Psailm 55 - An tSaltair nó Sailm Ḋáiḃí 1965 (Ó Cuinn)

Salm 55. Exaudi, Deus.

¹ Éist le mo ġuí, a Ḋia: agus ná bí do do ċeilt féin óm aċainí.

² Taḃair aire dom, agus éist le mo scéal: mar a ḃíonn brón agus buaireaṁ orm, agus mé ag guí.

³ Ó ġáir na naiṁde, agus ó ġéaraiġ luċt an oilc ar a siúl: tá ar intinn acu doċar a ḋéanaṁ dom; ón olc a ṫaispeánann siad dom.

⁴ Tá mo ċroí buarṫa ionam: agus ṫit eagla an ḃáis orm.

⁵ Ṫáinig imní agus creaṫnú orm: agus rug uafás ar mo ḃaill beaṫa.

⁶ Agus dúirt mé, is mairg naċ ḃfuil sciaṫáin orm mar ċolm: ba ansin a raċainn ar eiteog as, agus ġeoḃainn suaiṁneas.

⁷ Féaċ, mar dʼéalóinn i ḃfad i gcéin: agus dʼḟanfainn san ḟásaċ.

⁸ Ḃeaḋ deifir orm ag éalú: de ḃarr an tséideáin gaoiṫe agus de ḃarr na doininne.

⁹ Bíoḋ a dteangaċa, a Ṫiarna, á scriosaḋ agus á scaraḋ ó ċéile agat: óir ċonaic mé urċóid agus clampar sa ċaṫair.

¹⁰ Ní stadann siad de ṡiúl taoḃ istiġ dá ballaí lá ná oíċe: agus bíonn an donas agus na deora ina lár.

¹¹ Is í ionad na hurċóide í: ní ḟágann an ċealg ná an ċluain a sráideanna.

¹² Óir ní naṁaid follas a ṫug an ṁíċlú seo orm: dá mbʼaṁlaiḋ ab ḟéidir liom a ḟulaingt.

¹³ Ná níorḃ é mʼeascara, a ċuir im aġaiḋ go mór: dá mba é, bʼḟéidir go raċainn i ḃfolaċ roiṁe.

¹⁴ Aċ ba tú a ḃí ann, mo ċomrádaí: mo ċoṁairleoir, agus mo ḋlúṫċara.

¹⁵ Ba ċaoin ár gcoṁairle le ċéile: ba ċairdiúil a ṡiúlamar i dteaċ Dé.

¹⁶ Go dtaga an bás orṫu go tobann, agus go dté siad síos sa ṗoll agus iad beo: óir tá an urċóid ina gcónaiṫe, agus ina gcroí istiġ.

¹⁷ Aċ glaofaiḋ mise ar Ḋia: agus saorfaiḋ an Tiarna mé.

¹⁸ Tráṫnóna, agus ar maidin, agus um meán lae beiḋ mé ag guí, agus ag guí go dian: agus éistfiḋ sé le mo ġlór.

¹⁹ Is é ṫug mʼanam slán i síoċáin ón gcaṫ a cuireaḋ orm: óir bʼ iomaí duine a ċuir cogaḋ orm.

²⁰ Beiḋ Dia, a ṁaireas go síoraí, é féin ag éisteaċt liom, agus á gcur ar lár: óir ní iompóiḋ siad, ná ní heagal leo Dia.

²¹ Ċuir sé a láṁa ar an té a ḃí i síoċáin leis: agus ḃris sé a ċonraḋ.

²² Ba ḃoige briaṫra a ḃéil ná im, agus an cogaḋ ina ċroí: ba ṡleaṁaine a ḃriaṫra ná ola, aċ is iad na claiṁte iad.

²³ Caiṫ dʼualaċ ar an Tiarna, agus coṫóiḋ sé ṫú: ní ligfiḋ sé go dteipfeaḋ ar an ḃfíréan go deo.

²⁴ Aċ is é atá i ndán don drong úd: beiḋ tú féin, a Ṫiarna, á dtaḃairt go poll an scriosta.

²⁵ Na fir ḟíoċṁara ḟealltaċa, ní ḃfaiġiḋ siad leaṫ a laeṫanta: aċ ina ḋiaiḋ sin, is ionat a ċuirfeas mé mo ḋóċas, a Ṫiarna.