Psailm 80 - An tSaltair nó Sailm Ḋáiḃí 1965 (Ó Cuinn)

Salm 80. Qui regis Israel.

¹ Éist, a Aoire Iosrael, a ṫreoraíos Iósaf mar ṫréad: taispeáin ṫú féin freisin, ó ṡuíonn tú ar na Cearúibím.

² Os coṁair Eṗráím, Beniamín, agus Manasses: múscail do ċuṁaċta, agus tar do ċur tarrṫála orainn.

³ Iompaiġ sinn arís, a Ḋia: noċt solas do ġnúise, agus slánófar sinn.

⁴ A Ṫiarna Dia na slua: ca ḟad a ḃeiḋ fearg ort le do ṗobal, agus iad ag guí?

⁵ Beaṫaíonn tú iad le harán na ndeor: agus tugann tú an iomad deor dóiḃ le hól.

⁶ Tá áḃar imreasáin déanta agat dínn dár gcoṁarsana: agus is díṁeasúil a ḃíonn ár naiṁde ag magaḋ fúinn.

⁷ Taḃair orainn filleaḋ arís, a Ṫiarna Dia na slua: taispeáin solas do ġnúise, agus slánófar sinn.

⁸ Ṫug tú an ċraoḃ ḟíniúna amaċ as an Éigipt: ċaiṫ tú amaċ na págánaiġ, go ndearna tú í a ṗlandáil.

⁹ Réitiġ tú an bealaċ roimpi: agus nuair a ċuir sí a fréaṁaċa síos, líon sí an tír.

¹⁰ Ḃí na cnoic cuṁdaiṫe lena scáil: agus ḃí a géaga mar ċrainn ḃreáṫa céadrais.

¹¹ Ṡín sí a craoḃaċa ċun na farraige: agus a géaga ċun na haḃann.

¹² Cad ċuige ar leag tú a claí: go mbíonn luċt siúil an ḃóṫair ag baint a caor fíniúna?

¹³ Bíonn torc allta na coille á toċailt: agus beiṫíġ allta an ṁaċaire á hiṫe.

¹⁴ Fill orainn arís, a Ṫiarna na slua, féaċ anuas ó neaṁ: taḃair aṁarc agus cuairt ar an gcraoḃ fíniúna seo;

¹⁵ Agus dála ionaid an ḟíonġoirt a cuireaḋ le do láiṁ ḋeas: agus dála na géige a rinne tú ċoṁ láidir sin duit féin.

¹⁶ Dóḋ le tine í, agus gearraḋ anuas í: agus tugann bagairt do ġnúise a mbás siúd.

¹⁷ Beireaḋ do láṁ ar ḟear do láiṁe deise: agus ar ṁac an duine, a rinne tú ċoṁ láidir sin duit féin.

¹⁸ Má ḋéanann tú aṁlaiḋ, ní raċaimid ar gcúl uait: lig ár mbeo linn, agus glaofaimid ar dʼAinm.

¹⁹ Taḃair orainn filleaḋ arís, a Ṫiarna Dia na slua: taispeáin solas do ġnúise, agus slánófar sinn.