Psailm 57 - An tSaltair nó Sailm Ḋáiḃí 1965 (Ó Cuinn)

Salm 57. Miserere mei, Deus.

¹ Bíoḋ trócaire agat orm, a Ḋia, bíoḋ trócaire agat orm, ós asat atá dóċas mʼanama: ġeoḃaiḋ mé dídean faoi scáṫ do sciaṫán, go n‑imí an tíorántaċt seo ṫarainn.

² Glaofaiḋ mé ar an Dia is Airde: ar an Dia céanna a ḋéanfas an ċúis atá idir láṁa agam a ċur i ḃfeiḋm.

³ Cuirfiḋ sé síos ó neaṁ: agus taḃarfaiḋ sé slán mé ó aiṫis an té atá ar tí mo ṡlogṫa.

⁴ Cuirfiḋ Dia amaċ a ṫrócaire agus a ḟírinne: tá mʼanam sa i measc na leon.

⁵ Táim i mo luí i measc clann na ndaoine, a ċuaiġ trí ṫine: bíonn sleánna agus saiġeada acu mar ḟiacla, agus claíoṁ géar acu mar ṫeanga.

⁶ Éiriġ in airde, a Ḋia, os cionn na neaṁ: agus éiríoḋ do ġlóir os cionn an talaiṁ uile.

⁷ Ċuireadar líon roiṁ mo ċosa, agus is íseal a ṫuga dar mʼanam: ṫoċladar poll roṁam, agus ṫiteadar féin ina lár.

⁸ Is daingean mo ċroí, a Ḋia, is daingean mo ċroí: beiḋ mé ag cantaireaċt agus ag seinm do ṁolta.

⁹ Dúisiġ, mo ġlóir; dúisígí a ċruit ʼs a ċláirseaċ: is luaṫ luaṫ a ḃeiḋ mé féin i mo ḋúiseaċt.

¹⁰ Taḃarfaiḋ mé buíoċas leat, a Ṫiarna, i measc na gciníoċa: agus beiḋ mé ag cantaireaċt duit i measc na náisiún.

¹¹ Óir bíonn méid do ṫrócaire ċoṁ hard leis na neaṁa: agus sroiċeann dʼḟírinne go dtí na néalta.

¹² Éiriġ in airde, a Ḋia, os cionn na neaṁ: agus éiríoḋ do ġlóir os cionn an talaiṁ uile.