Psailm 51 - An tSaltair nó Sailm Ḋáiḃí 1965 (Ó Cuinn)

Salm 51. Miserere mei, Deus.

¹ Bí trócaireaċ dom, a Ḋia, de réir do ṁórṁaiṫeasa: de réir méid do ṫrócaire, scrios amaċ mo ċionta.

² Niġ mé ar fad óm urċóid: agus glan mo ṗeaca díom.

³ Óir adṁaím mo loċta: agus bíonn mo ṗeaca de ṡíor os mo ċoinne.

⁴ Is i dʼaġaiḋse aṁáin a ṗeacaiġ mé, agus a rinne mé an ní is olc i do ṡúile: ar ṁoḋ go mbʼḟíréanta do ḃriaṫar, agus naċ mbeaḋ smúid ar do ḃreiṫiúnas.

⁵ Féaċ, is in urċóid a dealḃaíoḋ mé: is i bpeaca a ġaḃ mo ṁáṫair ina broinn mé.

⁶ Aċ naċ n‑iarrann tú an ḟírinne sa ċroí istiġ: agus naċ múinfiḋ tú eagna dom os íseal!

⁷ Sciúrfaiḋ tú le niosóp mé, agus is glan a ḃeas mé: nífiḋ tú mé, agus beiḋ mé níos gile ná an sneaċta.

⁸ Cuirfiḋ tú dea‑scéal áṫais agus lúċáire ċugam: ionas go mbeiḋ gairdeas ar na cnáṁa atá briste agat.

⁹ Tiontaiġ do ġnúis ó mo ṗeacaí: agus scrios amaċ mo ṁíġníoṁarṫa uile.

¹⁰ Cruṫaiġ croí glan ionam, a Ḋia: agus cuir sprid ċeart ionam as an nua.

¹¹ Ná díbir ó do láṫair mé: agus ná tóg do naoṁspiorad uaim.

¹² Taḃair do ċaḃair arís mar ṡólás dom: agus neartaiġ le do spiorad saor mé.

¹³ Múinfiḋ mé do ṡlite do luċt an oilc agus iompófar na peacaiġ ċugat.

¹⁴ Fuascail mé ó ċoir na fola, a Ḋia, ós tú Dia mo ṡlánaiṫe: agus canfaiḋ mo ṫeanga dʼḟíréantaċt.

¹⁵ Osclóiḋ tú mo ḃeola, a Ṫiarna: agus foilseoiḋ mo ḃéal do ṁolaḋsa.

¹⁶ Óir ní iarrann tú aon tsaicrifís, dá n‑iarrtá ṫaḃarfainn duit í: aċ ní ḃíonn dúil agat in íobairtí loiscṫe.

¹⁷ Sprid ḃuarṫa is ea íobairt Dé: croí briste coṁḃrúite, a Ḋia, ní beag do ḃeann air.

¹⁸ Bí caradaċ fialṁar le Síón déan ballaí Iarúsalem a ṫógáil.

¹⁹ Is san uair sin a ġlacfaiḋ tú go fonnṁar le híobairtí na fíréantaċta, idir íobairtí loiscṫe agus toirḃirtí: agus san uair sin beiḋ na daiṁ óga á n‑ofráil ar dʼaltóir.