1 Fun 4 - Fanawbuid tagsibaliwas Fakayabian

Sulumun at ngay Tagfagtainan

¹ Sulumun nafunan fagdaul Israel.

² Fun Sulumun at ngay tagfagtainan: Asarya, Saduk at baguama, gfakamulun laman sik fun tagfon fanggalangun.

³ Elikuref ay Akya, Sisa at ngay baguama, gfakamulun laman sik tagriruk. Ay Eusafat, Akilud at baguama, tagalaga ngay rirukan sit fagfagtainanan.

⁴ Benaya, Euyada at baguama, gfakamulun laman sik fun tagfawayan. Saduk ay Abyatar gfakamulun laman sik tagfon fanggalangun.

⁵ Ay Asarya, Natan at baguama, gfangguna ngay tagfangguna fagayu afud talun Israel. Sabud, Natan at baguama yangay, gfakamulun laman fun Sulumun at tagfalu longan.

⁶ Akisar, gfakamulun laman sik tagfangguna sis fun at bale daul. Ay Aduniram, Abda at baguama, tagfangguna ngay tagafabulunan fag ngay fagsuguan.

⁷ Fun Sulumun e nafili yangay labi duak tagfangguna sa sangay afud talun Israel. Kanya fagayu tagfaful fun Sulumun talanan at ngay fagayudanun. Galay magdanun sik tagfangguna tagfon fakonun.

⁸ Kayu tuy at ngay ngayan: Ben-Kur, tagfangguna sas Efraim at fagagbilugun fag ngay buksul.

⁹ Ben-Deker, tagfangguna sas Makas, Saalbim, Bet-Semes, ay Elun-Bet-Anan.

¹⁰ Ben-Kesed, tagfangguna sas Arubut, magamut yangay Suku ay fagdaul talun Kefer.

¹¹ Ben-Abinadab, tagfangguna sas Nafut-Dur. (Kanya nafamubay Sulumun at baguina Tafat.)

¹² Baana, Akilud at baguama, tagfangguna sas Taanak, Megidu, ay fagdaul Bet-San munakbang sis Saretan sis daga Esreel ay siginans Bet-San sitsigons Abel-Mekula ay gdife sas Ukmeam.

¹³ Ben-Geber, tagfangguna sas Ramut-Gilyad, magamut Yair, Manase at baguama, at ngay furuan, ay anggan talun Argub sis Basan, sanya e unumk safuluk furuan ayu daul at maaladan gang, ay at ke faningding sakbawan at mawatan tansu.

¹⁴ Akinadab, Iddu at baguama, tagfangguna sas Makanaim.

¹⁵ Akimaas, tagfangguna sas Naftali. (Kanya nafamubay Sulumun at baguina Basemat.)

¹⁶ Baana, Kusay at baguama, tagfangguna sas Aser ay Alut.

¹⁷ Eusafat, Parua at baguama, tagfangguna sas Isakar.

¹⁸ Simei, Ela at baguama, tagfangguna sas Benamin.

¹⁹ Geber, Uri at baguama, tagfangguna sas Gilyad, ebi ataw Sikun, taw Amur at fun, ay Ug, Basan at fun. Ay Geber way lang tagfangguna sanya.

Sulumun at Ramraman ay Fagsafulun

²⁰ Ngay taw Uda ay ngay taw Israel kayu lagnas tagsis tigyangan dagat. Ngayu at fakonun ay at fanginum, ay kanya fagayu guseganan.

²¹ Fun Sulumun gfunan fagayu fagfagtainanan siginans Liskung Eufrates ay taw Filistia at talun sitsigons fungfung talun Igiptu. Kafag ngay fagfagtainanan gfon famayad sa anya, ay kaduge fun Sulumun gleleg, kanya fagayu gfababaun sa anya.

²² Kayu menit kayu tuy fun Sulumun ay fagayu tagbanwan sit bale at fakonun: sadik sandank saku at masine fag fangawat tinapay, ay duak sandank saku at maugali fag fangawat tinapay,

²³ safuluk baka at nafataglu sis ubung, duak safuluk baka riangan siginans fagnamafangonan, sadik sandank tupa ay kambing, ay saman ya ngay arasyo, ay mataglu fag ngay manuk, ay at masine fag gaban manuk tungud.

²⁴ Sulumun gagbilug fagdaul Liskung Eufrates tagsabaliwas fakayabian siginans Tifsa sitsigons Gasa. Ay manabayan nu gbanwan nusnga nday fag furuan.

²⁵ Nu katanya, fagayu taw sis talun Uda ay Israel, siginans Dan sitsigons Beerseba manabayan nu mabanwan. Ay kaduge Sulumun gleleg, galay sik taw e fagmanabayanun tua gmalunggung sit ngay mesa daga tanuman wat ubas.

²⁶ Fun Sulumun e ufatk safuluk libuk fagubungan kabayu laman sa sangay kabayu at ke faguyudan fangawayan ay e labi duak libuk tagakabayuan.

²⁷ Ngay tagfangguna sa sangay afud talun tagfon fakonun sas fun Sulumun ay sas fagayu tagbanwan sit bale daul. Ay galay sik tagfangguna nu gfon at fagayudanun sik magdanun kayu banwa.

²⁸ Ay kanya fagayu gfon yangay sas fun Sulumun ngay barli ay nagbiluganan laman famaug at ngay kabayu. Ay gbuba kafag ngay famaug sat fagfafangonan.

²⁹ Dius nafon sas fun Sulumun fagsafulun ay fagmamatanganun ay at fagmatogdungugun at yud e mafasud.

³⁰ At fagmamatanganun gtungud tua sas fagayu taw tagsis fakamenitan ay at ke fagsafulun fag ngay taw sis talun Igiptu.

³¹ Kanya nu mamatanganan, gtungud tua Etan fag taw Esra, ay Eman, Kalkul ay Darda, Makul at ngay baguama. Fun Sulumun kadungug tua sat tiba fag ngay talun.

³² Fun Sulumun nariruk tuluk libuk fangatulun ay sadik libu e limak alubad.

³³ Kanya naringang sabaliwas fananum, siginan tagbia ayu daul fag fun kayu, anggan sa talay ayu sirut fag ngay fananum. Ay naringang yangay sabaliwas nusnga setaw fag tagleleg, taglao, tagalafangan, taglayug ay tagfioan.

³⁴ Sulumun at fagsafulun andungug sas fagayu talun at ngay fun, nu katanya, kafag ngay fun nasugu sik ngay taginsaful laman nandungugan fun Sulumun at fagsafulun.