1 Fun 11 - Fanawbuid tagsibaliwas Fakayabian

Sulumun at ngay Mangena

¹ Fun Sulumun nesug ngayuk mangena tagsiginan tibak talun. Saman ya fun Faraun at baguina, ay kanya e ngay mangena yangay tagsiginans taw Muab, taw Amun, taw Edum, taw Sidun ay taw Ket.

² Yawi nasalag ebi ngay taw Israel te, “Lag am nanfamubay sanya ginan fag ngay talun at taw, aroro manatabanan am nanseg tibak fagsegan.” Dewa katanya, Sulumun nananfamubay yay sa sangay mangena tagsanya ginan fag ngay talun.

³ Fituk sandan at bubay fia, ngay fun at baguina, ay e tuluk sandank mangena fagsuguan. Kanya fagayu maksvn nu gfaylatan anya.

⁴ Sulumun nu mafufuama wan, at ngay mangena nataban anya laman nanseg tibak fagsegan, ay kanya wa nakata at mama Dabid at matuyan tua sat Dius Yawi, sas fagdaul at amatanganan.

⁵ Sulumun naseg way Asturet, taw Sidun at fagsegan, ay Mulek, ngay taw Amun at fagsegan at maksvn nu mauri.

⁶ Sulumun nafakamulun at mauri sis Yawi at daga salubangan, nu katanya, kanya nu gfaning Yawi, bunwa sas fagdaul at amatanganan, wa kata at mama Dabid.

⁷ Ay Sulumun nafawat sik fagnansegan sa sik buksul sabaliwas Erusalem at fakamenitan, laman sas Kemus, taw Muab at fagsegan at maksvn nu mauri, ay laman sas Mulek, taw Amun at fagsegan at maksvn yangay nu mauri.

⁸ Ay kanya nafawat yangay ngay fagnansegan laman at ngay mangena tagsiginan tibak talun, at fagnangirugan ngay famaebebanglu, ay ngay fanggalangun sat ngay fagsegan.

⁹ Ay Yawi andotama Sulumun aroro natalyuyan anya, taw Israel at Dius, kanya dewa ansure sa anya dua ginan,

¹⁰ ay dewa nafararang anya sabaliwa takatatuy laman di galoan, kanya wa nafaning Yawi at suguan.

¹¹ Ay Yawi nalong sas Sulumun te, “Aroro nafakamulun o takatanya, ay wo nafaning ta nasadian, ay ku ngay suguan emu, gbul kwan siginan emu am fagmafunanun ay namon au sam fagsuguan at sadi.

¹² Dewa katanya, aroro sam mama Dabid, kya gfakamulun takatanya kaduge o gleleg. Namakamulun kban takatanya gina am baguama gfunan.

¹³ Ay kwa ban nangago fagdaul at fagmafunanan. Namasawad kyay sadik gaban taw Israel aroro sa ku fagsuguan Dabid, ay aroro sas Erusalem ku nafili fag furuan.”

¹⁴ Yawi nafadasug sas Sulumun sik fawayan at ngayan Adad, sik taw Edum. Adad, siginan talun Edum at fun at kasugfunanan.

¹⁵ Ay Dabid gina nanamawayan talun Edum, Uab, ngay tagfawayan at fun, nasas talun Edum laman namoli ngay kinbul, ay kanya nu ndasug sanya nafabul fagayu mangama sis Edum.

¹⁶ Uab ay fagayu Israel at ngay tagfawayan nabanwan sis talun Edum kaduge unumk magdanun yakmay nafamin fagayu mangama sanya.

¹⁷ Ginanya, Adad mamunama yay, ay kanya nalagyu sas talun Igiptu gadgaloan talun Edum at ngay tagfawayan.

¹⁸ Ay kanya fagayu nadalan sas talun Midyan ay sas talun Paran, ay nataban sik ngay mangama siginans Paran ay nataglayun sas talun Igiptu. Ay Faraun, Igiptu at fun, nafon anya sik bale ay fakonun ay anggan sik daga.

¹⁹ Ay Igiptu at fun naylat Adad ay nafadadwa sat ifag, at mangena Takpenes at arian.

²⁰ Ay Adad at bubay Takpenes at arian nafasalug sik munama ay nafangayan anya te, Genubat. Takpenes nafagurang Genubat sis fun Faraun at bale, ay kanya an-gurang magamut Igiptu at fun at ngay sisian.

²¹ Adad gina sis talun Igiptu, nadungug te, Dabid anbul wan, ay Uab, tagfawayan at fun, anbul yangay. Nu katanya, Adad naet sas fun Faraun te, “Aylati wan nu guli au sa ku talun.”

²² Ay fun Faraun nainto sa anya te, “Nataw ya am fagayudanun ste, am fagyauliun yay sam talun?” Ay Adad nabalus te, “Duan, kwe fagayudanun ya, ay nute, aylati wan nu kafoli au.”

²³ Ay Dius nafadasug yay fia sas Sulumun sadi yak fawayan, at ngayan Resun, Elyada at baguama. Elyada ebi nalagyu siginan at tagfayafun Adadeser, talun Suba at fun.

²⁴ Resun nafaful sik ngay mangama laman sik ngay takamabo. Gina Dabid namabul anya fagayu, kanya nalao sas furuan Damasku, ay nabanwan sanya, ay Resun nagbilug ay gfunan sanya fag talun.

²⁵ Resun Israel at fawayan kaduge Sulumun gfunan, ay kanya nafaidapan anya kata Adad at nafakamulun. Resun maksvn nu kadotama Israel ay gfunan sas Sirya fag talun.

Erubuam Nafawayan Sulumun

²⁶ Sulumun at fagsuguan Erubuam, Nebat at baguama, nafawayan at fun. Kanya sik taw Efraim siginans Sereda fag furuan, ay at mina sik fagbubayun at ngayan Serua.

²⁷ Katatuy at fansulitan nu gfawayan fun Sulumun. Sulumun nafasaksak sas basad furuan ay nafasine Dabid at furuan at alad.

²⁸ Erubuam maseganama. Ay Sulumun nu nalag te, maleleg, nafili anya takamangguna ngay tagfakamulun tagsiginans Use at gaban.

²⁹ Ginanya, Erubuam nalao siginans Erusalem, ay Akya fag taglong, sik taw Silu, nafablang anya si sangaba dalan. Akya galanbungan bagu,

³⁰ ay kanya nagirat at lanbung sas labi duak afud

³¹ ay nalong sas Erubuam te, “Buli safuluk girat, aroro katatuy Yawi, Israel at Dius, at longan: ‘Gananrasrasun kwan Sulumun at fagmafunanun ay namon au sa emu safuluk gaban taw Israel.’

³² Dewa katanya, si way ban anya sadik gaban aroro sa ku fagsuguan Dabid ay aroro sas Erusalem, ku nafili fag furuan siginans fagayu Israel at kasugfunanan.

³³ Namakamulun au takatanya aroro kanya natalyuyan angku ay naseg Asturet, taw Sidun at fagsegan mangena, ay Kemus, taw Muab at fagsegan, ay Mulek, taw Amun at fagsegan. Wa nafaning angku ay wa nafakamulun at masine sa ku daga salubangan laman gfaning ku ngay suguan ay ku ngay faugali, kata at mama Dabid.

³⁴ Kwa namul fagdaul at fagfunanan siginan anya, nu bunway gfamanabayan au anya gfunan kaduge gleleg aroro sa ku fagsuguan Dabid, at nafaning ku ngay suguan.

³⁵ Namul kban at baguama at fagfunanan ay namon sa emu safuluk gaban.

³⁶ Namasawad kban sat baguama sik gaban laman ku fagsuguan Dabid at ngay kasugfunanan gfataglayun nu gfunan sas Erusalem, ku nafili fag furuan laman ku fagbanwanan.

³⁷ Ay nanfili kban emu ay namangguna ban o fagayu am fakaylatun, ay namunan o sas Israel.

³⁸ Dungugani fagayu ku ngay suguan emu, ay banwani kata ku balyawvtan, ay fakamuluni at masine sa ku daga salubangan, ay faningi ku ngay suguan ay ku ngay foyungan, kata ku fagsuguan Dabid. Nu gfakamulun tua ban o takatanya, si ktua ban gugat emu ay namataglayun kban am ngay kasugfunanan nu gfunan, kata ku nafakamulun sas Dabid. Gfatigwanan kban sa emu fagdaul talun Israel.

³⁹ Aroro siginan Sulumun at asalanan, namaurianan kban Dabid at ngay kasugfunanan, ay nute ban bunwa kabavn.”

⁴⁰ Ay Sulumun gugatan gyafabulun Erubuam, ay Erubuam nalagyu sas talun Igiptu ay fun Sisak naylat anya. Nu katanya, kanya nabanwan sis talun Igiptu yakmay Sulumun anbul.

Sulumun nu Kabul

⁴¹ Ay tiba at kinfasludan gina Sulumun gfunan, ay at nafakamulun ay at fagsafulun fag ngay longan, anriruk sas fafil fagrirukan fansulitan sabaliwas Sulumun.

⁴² Ay Sulumun gfunan Israel sis Erusalem kaduge ufatk safuluk banwa.

⁴³ Ay kanya nu nbul, nanamoli anya sat mama Dabid at furuan. Ay at baguama Reubuam at natubus anya laman sik fun.