1 Fun 2 - Fanawbuid tagsibaliwas Fakayabian

Dabid at ngay Fangatulun sas Sulumun

¹ Dabid nu gakabulun wan, nalong at fangatulun sat baguama Sulumun.

² Glong te, “Gakabulun kwan, nu katanya, maksvni tua

³ ay faningi Yawi am Dius at fakaylatun, siginan nu gbanwan o kata at balyawvtan, ay nu gfaning o at ngay suguan ay at ngay faugali ay at ngay fagaloan at marirukan sis Muisis at nariruk fag Faugali. Fakamuluni takatanya laman ban nusnga nday o, manabayan tuo.

⁴ Nu gfaning tua ban o takatanya, Yawi namafasludan at fatuyanan sa angku te, ‘Am ngay kasugfunanan ban nu gugali tua at masine, ay nu gbanwan tua at matuyan sa ku daga salubangan sas fagdaul at amatanganan ay at basad taw, kanya tua ban gugat tagfunan sas Israel.’

⁵ “Ay katsi, nasaful o nu setain Uab, Seruya at baguama, at nafakamulun sa angku. Kanya nafabul Israel at ngay tagfawayan at tagfangguna fagdua, Abner, Ner at baguama ay Amasa, Eter at baguama. Uab nafabul kanya fag dua kata nu sis awayan ginanya dewa yud e awayan. Sia wan at ke malong kafag duama at faginbulun.

⁶ Nu katanya, fakamuluni nu setain am namatangan sa anya, ay lag o kaylat kanya nu kabul aroro sat kadanamaan.

⁷ “Magalangi sas Barsilay at ngay baguama tagsiginans Gilyad, ay fafangoni gugat gasfuan emu, aroro kanya fagayu nagubuk angku gina au glagyu am kaka Absalum.

⁸ “Toglagi fia Simei, Gera at baguama, tagsiginans Benamin fag gaban tagsis Bakurim. Kanya nafalingun angku gina au sas Makanaim. Naladlagan ami sis Liskung Urdan ay nafatuyanan au sa anya sas Yawi at ngayan te, kwa gfabul anya.

⁹ Ay katsi, faurianani wan anya. E fagsafulun o, ay saful wo nu setain am fakamulun sa anya. Fabuli anya dewa mafufuama.”

¹⁰ Ay Dabid nu nbul, ngay taw nanamoli anya sas Erusalem.

¹¹ Dabid nafunan Israel at kadugean ufatk safuluk banwa; fituk banwa sis Kebrun ay tuluk safulu e tuluk banwa sis Erusalem.

¹² Sulumun natubus at mama Dabid nu gfunan ay ankaksvn at fagmafunanun.

Adunya Kaylat Nanfamubay Abisag

¹³ Katsi, Adunya, Kagit at baguama, ankakbang Batseba, Sulumun at mina. Batseba ginto te, “O masine tua am algan am fagnastiean?” Adunya gbalus te, “Sabv, masine ngawan.

¹⁴ E fagetun au sa emu.” Batseba ginto te, “Nataw am fagetun?”

¹⁵ Adunya gbalus te, “O saful o te, au wama fun, ay kanya fagdaul Israel at fagsegun. Dewa katanya, wa nfasludan. At fagmafunanun nasawa ku faduksay, aroro kanya Yawi at fakaylatun.

¹⁶ Katsi, sadi way ku fagetun emu, ay nu masine, lag o gfabalu.” Batseba gbalus te, “Nataw kanya?”

¹⁷ Ay Adunya gbalus te, “Nu masine, eti sas fun Sulumun te, gfamubay au Abisag tagsiginans Sunem. Saful au te, kanya ro wa yud kaylat emu.”

¹⁸ Batseba gbalus te, “Kin, glong kro sas fun.”

¹⁹ Nu katanya, Batseba nasas fun Sulumun laman nanlong anya sabaliwas Adunya at fagetun. Fun Sulumun nu nalag anya, namalindug laman namablang anya, ay narungan laman gsuyu. Ay nasugu te, “Buli sik faglunggungan sa ku mina.” Ay Batseba namalunggung sas Sulumun at siun baliwa.

²⁰ Batseba glong te, “E fagetun au sirut sa emu, ay wa ro wo nangus yud kaylat.” Ay Sulumun gbalus te, “Ay nataw am fagetun, mina? Kwa ro gfabaluanan emu.”

²¹ Ay Batseba glong te, “Fabayani am kaka Adunya nu kamubay Abisag tagsiginans Sunem.”

²² Fun Sulumun nabalus at mina te, “Wain ro am fagetun way te, fafamubayi Abisag sas Adunya? At kanya ro maet yangay te, foni sa anya ku fagmafunanun, aroro kanya ku kaka. Ay masadi sa anya tagfon fanggalangun Abyatar ay Uab, Seruya at baguama!”

²³ Sulumun gfatuyan sas Yawi at ngayan te, “Dius nangus gfaurianan angku nung kway ro nafabul Adunya aroro sat fagetun!

²⁴ Yawi nafon angku fagmafunanun fangungbus ku mama Dabid ay nafafasludan fagayu at ngay longan ay nafon angku ay ku ngay kasugfunanan fagmafunanun kabavn. Gfatuyanan au sas Yawi, tagleleg fag Dius te, Adunya umbul katsi fag menit.”

²⁵ Nu katanya, fun Sulumun nasugu Benaya, Euyada at baguama, ay kanya nafabul Adunya.

²⁶ Ay fun Sulumun glong sas tagfon fanggalangun Abyatar te, “Ulii sam tanuman sas Anatut. Masine o kabul, nute kwa gfabul ya emu katsi aroro nabuba o tam Fun Yawi at Fagsuadan Nasadian si ku mama Dabid at fagunan, ay antaip yangay o sat ngay fagagwantanun.”

²⁷ Ay fun Sulumun naiyan Abyatar siginan nu sik tagfon fanggalangun laman gfafasludan Yawi at longan ebi sas Silu sabaliwas Eli at ngay kasugfunanan.

E Nafabul Uab

²⁸ Uab wa nagubuk Absalum nu nangasik fun, dewa katanya, kanya ggubuk Adunya. Ay kanya nu nabaritan te, Adunya anbul wan, nasakbo sas Yawi at bale ramit ay gted fagirugan fanggalangun at ngay sunge.

²⁹ Fun Sulumun nu nadungug te, Uab nasuksuan sas Yawi at bale ramit ay siwas tigyangan fagirugan fanggalangun, kanya nasugu Benaya Euyada at baguama te, “Fabuli wa anya.”

³⁰ Benaya nu ndasug sas bale ramit, nalong sa anya te, “Tam fun glong te, ‘Duksuni!’ ” Ay Uab gbalus te, “Duan, kabul kwa ro ste!” Ay Benaya nafabarita sas Sulumun Uab at nalong.

³¹ Ay fun Sulumun nalong sas Benaya te, “Fakamuluni kata at nalong. Fabuli anya ay namoli wo, laman ban ami fag talanan wami kataip sa kafag ngay taw at yud e asalanan at nabulanan.

³² Yawi namaurianan Uab, aroro nafabul duama deyud ku mama nasaful. Kafag duama, Abner, Ner at baguama, tagfangguna Israel at ngay tagfawayan, ay Amasa, Eter at baguama, tagfangguna Uda at ngay tagfawayan, duama at ugali amatuyan yap Uab.

³³ Uab ay at ngay kasugfunanan ban nangus e asalanan gugat aroro at nafabulan Abner ay Amasa. Ay Yawi nangus gfafanabayan sas Dabid ay sat ngay kasugfunanan, ay at ngay kaiban ay at ngay nangungbus ban anya gfunan.”

³⁴ Ay Benaya, Euyada at baguama, nafabul Uab ay nanamoli anya sat fagbanwanan sat yud e taw fag talun.

³⁵ Sulumun nafili Benaya, Euyada at baguama, laman fangungbus Uab, fun tagfawayan, ay nafili yangay Saduk, laman fantubus Abyatar fag tagfon fanggalangun.

Simei nu Kabul

³⁶ Sanya ginan, fun Sulumun nafauro Simei ay nalong anya te, “Balei ste sis Erusalem ay banwani sanya ay wo masine gduksun siginans furuan.

³⁷ Nu nalao way ban o ay nadife Liskung Kidrun, tuyani te, umbul o, ay nu nfasludan ban sa emu takatanya, o wan at nasalan.”

³⁸ Ay Simei nabalus fun te, “Kin, namaning kban am nalong.” Ay kanya nabanwan ngaduge sis Erusalem.

³⁹ Dewa katanya, gina sis fatuluk banwa Simei nu gbanwan sanya, at fagsuguan at dua nalagyu, ay nasas Akis, Maaka at baguama, at fun sis Gat. Ay e nalong sas Simei te, “Am fagsuguan fagdua sis Gat.”

⁴⁰ Nu katanya, Simei anlindug ay nafalganan at asnu, ay nasas Gat sas Akis, laman nanrvbvy at ngay fagsuguan. Ay nu nalag nataban wan.

⁴¹ Ay e nalong sas fun Sulumun te, “Simei nasas Gat ay anfoli sas Erusalem.”

⁴² Fun Sulumun nafauro Simei ay nalong anya te, “O nunda kwa nafatuyanan sa emu sis Yawi at salubangan te, nu nalao way ban o siginans Erusalem ay nu nasa way o tibak talun, umbul ban o, ay nalong wo sa angku te, ‘Kin, gfaning kban am ngay nalong.’

⁴³ Wain am fagyudun nafae tungkul am fatuyanan sis Yawi at salubangan ay am fagnafamaboun ku suguan emu?”

⁴⁴ Ay Sulumun nalong yay sas Simei te, “Nasaful wo fia te, nafalingun wo ku mama Dabid. Ay katsi, Yawi namaurianan emu aroro sam nafakamulun at mauri.

⁴⁵ Ay Yawi namadante angku, ay Dabid at kasugfunanan ste way kabavn.”

⁴⁶ Sanya ginan, fun Sulumun nasugu sas Benaya, Euyada at baguama, laman namabul Simei. Benaya nataban Simei sas lod ay nafabul. Nu katanya, fun Sulumun ankugat yay nu gfagtainan.