⁶ Ay ang yangay e tuluk libu tuluk sandank tagulit kanya fag ngay tagfakamulun nu gfakamulun.

¹⁷ Kata fun Sulumun at suguan, kanya fag ngay taw nadasdas tagbia fag ngay gang laman fangawat Yawi at bale at fagmatungkudan.

¹⁸ Fun Sulumun ay fun Kiram at ngay tagsaful kawat bale ay anggan ngay taw tagsiginans Gebal, nafadalusan ngay gang ay nafalganan ngay balse laman fangawat Yawi at bale.