1 Fun 3 - Fanawbuid tagsibaliwas Fakayabian

Yawi Gfon Fagsafulun sas Sulumun

¹ Sulumun nawat sik nasadian sas Faraun, talun Igiptu at fun, ay andadwa sa kafag fun at baguina. Ay kanya nataban at mangena sas Dabid at furuan ay sanya nu gbanwan yakmay antabu nu kawat at bale, ay Yawi at bale, ay anggan Erusalem at alad.

² Ginanya ngay taw nu gfon at ngay fanggalangun sa yay sangay bale fagnansegan sa tangabat fag ngay buknga, aroro ya nawat Yawi at bale laman sanya nu gfauseganan Yawi.

³ Sulumun nafalag sas Yawi te, kesug anya, siginan nu gfaning at mama Dabid at ngay foyungan. Ay dewa katanya, nafon at ngay fanggalangun ay nanangirug yay ngay famaebebanglu fag lune sa sangay fagnansegan sa tangabat fag ngay buknga.

⁴ Sik menit, fun Sulumun nasas furuan Gibyun aroro sanya takadungug fag fagnansegan si tangabat fag buknga, ay kanya nafon sadik libuk fagirugun fag fanggalangun.

⁵ Ay nu nyabi wan, Yawi ansure sa anya siginan sik taginfan ay nalong anya te, “Eti nusnga setaw ay gfon kro sa emu.”

⁶ Ay Sulumun nabalus te, “Nafalag o am fagmatuyanun sa ku mama Dabid, am fagsuguan, aroro kanya matuyan sa emu, ay anggan nu gbanwan matuyan yangay. Gtaglayun o am fagmasineun siginan nu gfon o anya sik baguama at nantubus anya laman sik fun.

⁷ Ay katsi, Yawi, ku Dius, au am fagsuguan at natubus ku mama Dabid laman sik fun, dewa au sik mabaguama yay ay kye fagsafulun.

⁸ Ste au gfadgaloan am ngay taw at yud katap at kayuan.

⁹ Nu katanya, foni sa angku sik fagsafulun laman mafangguna au am ngay taw, ay sumaful au at matuyan ay at mauri. Sinu nunda at mananfunan am ngay taw, ay kanya fagayu ngayu mandi?”

¹⁰ Ay Fun Dius naylat Sulumun at fagetun.

¹¹ Nu katanya, kanya nalong sas Sulumun te, “Aroro naet tuo sik fagsafulun laman mafangguna o ku ngay taw, ay di o naet tangaba fag leleg ay ngay ramraman ay di o naet te, ‘Fabuli ku ngay fawayan,’

¹² gfon au emu fagayu am fagetun. Gfon au sa emu fagsafulun ay fagmamatanganun at yud yay batang e nagbilug ay at yud ban e magbilug ya kabavn.

¹³ Gfon kyangay ban emu am nayud naet, ramraman ay fagmanabayanun, laman we fun tagfasud emu kaduge o gleleg.

¹⁴ Ay nu gbanwan tua ban o kata ku balyawvtan, ay gfaning ku ngay suguan ay gfafasludan ku ngay longan kata am mama Dabid at nafakamulun, gfon kban emu tangaduge fag leleg.”

¹⁵ Sulumun anfulo ay nasaful te, Yawi nakamatoan anya siginan at taginfan. Ay gina Sulumun anfoli sas Erusalem, kanya namalindug sis salubangan Fagsuadan Nasadian ay nafon ngay fagirugun fag fanggalangun ay ngay fanggalangun laman sas fagmanabayanun, ay nafalganan wa vtv ngay fakonun laman sat ngay fagsuguan.

Sulumun Matuyan nu Gfawabilugan

¹⁶ Ay duak mangena tagfaebayad nanangakbang sas fun Sulumun.

¹⁷ Ay at sadi nalong te, “Mesug fag fun, au ay in fag mangena magamut ami sa sik bale, ay nafasalug au sik ngenge.

¹⁸ Ay nu nlangfe tuluk menit, anggan kanya fag mangena nafasalug yangay, ay ami way lang fagdua tagsanya fag bale.

¹⁹ Sad yabi, kanya natalfi at ngenge ay at ngenge anbul.

²⁰ Ay gina sis buknga yabi, kanya fag mangena anbangkad ay nafabadbangsian em ngenge. Nafasat day tigyangan ku ngenge ay nafasa ku day tigyangan at ngenge at mabulan gina au gtiug ngabasad.

²¹ Balabag di, gina au anfulo laman namasusu ku ngenge, nasaful au te, kafag ngenge anbul wan. Ay nanamatukan au sas mayamag kafag ngenge ay nasaful au te, bunwa kanya ku ngenge.”

²² Dewa katanya, at sadi fag mangena nabalus te, “Duan, ku ngenge way tagleleg ay emu at kinbul way.” Ay taguna fag mangena nabalus te, “Duan, am ngenge way at kinbul ay ku ngenge way tagleleg.” Ay kanya fag duak mangena gbadbaboan sis fun Sulumun at daga salubangan.

²³ Sulumun nalong te, “Fagdua am, kaylat am gagbilug tagleleg fag ngenge, ay wam e kaylat at mabulan fag ngenge.”

²⁴ Nu katanya, fun Sulumun nalong sas fagsuguan te, “Fastiei sik fiso.” Ay nafosuk sa anya sik fiso.

²⁵ Kanya nasugu te, “Baltaki tagleleg fag ngenge, ay fabaltakani anya fagdua.”

²⁶ Siginan kafag ngenge at mina nu kesug, kanya nafainfanyuan sas fun Sulumun te, “Lag gfabul kafag ngenge, foni wan sanya fag mangena.” Dewa katanya, at sadi fag mangena glong way te, “Baltaki wan kanya fag ngenge laman ro wami e magbilug anya.”

²⁷ Sanya ginan, fun Sulumun nalong sat fagsuguan te, “Lag gfabul kafag ngenge. Foni way sat nafainfanyuan fag mangena at nalong te, ‘Lag gfabul,’ aroro kanya wa at mina fia.”

²⁸ Ay ngay taw nu nadungug fun Sulumun at nafakamulun anke fakalimuun sa anya, aroro kanya fagayu nasaful te, fun Sulumun anke fagsafulun siginans Dius sa nu gfawabilugan.