Psailm 53 - An tSaltair nó Sailm Ḋáiḃí 1965 (Ó Cuinn)

Salm 53. Dixit insipiens.

¹ Is é a dúirt an duine amaideaċ ina ċroí: Níl aon Dia ann.

² Is truailliṫe atá siad, dʼéiriġ a n‑urċóid gráiniúil: níl aon duine a ḋéanas an ṁaiṫ.

³ Dʼḟéaċ Dia anuas ó neaṁ ar ċlann Áḋaiṁ: go ḃfeicfeaḋ sé an mbeaḋ tuiscint ag aon duine, an iarrfaḋ sé Dia.

⁴ Aċ ċuadar uile as an slí, dʼéiríodar gráiniúil ar fad: níl duine ann a ḋéanas an ṁaiṫ, níl, fiú aon duine aṁáin.

⁵ Naċ iad atá gan tuiscint, a mbíonn droċḟuadar fúṫu: ag iṫe mo ṁuintire mar dʼíosfaidís arán? Níor ġlaoiġ siad ar Ḋia.

⁶ Ḃí eagla orṫu gan áḃar eagla ann: óir ḃris Dia cnáṁa an té a ċuir léigear ort.

⁷ Ċuir tú náire orṫu: ó ḃí díṁeas ag Dia orṫu.

⁸ Go raiḃ an slánú á ḃronnaḋ ar Iosrael as Síón amaċ: go ḃfuascla an Tiarna a ṁuintir as broid!

⁹ Is ansin a ḃeaḋ lúċáir ar Iácób: agus áṫas ar Iosrael.