1 Fun 10 - Fanawbuid tagsibaliwas Fakayabian

Talun Syeba at Fun fag Mangena Nasibo Fun Sulumun

¹ Talun Syeba at fun fag mangena nu nadungug te, fun Sulumun kadungug tua siginan nu gfauseganan Yawi, kanya andasug laman namaskud anya siginan at maidap fag ngay fagintoun.

² Kanya andasug sas Erusalem gadgaloan at ngay fagsuguan ngayu, ay e tabanan yangay ngay kamelyu gbuba ngay famaenamnam fakonun, ay ngayuk gintu, ay at mafanud fag ngay gang. Ay kanya nu ndasug sas fun Sulumun, nainto fagayu at fagyaintoun sa anya.

³ Ay Sulumun nabalus fagayu at fagintoun, ay we yud nafafayamag fagayu nusnge wain at fagintoun sa anya.

⁴ Ay talun Syeba at fun fag mangena andulo maksvn nu nadungug Sulumun at fagsafulun, ay nu nalag at nafawat fag bale,

⁵ ay at ngay fakonun tagsit fagfangonan, at ngay fagsuguan ay at ngay tagfangguna at ke ngay lanbung masine, ay at ngay tagtalin fanginum, ay at fagirugun fag ngay fanggalangun sis Yawi at bale.

⁶ Ay kanya nalong sas fun Sulumun te, “Matuyan tua ngaro ku nadungug fag barita gina au si ku talun sabaliwa am ngay fakamulun ay am fagsafulun.

⁷ Aro taw kwa gafanud yakmay au nalag fia. Anud, ku nadungug bunya sik wabilug ku nalag katsi.

⁸ Mauseganan tua am ngay fagsuguan taggubuk gugat emu, ay gdungugan am ngay longan at mamatanganan.

⁹ Segi Yawi am Dius aroro nafili emu laman sik fun sis Israel. Aroro Yawi kesug ngay taw Israel kabavn, kanya nafasik fun emu, laman namakamulun tuo at masine ay at matuyan.”

¹⁰ Ay kanya nafon sas fun Sulumun ufatk libuk fabudbungguan gintu, ngayuk famaenamnam fakonun, ay at mafanud fag ngay gang. We mafasud at kayuan at nafon anya fag ngay famaenamnam fakonun.

¹¹ Fun Kiram at ngay sakayan lino e buba gintu siginans Ufir, magamut ngayuk kayu at masine, ay at mafanud ayu daul fag ngay gang.

¹² Kafag ngay kayu at masine Sulumun at fangawat at bale ay Yawi at bale at ngay turuk, ay fangawat ngay fagfawangun ke ngay bakyang, laman ngay tagfawang at fagfawangun. Dasug katsi ye batang glag takayu kanya fag ngay kayu at masine.

¹³ Ay fun Sulumun nafon sas talun Syeba at fun fag mangena fagayu at fagetun, saman ya at nafalganan at fon sa anya. Sanya ginan kafag mangena ay at ngay fagsuguan noli wan sat talun.

Sulumun at ngay Ramraman

¹⁴ Galay banwa e gfon sas Sulumun duak safulu e tuluk libuk fabudbungguan gintu,

¹⁵ saman ya ngay tagfabangsi at famayad, ay tagsiginans talun Arabya at ngay fun, ay tagsiginans talun Israel at ngay fun ayu sirut.

¹⁶ Ay fun Sulumun nafawat duak sandank tagbiak famalabag gina gawayan, at masifigan at mabebean fag gintu. Galay sik famalabag masifigan fituk fabudbungguan gintu.

¹⁷ Ay nafawat yangay tuluk sandank talay fag famalabag, ay galay at sadi masifigan tuluk fabudbungguan gwabilug gintu. Ay Fun Sulumun nafasakbo kafag ngay famalabag sat bale at ngayan te, Araw Lebanun.

¹⁸ Ay kanya nafawat yangay at fanfunan fag faglunggungan at mawatan elipanti at bagang, ay nasifig gintu at yud e suglat.

¹⁹ Ay kafag faglunggungan at kabatan unumk fagsiadan gtudtungudan, ay at fagsararean mabalulang. Ay sis dua tigyangan ke fagfafatungkudan take, e duak liun gsumbalian malindug.

²⁰ Ay e labi dua yangayk liun sis dua fungfung galay fagsiadan. Ya batang e takatanya nusnga nday fag fagfagtainanan.

²¹ Fun Sulumun at taya fagayu mawatan siginans gintu ay fagayu fagagbilugun tagsit bale at nafangayan te, Araw Lebanun, mawatan yangay siginans gintu. Ay fagayu we mawatan siginans sanbung salapi, aroro salapi wa bangan mafanud gina fun Sulumun gfunan.

²² Ay fun Sulumun e ngay sakayan lino yangay tagbuba at ngay famaloun, ay tagfakamulun sanya Kiram at ngay fagsuguan. Ay kafag ngay sakayan lino nu kafoli sadi ginan way galay tuluk banwa, ay e buba gintu, salapi, elipanti at bagang, ay ngay amayan talay ay tagbia.

²³ Ay fagayu fun sas fagdaul daga we mafasud fun Sulumun at fagmaramramanun ay at fagsafulun.

²⁴ Fagayu taw sas fagdaul daga gyalagun Sulumun laman nandungugan sabaliwa at fagsafulun Dius at nafon anya.

²⁵ Galay banwa at nansibo anya e buba famonun at mawatan salapi, ay gintu, ay ngay lanbung, ngay fagagbilugun sas awayan, ngay famaenamnam fakonun, ngay kabayu ay ngay mola.

²⁶ Sulumun nafaful ngayuk faguyudan fag fangawayan ay ngayuk kabayu, sadik libu ufatk sandank faguyudan ay labi duak libuk kabayu, ay nafasarirung sat nafili fag ngay furuan ayu daul ay sas Erusalem.

²⁷ Ay gina Sulumun gfunan, ngay salapi sis Erusalem at kamafanudan kata way lang ngay gang, ay ngay kayu sidru ngayu kata ngay almuyu tagsis fun buksul.

²⁸ Sulumun nabayad ngay kabayu siginans talun Igiptu ay Silisya. Ay at fagfatigwanan fag ngay taw sanya baliwa, nafon at kasakan fag famayad sa sangay taw sis talun Silisya.

²⁹ Ay ginanya tagsiginans talun Igiptu fag faguyudan nu kabayad, unumk sandank lifung salapi, ay galay sik kabayu sadik sandan limak safuluk lifung salapi. Ay ngay taw Igiptu nafalo yangay kafag ngay faguyudan, ay fag ngay kabayu sa sangay taw Ket ay sa ngay taw Aram at ngay fun.