Psailm 97 - An tSaltair nó Sailm Ḋáiḃí 1965 (Ó Cuinn)

Salm 97. Dominus regnavit.

¹ Is é an Tiarna is Rí, cuireaḋ sin lúċáir ar an talaṁ: cuireaḋ sé go deiṁin lúċáir ar na hoileáin dá méid.

² Bíonn néalta agus dorċadas ina ṫimpeall: is ar an ḃfíréantaċt agus ar an gceart a ṡuítear a ċaṫaoir.

³ Beiḋ tine ag imeaċt roiṁe: agus ag loscaḋ a naiṁde ar gaċ taoḃ.

⁴ Ḋealraiġ a ṡoilse ar fuaid an tsaoil: ċonaic an doṁan é, agus ḃí eagla air.

⁵ Ḃí na cnoic ag leá mar ċéir i láiṫreaċt Dé: i láiṫreaċt Tiarna an doṁain uile.

⁶ Tá a ḟíréantaċt foilsiṫe ag na neaṁa: agus tá a ġlóir feicṫe ag na daoine go léir.

⁷ Spréaḋ ar luċt aḋarṫa na n‑íoṁánna greanta uile, an dream a ċuireas dúil i ndéiṫe díoṁaoine: aḋraigí é, a ḋéiṫe uile.

⁸ Ċuala Síón faoi, agus ḃí áṫas uirṫi, agus ḃí lúċáir ar iníonaċa lúda: de ḃrí do ḃreiṫiúnas, a Ṫiarna.

⁹ Óir is tú, a Ṫiarna, is airde ná a ḃfuil ar an talaṁ: is airde i ḃfad tú ná na déiṫe go léir.

¹⁰ A luċt gráite Dé, ná teipeaḋ fuaṫ a ḃeiṫ agaiḃ don olc: cuṁdaíonn an Tiarna anamaċa a naoṁ; fuasclóiḋ sé as láiṁ luċt an oilc iad.

¹¹ Noċt solas le haġaiḋ na ḃfíréan: agus lúċáir lán‑áṫasaċ do ḋrong an ċroí ḟír.

¹² Go mba é an Tiarna ḃur n‑áḃar áṫais, a ḟíréana: agus tugaigí buíoċas lena naofaċt a ċur i gcuiṁne.