Psailm 99 - An tSaltair nó Sailm Ḋáiḃí 1965 (Ó Cuinn)

Salm 99. Dominus regnavit.

¹ Is é an Tiarna is Rí ann, dá méid í míḟoiġne na ndaoine: suíonn sé idir na cearúibím, is cuma ċoṁ corraċ ʼsa ḃíos an doṁan.

² Is mór an Tiarna i Síón: is ard é os cionn na ndaoine uile.

³ Taḃarfaiḋ siad buíoċas le dʼAinm, atá mór, iontaċ: óir is naofa é.

⁴ Bíonn cion ar an gceart ag Rí na gcuṁaċt; ċum tú coṫroime: ċuir tú an breiṫiúnas agus an ḟíréantaċt i ḃfeiḋm in Iácób.

⁵ Móraigí an Tiarna ár nDia, agus ísligí siḃ féin faoi stól a ċos: óir is naofa é.

⁶ Ḃí Maois agus Árón i measc a ṡagart, agus ḃí Samúel ar an dream a ġlaoḋ ar a ainm: ġlaodar san ar an Tiarna, agus ċuala sé iad.

⁷ Laḃair sé leo amaċ as an gcolúin néaltaċ: óir ċoinníodar a ḟianaisí, agus an dlí a ṫug sé dóiḃ.

⁸ Ċuala tú iad, a Ṫiarna ár nDia: is maiteaċ a ḃí tú leo, a Ḋia, aċ gur ċuir tú pionós orṫu ar son a ndoḃeart féin.

⁹ Móraigí an Tiarna ár nDia, agus aḋraigí é ar an gcnoc naofa: óir is naofa é an Tiarna ár nDia.