Psailm 6 - An tSaltair nó Sailm Ḋáiḃí 1965 (Ó Cuinn)

Salm 6. Domine, ne in furore.

¹ A Ṫiarna, ná taḃair aċasán dom agus fearg ort: agus ná cuir smaċt orm agus tú i ḃfíoċ liom.

² Bíoḋ trócaire agat orm, a Ṫiarna, ó táim cloíte: a Ṫiarna, slánaiġ mé, ó tá mo ċnáṁa coscarṫa.

³ Agus tá mórḃuaireaṁ ar mʼanam: aċ, a Ṫiarna, cá ḟad a ḃeiḋ tú do mo ṗianaḋ?

⁴ Fill, a Ṫiarna, agus fuascail mʼanam: saor mé ar son do ṫrócaire.

⁵ Óir sa ḃás ní ċuiṁníonn aon duine ort: agus cé a ṫaḃarfaiḋ buíoċas duit sa ṗoll?

⁶ Táim tuirseaċ ag osnaíl: ním mo leaba gaċ oíċe, agus fliuċaim mʼiomaí le mo ḋeora.

⁷ Dʼimiġ mo ṁaise uaim le tréanḃuaireaṁ: críonaḋ í de ḃarr mo naiṁde uile.

⁸ Imiġ uaim, a luċt déanta an díoṁaointis: óir ċuala an Tiarna fuaim mo ċaointe.

⁹ Ċuala an Tiarna mʼaċainíoċa: glacfaiḋ an Tiarna le mo ġuí.

¹⁰ Cuirfear náire agus mórḃuaireaṁ ar mo naiṁde uile: cuirfear ar gcúl iad, agus cuirfear náire orṫu go tobann.