1 Fun 1 - Fanawbuid tagsibaliwas Fakayabian

Fun Dabid at ngay Menit Taguyan

¹ Fun Dabid mafufuama wan, ay kanya karios yay dewa e gumut anya at madamvl fag umut.

² Nu katanya, at ngay fagsuguan nalong te, “Mesug fag fun, aylati nu nanrvbvy ami sik baguina tagalaga emu laman di o karios.”

³ Nu katanya, kanya fagayu nanrvbvy sik baguina masine sas fagdaul Israel, ay nalag Abisag siginans furuan Sunem. Ay kanya fagayu nataban Abisag sas fun.

⁴ Anud, Abisag masine mandi, ay galaga Dabid. Dewa katanya, Dabid wa nafataladan anya.

Adunya Kaylat Gfunan

⁵ Adunya, Dabid at baguama sit mangena Kagit, nafamatungudun nangasik fun. Nu katanya, kanya nafalganan sik ngay faguyudan fangawayan ay ngay kabayu ay limak safuluk taw tagulit anya.

⁶ Ebi taguna, Dabid gfabayan way lang anya ay wa kasalag at fakamulun. Adunya sik masine fag mangama, ay kanya Absalum at arian.

⁷ Kanya nafakamatoan Uab, Seruya at baguama ay Abyatar fag tagfon fanggalangun sabaliwa at algan nu nangafunan, ay kafag dua kaylat ggubuk Adunya.

⁸ Dewa katanya, Saduk fag tagfon fanggalangun, ay Benaya, Euyada at baguama, ay Natan fag taglong, ay Simei ay Rei, ay Dabid at ngay tagalaga fia wa nagubuk anya.

⁹ Sik menit, Adunya nasas gang Sukelet munakbang sis En-Rugel, ay nanangirug sanya at ngay fanggalangun tupa, baka ay at mafatagluan fia fag baka riangan, ay nafauro at ngay faduksay tiba Dabid at ngay baguama, ay fagayu tagfangguna sis Uda.

¹⁰ Dewa katanya, wa nafauro Natan fag taglong, ay Benaya fag tagalaga fun, ay tiba tungud fag ngay tagfawayan, ay wa yangay nafauro at faduksay Sulumun.

¹¹ Ay Natan nasas Sulumun at mina, ay nainto te, “O wo saful te, Adunya, Kagit at baguama, nasadili ansik fun, ay fun Dabid wa nasaful.

¹² Nu kaylat yay o am fag talanak nu kalangfe am, faningi ku longan.

¹³ Loi sas fun Dabid ay nanlong o anya te, ‘O nunda wo nafatuyanan te, ta baguama ban Sulumun at nantubus emu laman sik fun?

¹⁴ Ay kaduge ro wo gfakamatoan anya, gsakbo kro ay namatuyan kro te, matuyan am ngay nalong.’ ”

¹⁵ Nu katanya, Batseba nasas fun at suluk. Fun Dabid mafufuama wan, ay Abisag sik taw Sunem tagalaga anya.

¹⁶ Batseba natudan sis Dabid at salubangan laman gfalag te, gsuyu, ay fun Dabid nainto anya te, “Wain am fagnastieun?”

¹⁷ Ay Batseba nabalus anya te, “Mesug fag fun, nafatuyanan o sa angku sas Yawi, am Dius at salubangan te, ‘Ta baguama ban Sulumun at nantubus emu laman sik fun.’

¹⁸ Dewa katanya, wo nasaful te, katsi Adunya sik fun wan.

¹⁹ Kanya nafon at fanggalangun ngayuk tama baka, ay at mafatagluan fag riangan ay ngay tupa. Kanya nafauro fagayu am ngay baguama, ay nafauro yangay Abyatar fag tagfon fanggalangun, ay Uab fag fun tagfawayan. Dewa katanya, wa nafauro am fagsuguan Sulumun.

²⁰ Mesug fag fun, katsi ngay taw Israel gfanya nung o glong nu sinu fantubus emu laman sik fun.

²¹ Way ro wo nalong, ay nu nbul ro wo, ngay taw ro glong emi talanak te, sik takamuag ami.”

²² Kaduge Batseba gfakamatoan fun Dabid, taglong Natan andasug.

²³ E nalong sas fun Dabid te, “Natan nastie.” Ay Natan garungan sas fun at salubangan laman gfalag te, gsuyu.

²⁴ Ay glong te, “Mesug fag fun, o nalong wo te, Adunya wan at fun fantubus emu?

²⁵ Katsi fag menit, Adunya girug ngay tama baka, ngay riangan ay at mafatagluan fag ngay tupa. Arvs fagayu wan am baguama, ay am ngay tagfawayan at fun, ay anggan tagfon fanggalangun Abyatar at nafauro sat fagmafulun. Ay katsi, kanya fagayu gfangon ay ginum. Ngay taw guro te, ‘Mabayan fun Adunya!’

²⁶ Dewa katanya, wa nagewan angku, am fagsuguan, ay anggan tagfon fanggalangun Saduk, ay Benaya, Euyada at baguama, ay am fagsuguan Sulumun.

²⁷ O tuy wan am algan, am fagyudun gfasaful ya emi at fantubus emu laman sik fun?”

Dabid Nafili Sulumun laman sik Fun

²⁸ Fun Dabid nalong anya te, “Fastiei Batseba,” nu katanya, Batseba nasas fun.

²⁹ Sanya ginan, fun Dabid nalong te, “Gfatuyanan au sas Yawi, tagleleg fag Dius at nafalangfe angku siginans fagayu fagidapun,

³⁰ namafasludan au ku fatuyanan sa emu sas Yawi, ngay taw Israel at Dius at ngayan te, ta baguama Sulumun tagtubus ban angku laman sik fun.”

³¹ Ay Batseba narungan wa vtv laman gfalag te, gsuyu, ay nalong te, “Manabayan tua ban o nangus gugat, mesug fag fun Dabid.”

³² Ay fun Dabid nalong te, “Fastiei Saduk fag tagfon fanggalangun, ay taglong Natan, ay Benaya, Euyada at baguama.” Nu katanya, kanya fagayu nasas fun.

³³ Ay fun nalong anya te, “Fasakayi ku baguama Sulumun sa ku mola ay tabani anya sas Gikun gadgaloan ku ngay taglong.

³⁴ Ay nu ndasug am sanya, rarusi langis sat alfuyu laman gfasaful te, kanya wan ku nafili at nanfunan Israel. Sanya ginan, fawangi ngay budyung ay uroi te, ‘Mabayan fun Sulumun!’

³⁵ Sanya ginan, faulii anya stae ay kanya nanmalunggung sa ku faglunggungan ay nantubus angku laman sik fun. Kanya ku nafili at nanfunan ban sas Israel ay sas Uda.”

³⁶ Ay Benaya, Euyada at baguama, nabalus te, “Kin, namakamulun ro mi takatanya. Yawi am Dius tagfatuyan tuy.

³⁷ Mesug fag fun, nu setain Yawi nu gufud emu, katanya yangay ban nangus nu gufud Sulumun ay gtungud yay ban nangus emu nu gfunan.”

³⁸ Nu katanya, Saduk fag tagfon fanggalangun, Natan fag taglong, Benaya, Euyada at baguama, ay fun Dabid at ngay tagulit fia fag ngay taw Keret ay ngay taw Pelet nafasakay Sulumun sis fun Dabid at sakayan ay nataban anya sas Gikun.

³⁹ Ay kanya fagayu nu ndasug sanya, Saduk nanamul langis siginans bale ramit at masuadan si sik sunge, ay naugwag sas Sulumun at alfuyu. Sanya ginan, nafawang budyung ay guro te, “Mabayan fun Sulumun!”

⁴⁰ Ngay taw naufud fun Sulumun nu guli sas Erusalem, ay guro guseganan ay gfawang ngay tulali. Ay at kaksvnan nu garingang, daga nauigan.

⁴¹ Adunya ay at ngay betaw nu gakatabuun wan nu guseganan, nadungug at ngay aringang. Ay Uab nu nadungug budyung at awang, nainto te, “Nataw manga tagaringang ngayu sis furuan?”

⁴² Kaduge kanya garingang, Yunatan, Abyatar, tagfon fanggalangun at baguama, andasug. Ay Adunya nalong te, “Sakboi, aroro sik mafanud o fag taw, ay gseg au te, e barita o at masine.”

⁴³ Ay Yunatan nabalus te, “Duan, wa masine ku barita, aroro fun Dabid nafili Sulumun laman sik fun.

⁴⁴ Kanya nasugu anya sas Gikun, gadgaloan tagfon fanggalangun Saduk, ay Natan fag taglong, ay Benaya, Euyada at baguama, ngay taw Keret, ngay taw Pelet, ay nafasakay Sulumun sas fun at sakayan.

⁴⁵ Ay kanya fagayu nu ndasug sas Gikun, Saduk ay Natan naugwag langis sas Sulumun at alfuyu laman gfalag te, sia wan at nafili fag fun. Kanya fagayu anfoli wan sanya ginan, nu katanya, ngay taw maksvn nu guseganan sis furuan daul. Kanya wan ay dungganan fag ngay aringang.

⁴⁶ Ay katsi, Sulumun wan tagmalunggung sis fun at faglunggungan laman sik fun.

⁴⁷ Ngay tagfangguna nasas Dabid laman namauseganan anya. Kanya fagayu nalong te, ‘Dius nangus gfalabi yay emu Sulumun nu kadungug, ay Sulumun ban nangus gtungud yay emu nu gfunan.’

⁴⁸ Ay Dabid namalub sit fagtaygilidanan laman gseg Yawi, ay glong te, ‘Fauseganani Yawi, Israel at Dius, at nafalag sa angku katsi fag menit tagungbus angku laman sik fun.’ ”

⁴⁹ Ay Adunya at ngay betaw nu nadungug takatanya, anlindug ay kalimu maksvn, ay nasadsadian nalao.

⁵⁰ Ay Adunya anlimu Sulumun, ay nasas Yawi at bale ay nated fagirugan fanggalangun at ngay sunge.

⁵¹ Ay e nalong sas Sulumun te, “Adunya kalimu emu, ay katsi gted fagirugan fanggalangun at ngay sunge ay glong te, ‘Katsi ro nangus fun Sulumun namatuyanan te, wa namabul angku, at fagsuguan.’ ”

⁵² Sulumun nalong te, “Kanya ro nu matuyan tua fag taw, kwa ro gafaurianan. Dewa katanya, kanya ro nu mauri way, umbul ro.”

⁵³ Ay fun Sulumun nasugu laman nantaban Adunya, ay kanya natudan sas fun Sulumun at salubangan laman gsuyu. Ay Sulumun nalong anya te, “Ulii wan.”