Psailm 96 - An tSaltair nó Sailm Ḋáiḃí 1965 (Ó Cuinn)

Salm 96. Cantate Domino.

¹ Canaigí don Tiarna aṁrán úrnua: canaigí don Tiarna, a ḋoṁain uile.

² Canaigí don Tiarna, agus molaigí a Ainm: bígí ag insint a ṡlánaiṫe ó lá go lá.

³ Noċtaigí a onóir do na págánaiġ: agus a iontais do na daoine go léir.

⁴ Óir tá an Tiarna ċoṁ mór sin naċ féidir a ṁolaḋ mar is cóir: is mó ineaglaiṫe é ná a ḃfuil de ḋéiṫe ann.

⁵ Níl i ndéiṫe uile na bpágánaċ aċ láṁḋéiṫe: aċ is é an Tiarna a rinne na neaṁa.

⁶ Bíonn an ġlóir agus an gradam os a ċoinne: bíonn an ċuṁaċt agus an onóir ina ṡanctóir.

⁷ Luaigí leis an Tiarna, a aicmí na ndaoine: luaigí leis an Tiarna gradam agus cuṁaċt.

⁸ Tugaigí don Tiarna an onóir is dual dá Ainm: tugaigí taḃartais liḃ agus tagaigí isteaċ ina ċúirteanna.

⁹ Aḋraigí an Tiarna go hálainn naofa: bíoḋ a uaṁan ar an doṁan uile.

¹⁰ Insígí i measc na bpágánaċ gurb é an Tiarna is Rí ann: agus gurb é a ḋaingniġ an ċruinne go naċ féidir a corraí; agus conas a ṫaḃarfaiḋ sé breiṫiúnas fíréanta ar na daoine.

¹¹ Bíoḋ lúċáir ar na neaṁa, agus áṫas ar an talaṁ: tógaḋ an ṁuir agus a ḃfuil inti gáir.

¹² Bíoḋ lúċáir ar an maċaire agus a ḃfuil air: beiḋ átas ar ċrainn uile na coille roiṁ an Tiarna.

¹³ Óir tá sé ag teaċt, ag teaċt le breiṫiúnas a ṫaḃairt ar an talaṁ: le breiṫiúnas fíréanta a ṫaḃairt ar an doṁan, agus breiṫiúnas fírinneaċ a ṫaḃairt ar na daoine.